Авторизация



Кто на сайте

Сейчас 121 гостей онлайн
ОФИЦИАЛЬНЫЙ WEB-САЙТ АКИМА ГОРОДА СЕМЕЙ
  • Семей қалалық соты мен медиацияны дамыту орталығы ынтымақтастық туралы меморандумға қол қойды

    Семей қалалық сотының төрағасы Н.Б.Әбдікәрімов пен Астана қаласының «Медиацияны дамыту орталығы» Республикалық қоғамдық бірлестігінің Шығыс Қазақстан облысы бойынша Семей қаласының өкілі Б.Д.Кенжина жанжалдарды шешудің медиация және басқа да балама әдістерін дамыту мақсатында ынтымақтастық туралы меморандумға қол қойды.

  • Жүлделі орынмен қайтып келді!

    Семей қаласының облыстық балалар биологиялық орталығының оқушылар командасынан құралған 2 жас натуралистер Жунусова Ляззат Кайратовнаның жетекшілігімен №17 ЖОББМ оқушысы Киякпаева Дильназ, Вощакина Дарья Николаевнаның жектекшілігімен № 1 ЖОББМ оқушысы Жерздева Екатерина 2018 жылдың 17 қарашасы Өскемен қаласында өткен «Таза қоршаған орта - «Қазақстан – 2030» стратегиясын жүзеге асыру негізінде» «Дарын» облыстық өңірлік ғылыми – практикалық орталығының бағыты бойынша облыстық байқауына қатыст

  • «Отбасы мен әйелдердің құқықтарын қорғау» атты пікірталас өткізілді

    Орталықтандырылған кітапхана жүйесінде жастардың құқықтық білім деңгейін арттыру, гендерлік мәдениетке тәрбиелеу мақсатында Радиотехника және байланыс колледжінің 1-2 курс студенттерімен «Отбасы мен әйелдердің құқықтарын қорғау» атты пікірталас өткізілді.

Яндекс.Новости: Казахстан

Курсы валют: курс доллара, курс евро

Купи-Продай

Случайная новость

Разъяснены основные направления

Информационно-пропагандистские группы проводят  встречи с населением с целью пропаганды и информирования по Посланию Президента народу «Казахстан в глобальной реальности: рост, реформы, развитие». Очередная встреча прошла с коллективом консультативно-диагностического центра г. Семей.

Выступая по основным направлениям Послания, член ИПГ, преподаватель финансово-экономического колледжа имени Р. Байсеитова Артур Искаков остановился на международной экономической обстановке, ее влиянии на экономические показатели Казахстана, а также на антикризисном плане, предложенном главой государства для успешного преодоления кризиса.

- Предложенное в Послании главы государства  «Казахстан в глобальной реальности: рост, реформы, развитие» - единственно верный ответ сегодняшнему положению в мировом сообществе, в котором учтены все сферы деятельности, - отметил он.

Подробнее ...
Home ПРЕЗИДЕНТ ТАПСЫРМАСЫ

ПРЕЗИДЕНТ ТАПСЫРМАСЫ

ҮКІМЕТ БАСШЫСЫ СЕМЕЙДЕ

Сейсенбі, 9 қазан күні Семейге жұмыс сапарымен ҚР Премьер-министрі Бақытжан Сағынтаев, ҚР Инвестиция және даму министрі Жеңіс Қасымбек, ҚР Денсаулық сақтау министрі Елжан Біртанов, Білім және ғылым министрі Ерлан Сағадиев, Еңбек және халықты әлеуметтік қорғау министрі Мадина Әбілқасымова, «Атамекен» ҚР КП Басқарма төрағасы Абылай Мырзахметов келді. Үкімет басындағы азаматтар қаладағы Семей әуежайына, «Daewoo Bus Kazakhstan», «СемАЗ» ЖШС өнеркәсіптік нысандарына, Қарағайлы ықшам ауданындағы «Абай Арена» мәдени-спорт кешеніне, Семей медициналық жедел жәрдем ауруханасына және Абай музейіне барып, шаһарда атқарылып жатқан жұмыстармен танысты.

Шығыс Қазақстанға арнайы жұмыс сапарымен келген Премьер-министр Бақытжан Сағынтаев алдымен Семей әуежайының қайта жөндеу жұмыстарымен танысты.

Қайта құру жұмыстары «Нұрлы жол» мемлекеттік бағдарламасы аясында 2016 жылы желтоқсан айында басталған болатын. Жобаны іске асыру үшін 10,197 млрд. теңге бөлінген. Бүгінде әуежайдағы ұшып-қону жолағы толықтай жөндеуден өтіп, қыркүйек айынан бастап Өскемен – Семей - Үржар, Семей - Алматы, Семей - Астана бағыттары бойынша Ан-24 ұшақтарын қабылдай бастады.

- Аэровокзалдағы қайта құру жұмыстары 93%-ға орындалды. Жұмыстар нақты аяқталғаннан кейін әуежай «В» санаттағы халықаралық ИКАО (Халықаралық азаматтық авиация ұйымы) стандарттарына сай болмақ. Бұл Boeing, Airbus, ИЛ-76  ұшақтарымен 300 жолаушы тасымалдап, қабылдауға мүмкіндік береді. Яғни, тәулігіне 25-30 рейске дейін, сағатына 200-ге жуық жолаушыға қызмет көрсетуге жол ашылады,- деді ШҚО әкімі Даниал Ахметов.

Сонымен бірге «Scat», «Qazaq air», «Bek air», «Air Astana» секілді отандық авиакомпаниялармен қатар, Ресей, Түркия, Мысыр, Біріккен Араб Әмірліктеріне халықаралық рейстерді ұйымдастыруға мүмкіндік тумақ. Кешенде 250-ден астам адамға жұмыс орны ашылады деп жопарлануда.

Премьер-министр Бақытжан Сағынтаев жұмыс сапары барысында шаһардағы «Daewoo Bus Kazakhstan» ЖШС мен «СемАЗ» ЖШС-нің өнеркәсіптік нысандарын аралап, отандық машина жасау саласының дамуымен танысты.

Кәсіпорын Daewoo жолаушылар автобустарын шығарады. Сондай-ақ биыл «Daewoo Bus Kazakhstan» ЖШС жолаушыларды тасымалдауға арналған «ГАЗель Next» автокөліктерін шығара бастады.

Бақытжан Сағынтаев машина құрас-тыру зауытының жұмысымен танысып, технологиялық процеспен, қосалқы бөлшектер мен аккумуляторлар өндірісі желісімен құрастырылатын автокөліктердің сапасын көрді.

Үкімет басшысы мектеп оқушыларын тасымалдауға арналған қоғамдық көліктерге қызығушылық танытты. Бақытжан Сағынтаев білім және ғылым министрі Ерлан Сағадиевке еліміздің өзге де облыстарына осы көліктерді тұтынуға мүмкіндік жасау керектігін айтты.

- 2017 жылы 136 автобус шығарылды. Осы жылдың қаңтар-тамыз айларында 82 Daewoo автобусы шығарылды. Бұл көрсеткіш өткен жылғы деңгейден 7,9%-ға жоғары,- деді «СемАЗ» ЖШС мен «Daewoo Bus Kazakhstan» ЖШС-нің бас директоры Әсемқан Досқожанов.

Компания «Беларусь» тракторлары мен жүк көліктерін де шығарады. Осы жылдың 8 айында 170 «Беларусь» тракторы, 186 жүк автокөлігі, соның ішінде 74 «SHACMAN» автокөлігі, 30 «Foton» жүк автокөлігі және 82 «Урал» жүк көлігі шығарылған. Кәсіпорында шығарылатын өнім түрлерін ұлғайту да көзделіп отыр.

Қазақстанда «Беларусь» тракторларын бірнеше кәсіпорын шығарады. Сондықтан Үкімет басшысы Инвестиция және даму министрі Жеңіс Қасымбекке «Беларусь» тракторларына нарықта бәсекелестік туындамауын қадағалауды тапсырды.

Кәсіпорынның өнімдері ішкі нарықта Кеден одағы мен ТМД елдерінде сұранысқа ие. Зауыт жылына 1200 автобус құрастырып шығаруға қауқарлы.

ҚР Премьер-министрі Бақытжан Сағынтаев іссапар барысында Семей қаласындағы Жедел медициналық жәрдем ауруханасына да ат басын тіреп, денсаулық сақтау саласында атқарылып жатқан жұмыстармен танысты.

Үкімет басшысы ота жасайтын, ауруларды қабылдайтын бөлімдердің жұмысына  жіті назар аударды. Облыстық денсаулық сақтау басқармасының басшысы М.Шорановтың айтуынша, ауруханада жаңа Triaqe жүйесі енгізілген. Бұл медициналық көмек көрсету мерзімін жылдамдатуға әсер етеді. Бұдан бөлек ауруларды қабылдау бөлімінде көпдеңгейлі жүйе енгізілген, яғни жолақ түсіне байланысты дәрігерлер мен медициналық қызметкерлер науқастардың ауруының асқыну дәрежесін көре алады. Бұл  пациенттерге жедел медициналық көмек көрсетуге мүмкіндік береді. Аурухана заманауи медициналық құралдармен жабдықталған. Осы жылдың сегіз айында 9 мыңға жуық науқасқа қызмет көрсетілген.

Премьер-министр Бақытжан Сағын-таевқа өңірдегі «Денсаулық» мемлекеттік бағдарламасының және 2017–2019 жылдарға арналған Шығыс Қазақстан облысының денсаулық сақтау жүйесінің тиімділігін арттырудың кешенді жоспарының іске асырылу барысы туралы баяндалды. Облыста денсаулық сақтау саласын цифрландыру, МЖӘ және жекеменшік қызмет көрсету секторын дамыту, медициналық қызмет көрсету сапасы халықтың әлеуметтік көңіл-күйінің маңызды компоненті ретінде айқындалған. Сондай-ақ Мемлекет басшысының Қазақстан халқына арнаған «Қазақстандықтардың әл-ауқатының өсуі: табыс пен тұрмыс сапасын арттыру» Жолдауында алға қойылған міндеттерді орындау жоспары туралы да айтылды.

ШҚО Денсаулық сақтау басқармасының басшысы М.Шоранов пациенттерге жоғары технологиялы медициналық көмек көрсету үшін облыста роботтандырылған хирургия орталығы, трансплантология орталығы, инсульт орталығы жұмыс істейтінін айтты.

Осыдан кейін Бақытжан Әбдірұлы Қазақ инновациялық гуманитарлық-заң университетінде қоғам белсенділерімен жүздесті.

- Баршаңызға белгілі, өткен аптада Елбасы кезекті Жолдауын жолдады. Бұл Жолдау жылдағыдан өзгеше болды. Біріншіден, әдеттегіден ерте жолданып отыр. Екіншіден, тек қана халықтың әл-ауқатын көтеруге арналды. Халықтың ойындағы ешбір мәселе сырт қалған жоқ. Халықтың тұрмыс деңгейі мен өмір сүру сапасы - жалпыұлттық мәселе. Мұны Елбасы әр кез айтып келеді. Жалақы мәселесі мен әлеуметтік салада көрсетіліп жатқан қызметтердің сапасы, денсаулық сақтау, білім беру салалары басты назарға алынды. Елбасы биылғы Жолдауында коммуналдық қызметтердің сапасына да мән берді. Үкіметке тапсырма беріліп, 1 трлн. 750 млрд. теңге әлеуметтік салаға бөлінді. Бұл - өте үлкен қаражат. Ал мектептер мен балабақшаларды қауіпсіздік бейнекамераларымен қамтамасыз ету, спорт кешендерін салу жергілікті әкімдік бюджеті тарапынан жүзеге асырылады. Елімізде бұрын-соңды әлеуметтік салаға мұндай көңіл бөлінген жоқ. Ең төменгі жалақы 28 мыңнан 42 мыңға дейін өседі. 1 млн. 300 мың адамның 1 қаңтардан бастап айлығы көтеріледі,- деді Үкімет басшысы.

ҚР Еңбек және халықты әлеуметтік қорғау министрі Мадина Әбілқасымова, Елбасы тапсырмасына сай, 2019 жылдың 1 қаңтарынан бастап бюджеттік ұйымдарда жұмыс істейтін 275 мың азаматтық қызметшінің еңбекақысы орта есеппен 35 пайызға артатынын жеткізді:

- Елбасының Қазақстан халқына арнаған жаңа Жолдауы - халықтың әл-ауқатын арттыруға арналған қуатты әлеуметтік-экономикалық реформалар. Мемлекет басшысының ең төменгі жалақы мөлшерін арттыру туралы тапсырмасына орай заңға өзгерістер енгізудеміз. Енді елдегі ең төменгі жалақы мөлшері ең төменгі күнкөріс деңгейіне байланысты болмайды, жыл сайын экономиканың өсуіне қарай артып отырады. Екіншіден, Мемлекет басшысының тапсырмасына сәйкес, 2019 жылғы 1 қаңтардан бастап бюджеттік ұйымдарда жұмыс істейтін 275 мың азаматтық қызметшінің еңбекақысы көтеріледі. Олар үшін жалақы өсімі орта есеппен 35 пайыз-ды құрайды. Яғни бірінші және төртінші разрядтың арасындағы жұмысшылар, әкімшілік және техникалық қызметшілер, тәрбиешілер, лаборанттар, медбикелер, фельдшерлер, акушерлер, аудармашылар, әдіскерлер, іс қағаздарын жүргізушілер, хатшылар және тағы басқа еңбеккерлердің жалақысы көбейеді. Қазіргі уақытта біз Үкімет қаулысы жобасын әзірлеудеміз. Бұл салаға мемлекет тарапынан үш жылға 86 млрд. теңге бөлінетін болады. Үшіншіден, ең төменгі жалақының артуына байланыс-ты барлық жалдамалы жұмысшылардың табысынан салықтық шегерімдер ұлғаяды. Бұл шамамен 6 млн. адамның жүктемесін азайтуға мүмкіндік береді. Осыған байла-                                                                                   нысты республикалық бюджеттен жеке кірістер мен әлеуметтік салықтардың түсімін жергілікті бюджет шығындарын өтеуге 10,5 млрд. теңге қарастырдық. Оны да республикалық бюджетке енгізетін боламыз. Біздің ойымызша, жаңа қуатты реформа барлық салаларда істейтін жалақысы төмен азаматтарға, қызметшілерге табысын және төлем қабілеттілігін арттыруға мүмкіндік береді,- деді ҚР Еңбек және халықты әлеуметтік қорғау министрі Мадина Әбілқасымова.

- Елдегі әр тұрғын табысының 80 пайызы жалақыдан, 20 пайызы зейнетақы мен жәрдемақыдан тұрады,- деді Бақытжан Әбдірұлы. – Демек, азаматтардың өмір сүру деңгейі еңбекақысына байланысты. Ал айлықты көтеру үшін ел экономикасы қарқынды өсуі керек. Экономикамыз өсетін болса, әрбір кәсіпорын пайда табады. Әр кәсіпорын тапқан пайдасының бір бөлігін жұмысшылардың айлығын көтеруге, екінші бөлігін кәсіпорын өндірісін жандандыруға, қалған бөлігін, әрине, өзінің пайдасына жұмсайды. Талдау нәтижесі көрсеткендей, соңғы жылдары кәсіпкерлер тапқан пайдасын қызметкерлердің айлығын көтеруге емес, өндірісті қайта жандандыруға жұмсаған. Әрине, өндірісті ұлғайтпаса, кәсіпорынның бәсекеге қабілеттілігі төмендейді. Сондықтан Елбасы бұл жолғы Жолдауында да кәсіпкерге қолдау көрсетіп, несие беруді жалғастыру керектігін айтты. Өз кезегінде кәсіпкерлер де жауапкершілікті сезініп, еңбекақыны көтеруі қажет.

ҚР Білім және ғылым министрі Ерлан Сағадиев білім саласындағы өзгерістерге кеңінен тоқталды. Оның айтуынша, алдағы уақытта мұғалімдер үшін де ұлттық тес-тілеу жүйесі енгізілмек. Тестілеуден өткен педагогтің санаты мен жалақысы көтерілетін болады.

- Елбасы биылғы Жолдауында білім саласындағы маңызды бағыттарды анықтады. Президент оқушылар мен ұстаздарға ұдайы назар аударып, қамқорлық көрсетіп келеді. Соның арқасында көптеген маңызды мәселелер шешімін тауып, мұғалімдердің жалақсы көтеріліп, білім сапасы артуда.  Елбасы «Педагог мәртебесі» туралы жаңа заң қабылдауды тапсырды. Бұл заңда педагогтің әлеуметтік мәртебесін көтерумен қатар, оқу жүктемесін азайту, қажетсіз тексеру комиссияларынан қорғау, тиісті емес жұмыстардан босату мәселелері қаралатын болады. Заң жобасы 2-3 айдың ішінде дайындалып, қоғамдық талқылауға түседі. Мұғалімдер мен ата-аналар осы талқылауға белсене қатысады деп сенемін, - деді Е.Сағадиев. Сондай-ақ Білім министрі елімізде балаларды балабақшамен қамту мәселесі шешілгенін, енді бірыңғай оқу бағдарламасын енгізіп, ұстаздардың кәсіби шеберлігін көтеруге мән беру керектігін айтып өтті.

- 3-6 жас аралығындағы балаларды оқытуға арналған бірыңғай бағдарлама бекітілді. Енді біз қысқа мерзімді курстарды ұйымдастырып, мұғалімдерді қайта даярлаймыз. Қазіргі уақытта бұл бағыттағы жұмыстар басталып кетті. Жыл сайын 1000 тәрбиеші сол бағдарлама бойынша курстан өтеді. Алдағы уақытта олардың санын 15 есеге арттыру керек. Мұғалімдер үшін ұлттық тестілеу жүйесін әзірледік. Біліктілік санатын жоғарылатқысы келген педагогтер ұлттық тестілеуден өтуге тиіс. Биыл мамыр айында 60 мыңнан астам мұғалім тестілеуге қатысты. Оның 60 пайызының категориясы көтеріліп, қосымша айлыққа қол жеткізді. Алдағы екі жылдың ішінде бұл жүйені тәрбиешілер мен психологтерге де енгізетін боламыз, - деген еліміздің бас мұғалімі, Елбасы тапсырмасына сәйкес, екі жыл ішінде елдегі балабақшалар мен мектептерді толықтай бейнекамералармен қамтамасыз ету міндеті тұрғанын айтып өтті. Сондай-ақ үш ауысымда білім беруді жою мақсатында ШҚО-да 2,5 млрд. теңгеге 3 мектеп салынғанын, бұл бағытқа алдағы уақытта ел көлемінде қосымша 50 млрд. теңге бөлінетінін жеткізді.

- 2001 жылы Қазақстанда 222 000 мың бала өмірге келсе, былтырғы жылы 400 000 бала дүние есігін ашты. Бұл мектепке деген сұранысты арттырып отыр. Биылғы жылы ғана республикада 110 мектеп салынып, үлкен қаражат бөлінді. Бірақ бұл да жеткіліксіз, - деді Е.Сағадиев.

Білім гранттарының саны 36 мыңнан 66 мыңға өскенін айтқан Білім және ғылым министрі биылдан бастап жоғары оқу орындарының мәртебесін көтеруге баса мән берілетінін жеткізді.

- Студенттерді жұмыспен қамтамасыз ету бойынша рейтинг жасап, зейнетақы аударымдарын ұдайы бақылап отырамыз. Егер жарна уақтылы аударылса, демек, жұмыспен қамтамасыз етілген. Жоғарғы оқу орындары мен колледждердің білім сапасын осы арқылы бағалайтын боламыз. Түлектерде жұмыс болмаса, белігілі бір мамандықтарға деген лицензиясынан айырылады,- деді Е.Сағадиев.

- Мәселе ЖОО-ын жабуда емес, сапасын көтеруде. Кезінде республикада 200 университет болса, қазір 130-ы қалды. Бірінші курсқа бар болғаны 50 талапкер қабылдап, 1000 студентке диплом беретін университеттер бар. Олардың оқытушысы мен зәулім ғимараты жоқ, тек лицензиясы бар. Оқу ақысы төмен. Біздегі көпшілік оқу орындарында үлгерімі төмен студенттер оқудан шығарылмайды. Бұдан арылуымыз керек. Біз сонда ғана бәсекеге қабілетті студенттерді даярлаймыз, - деді Б.Сағынтаев.

Денсаулық сақтау министрі Елжан Біртановтың айтуынша, елімізде 3 мыңға жуық дәрігер жетіспейтін көрінеді.

- Елбасы биылғы Жолдауында тағы да денсаулық сақтау саласына ерекше назар аударып, бірнеше нақты тапсырма жүктеді. Еліміздегі әрбір азаматтың жергілікті емханаға барып, дәрігерді таңдап, әрі қарай тегін медициналық көмек алуға мүмкіндігі бар. Ең маңызды мәселе - дәрігерлер тапшылығын жою және медициналық көмектің сапасын жақсарту. Кадр тапшылығы әлі күнге бар. Елімізде 2800 дәрігер жетіспейді. Осы мәселені шешу үшін бірнеше шаралар енгіздік. Біріншіден, мемлекет тарапынан берілетін гранттар санын көбейттік. Биыл жоғары оқу орындарын бітірген 6000 дәрігер жұмысқа орналасты. Келесі жылдан бастап мемлекет қаражатымен оқыған студенттер міндетті түрде ауылда 3 жыл жұмыс істейтін болады, - деді Елжан Амантайұлы.

Еліміздің бас дәрігерінің айтуынша, қазір дүние жүзінде 10 мыңнан астам ауру түрі болса, Қазақстанда оның 30-ы кең таралған. Бұл халық денсаулығының 80 пайызына әсер етіп отыр. Елбасы тапсырмасына сәйкес, республикада ең көп кездесетін ауру түрлері бағдарламаға енгізіліп, барлық емханалардағы дәрігерлерді қайта оқыту жүзеге асырылуда. Келесі жылы учас-келік дәрігерлер мен мейірбикелер де жаңа бағдарламамен оқытылатын болады.

- ШҚО-да 2260 маман қайта даярлаудан өтті. Елбасы жаңа технологиямен қызмет көрсететін дәрігерлер мен мейірбикелердің жалақысын келесі жылдан бастап 20 пайызға көтеру туралы тапсырма беріп, 5 млрд. теңге қаржы бөлді. 2019 жылдан бастап кезең-кезеңімен дәрігерлерді оқытып, жыл аяғына дейін 40 мың медицина маманы, яғни 10 мың дәрігер және 30 мың мейірбике қосымша айлық алады, - деген денсаулық сақтау министрі Е.Біртанов келесі жылдан бастап әрбір қазақстандық үшін электронды медициналық паспорт жүйесі енгізілетінін және дәрі-дәрмектің елімізде тек бір бағамен сатылатынын да айтып өтті.

-Еліміздің барлық аймағында дәрі-дәрметің бағасы бірдей болады. Арнайы заң әзірленіп, Парламентте қарастырылып жатыр. Сонымен қатар, Жолдауда айтылғандай, Астана қаласында Ұлттық онкология орталығы құрылады. Бұл орталық жаңа технологиялармен қамтамасыз етіліп, ауруларды емдеуде халықаралық деңгейдегі әдістер пайдаланылады, -деді Денсаулық сақтау министрі .

Елдегі тұрғын үй құрылысы туралы Инвестиция және даму министрі Жеңіс Қасымбек баяндама жасады. Оның айтуынша, былтыр Қазақстанда 11 млн. шаршы метрге 103 мың  тұрғын үй салынған. Ал өткен жылы бұл көрсеткіш 110 мың тұрғын үйді құраған.

- ШҚО-да өткен жылы 3 мың 638 баспана салынды. Биыл облыстың жоспары бойынша 410 мың шаршы метр тұрғын үй салынатын болады. Семей қаласында «Нұрлы жер» бағдарламасы аясында салынып жатқан 28, 500 мың шаршы метрді құрайтын тұрғын үй құрылысымен таныстық. 486 пәтер осы жылдың соңына дейін пайдалануға беріледі. Мемлекет басшысының тапсырмасы бойынша, алдағы 5 жылдың ішінде 650 мың баспана салуымыз керек. Ол 76 млн. шаршы метрді құрайды. «7-20-25» бағдарламасымен 5 жылдың ішінде 103 мың қазақстандық отбасы тұрғын үй сатып алуға мүмкіндік алады. ШҚО тұрғындарынан аталмыш бағдарлама бойынша несие алуға 187 өтініш келіп түсті, оның 125-і қолдау тапты, - деді Инвестиция және даму министрі.

Сондай-ақ Жеңіс Махмұдұлы Мемлекет басшысының тапсырмасымен ауылдарды таза сумен қамтамасыз ету үшін 100 млрд. теңге бөлінгенін, бұл елді мекендерді 80 пайыз сапалы ауыз сумен қамтуға және халықтың тұрмыс тіршілігін жақсартуға ықпал етіп отырғанын, сонымен қатар 2018 жылы ШҚО-да қалаларды және ауылдарды сумен қамтамасыз ету бағытындағы жол жөндеу жұмыстарын 44 жобаға 13 млрд. теңге бөлінгенін айтып өтті.

- 2015 жылдан бастап Нұрлы жол бағдарламасы басталды. Осы екі жарым жыл ішінде 2400 республикалық маңыздағы жолдар жөнделді. Алдағы 2,5 жыл ішінде 4600 шақырым болатын 24 жоба толығымен іске асып, 7000 шақырым жаңа жолдар салынады. Оның көбі ШҚО арқылы өтеді. Осы жылы Павлодардан Семейеге, Семейден Қалбатауға апаратын жол жөндеу жұмыстарын толығымен аяқтаймыз. ШҚО- да жол құрылысына қатысты үлкен жобаларды бастадық. Талдықорған – Аягөз - Қалбатау, Қалбатау- Өскемен, Өскемен-Майқапшағай бағытындағы жолдар жөнделеді. Келесі жылы 10 мың, 2020 жылы 15 мың адам жұмыспен қамтамасыз етілетін болады. Жоба 2020-2021 жылдары аяқталады. Жергілікті жолдарды жөндеуге республикалық және облыстық бюджеттен 150 млрд. теңге бөлінеді. ШҚО-ның жергілікті жолдарын жөндеуге келесі жылы 7,3 млрд. теңге қаражат бөлу көзделген. Оның 3,7 млрд. теңгесі республикалық бюджеттен. Индустриялық саясатты іске асыру бағдарламасы 2009 жылы басталды. ШҚО-да металлургия, машина жасау және т.б. салалар қарқынды түрде дамуда. 57 жоба пайдалануға берілді. 7 мыңнан астам жаңа жұмыс орны ашылды. «Ақтоғай» жобасын қоспағанда, облысқа 224 млрд. теңге инвестиция салынды,- деді Ж.Махмұдұлы.

Атамекен ұлттық кәсіпкерлер палатасының төрағасы Абылай Мырзахметовтың айтуынша, Елбасы Жолдауына сәйкес, елімізде шикізаттық емес өндіріс саласын дамытуға 600 млрд. теңге бөлінген.

- Елбасы халық тұтынатын негізгі тауарларды өзімізде шығарып, халыққа жағдай жасау туралы тапсырма берді. Ол үшін 600 млрд. теңге бөлінді. Елімізге көп тауарлар шетелден әкелінеді. Теңгенің бағасы түскен сайын, импорттық тауардың  бағасы да көтеріледі. Семейде 50-ден астам халыққа қажетті тауарлар шығаратын кәсіпорындарды паспорттадық. Оның 9-ы тамақ өнеркәсібі болса, 7-еуі - киім тігетін цехтар. Семейдің киім тігіп, былғары өндіруге мүмкіндігі бар, - деді А.Мырзахметов.

Елдегі 60 мыңға жуық кәсіпкердің мойнында 150 млрд-қа жуық әртүрлі салық айыппұлдары бар. Елбасы тапсырмасына сәйкес енді кәсіпкерлер бұл айыппұлдардан босатылады.

- Егер кәсіпкер өзінің нақты салығын төлесе, айыппұлдары алынып тасталады. Бұл Елбасы тарапынан кәсіпкерлерге көрсетіліп отырған үлкен көмек. Кәсіпкерлердің де жауапкершілігін мойнына алатын кез келді. Олар еңбеккерлердің айлық жалақысын көтеріп, жұмыс орындарын көбейтуге, сапалы тауар өндіруге күш салулары қажет. Отандық кәсіпкерлер өндірген өнімді сауда орталықтарында өткізу үшін арнайы заң дайындалып жатыр. Енді ешқандай салықсыз тікелей сауда орталықтарына жеткізілетін болады, - деді «Атамекен» ұлттық кәсіпкерлер палатасының төрағасы Абылай Мырзахметов.

Айта кетейік, жиында сөз сөйлеген қаламыздағы белді кәсіпкерлердің бірі Әсемқан Досқожанов Елбасы қойған міндеттерді орындай отырып, жұмысшыларының төменгі жалақысын 50 пайызға көбейтетінін жеткізді.

Р.S. Сонымен, Семейдегі іссапарында ҚР Премьер-министрі Бақытжан Сағынтаев та, Үкімет басшысымен бірге келген министрлер де қазақша сөйледі. Қазақтың рухани астанасының, Абай мен Шәкәрім туған текті топырақтың мысы басты ма, кім білсін, тіпті жай уақытта орысшаға жақындау тұратын Білім және ғылым министрі Ерлан Сағадиев та бұл сапарында мемлекеттік тілде сөйлеуге тырысты. Елбасының «Үкімет қазақша сөйлесін!» деген ескертпесі билік назарынан тыс қалмағаны байқалып тұр.

Өкінішке орай, қазақтың рухани астанасы, алаштың отаны деп кеуде керетін семейліктерді Үкімет алдына үкілеп ортаға шығарып, сөз берген белсенділеріміз қызартты. Пофессор Арап Еспенбетовтен басқалар... Араларында мектеп директоры бар, депутаты бар, кәсіпкері бар, әйтеуір, ортаға шыққандар Абайдың емес, Пушкиннің тілінде сөйледі.

Құралай ҚАЙЫРЖАНҚЫЗЫ,

Жадыра ТӨЛЕГЕНҚЫЗЫ, «Семей таңы»

ҚОНЫС ТОЙЫН ТОЙЛАЙТЫН КҮН ЖАҚЫН

Көп ұзамай «Қарағайлы» ықшам ауданында алғашқы 486 пәтерлік 8 үй Қазақстан тұрғын үй құрылыс жинақ банкінің (ҚТҚЖБ) салымшыларына қолданысқа берілмек. «Нұрлы жер» мемлекеттік бағдарламасы аясында салынған үйлердің алғашқы 153 пәтеріне өтініштерді қабылдау осы жылдың 1 қазанында басталған, ал қалған 333 пәтер жыл аяқталғанша беріледі деп жоспарлануда.

Өткен апта соңында Семейдегі Тұрғын үй құрылыс жинақ банкі филиалының директоры Равиль Сәбитов банк салымшылары мен бұқаралық ақпарат құралдары үшін пресс-тур ұйымдастырды. Шара барысында филиал басшысы жаңа ауданда салынған баспаналарға қол жеткізудің амал-шарттары жайында бүге-шігесіне дейін баяндап, жақын арада пайдалануға берілгелі отырған тұрғын үйлердегі пәтерлерді көрсетіп, аралатты.

- Семей картасынан «Қарағайлы» ауданы үшін 203 гектар жер бөлінді. Мұнда жалпы көлемі 700 мың шаршы метрден астам тұрғын үйді қолданысқа беру көзделіп отыр. Бұл - шамамен 90 үй. Банк салымшыларына арналған барлық үйлердің бір шаршы метрі 140 мың теңгеден аспайды. Осы орайда айта кетейін, «Нұрлы жер» бағдарламасы шеңберінде пәтерлерді сатып алушылар пулына қатысу жолдары туралы «baspana.kz» порталынан білуге болады. Осы сайттан өзіңізге ұнаған пәтерді таңдап, өтініш қалдыра аласыз,- деді Тұрғын үй құрылыс жинақ банкінің Семейдегі филиалының директоры Р.Сәбитов.

Равиль Сәбитовтің сөзіне қарағанда, Тұрғын үй құрылыс жинақ банкінің клинеттеріне жоғарыда аталған мемлекеттік бағдарламаға қатысуы үшін есепшотында тұрғын үй құнының 20 пайызы болса жеткілікті. Жиырма бес жылға дейінгі мерзімге берілетін қарыздың жылдық пайыздық мөлшерлемесі 5 пайызды құрайды екен. Несие бойынша ең төменгі төлем 32 566 теңге.

- Пулдарға ҚТҚЖБ-ның барлық салымшылары қатысуға құқылы. Тек мемлекеттік бағдарлама талаптарына сай болу керек. Қазақстан Республикасының азаматтығы немесе оралман статусы бар, сондай-ақ соңғы бес жылда республика аумағында меншігінде тұрғын үйі жоқ (үміткердің де, онымен бірге тұратын отбасы мүшелерінің де) және несие төлеуге қабілетті үміткер ғана «Нұрлы жер» бағдарламасы бойынша пәтерге қол жеткізе алады,- деп нақтылап өтті филиал директоры.

Пулға өту үшін барынша көп балл жинау қажет. Балл саны депозиттің дер кезінде толтырылып отыруына және оның ашылу уақытына тікелей байланысты. Депозит қаншалықты ерте ашылса және уақытында қаражат салынып отырса, балл соншалықты жоғары болмақ. Балл арнайы бағдарлама арқылы есептеледі.

- Көп қабатты тұрғын үйдің бірінші қабатындағы барлық пәтерлерді аралап, көріп шықтық. Бір көргендегі әсерім жақсы, бағдарлама шарттары, үйдің сапасы көңілімнен шығады. Бірнеше жылдан бері Тұрғын үй құрылыс жинақ банкі депозитіне қаражатымыздың бір бөлігін аударып отырмыз. Жуықта баспаналы болып, қоныс тойын тойлаймыз деген үміттемін. Балаларымның балдай балалық шағы осындай инфрақұрылымы дамыған, болашағы зор шағын ауданда өтсе арманым жоқ,- дейді қала тұрғыны Ләззат Әлекенова.

Семейде «Өңірлік тұрғын үй» бағдарламасы да сәтті жүзеге асырылуда. Аталған бағдарламаға қатысқан Тұрғын үй құрылыс жинақ банкінің 430-ға жуық салымшысы өз баспаналарына ие болып, қоныс тойын тойлап үлгерген. Қазір 78 пәтер сатылымда тұр. Бұл бағдарламаға қатысу үшін салымшы есепшотына үйдің 20 пайыз бастапқы жарнасын салуы қажет, ал қарызды жылдық 7 пайыздық мөлшерлемемен алуға болады. Бір ерекшелігі – бұған ҚТҚЖБ-ның кез келген салымшысы қатыса алады, ешқандай шектеулер жоқ.

Жібек СЕРҒАЗЫ, «Семей таңы»

СЕНАТОРЛАР СЕМЕЙДЕ

Осы апта басында Қазақстан Республикасы Парламенті Сенатының Халықаралық қатынастар, қорғаныс және қауіпсіздік комитетінің төрағасы Дариға Назарбаева бастаған комитет мүшелері Шығыс Қазақстан облысына жұмыс сапарымен келді. Іссапардың бірінші күнінде олар облыс орталығына ат басын бұрып, «Шығыс» өңірлік қолбасшылығы басқармасында, Ұлттық ұланның 5518 бөлімінде, Күршім шекара отрядында болды. Сондай-ақ Майқапшағай өткізу бекетінің жұмысымен танысты.

10 қыркүйек күні 2535 әскери бөлімінің Күршім шекара отрядында Сенат комитетінің отырысы өтіп, оған аймақ басшысы Даниал Ахметов, республиканың Ұлттық қауіпсіздік комитетінің шекара қызметінің, Қорғаныс министрлігінің, Ішкі істер министрлігі Ұлттық ұланының басшылығы, шекаралық аудандар әкімдері қатысты. Мұнда мемлекеттік шекараның шығыс шебіндегі қазіргі ахуал, әскери қызметшілердің әлеуметтік-тұрмыс жағдайын жақсарту жөнінде сөз болды. Отырыс барысында Ұлттық қауіпсіздік комитеті төрағасының орынбасары, Шекара қызметінің директоры Дархан Ділманов қаржыландыруға қатысты мәселені көтерді. Айтуынша, шекарашыларға 1 миллиард 94 миллион теңгеге жуық қаржы керек. Аталған қаражат Қазақстан мен Қытай арасындағы мемлекеттік шекараның Шығыс Қазақстан облысы аумағынан өтетін бөлігінің бойында орналасқан бөлімшелердің инфрақұрылымдарын дамытуға жұмсалмақ.

Жиында сөз сөйлеген сенаторлар Төлеубек Мұқашев, Серік Жақсыбеков, Мұхтар Құл-Мұхаммед, Талғат Мұсабаев, Нұржан Нұрсипатов өзекті деген бірқатар мәселелердің басын ашты. Олар мемлекеттік шекараны күзету және қорғау, қорғаныс және ұлттық қауіпсіздік мақсаттары үшін жер телімдерін рәсімдеу, шекаралық аймақтарды дамыту және әлеуметтік инфрақұрылыммен қамтамасыз етуге бағытталған кешенді мемлекеттік бағдарлама қабылдау, сондай-ақ саудаға қатысты кейбір шектеулерді алып тастау, валюталық шектеуді жұмсарту қажеттігін тілге тиек етті.

Өз кезегінде ҚР Парламенті Сенаты Халықаралық қатынастар, қорғаныс және қауіпсіздік комитетінің төрағасы Дариға Назарбаева көшпелі отырыстың қорытындысы бойынша ұсыныстар әзірленіп, Үкіметке жіберілетінін, қаралған барлық мәселелер депутаттардың бақылауында болатынын атап өтті.

Сенаторлардың шығыс аймағындағы сапары Семей қаласында жалғасын тапты. Қыркүйектің 11-і күні Комитет төрағасы бастаған топ қаладағы 54835 әскери бөлімінің авиабазасына келіп, Ми-7, Ми-17, Ми-24 және Си-145 сынды әскери және азаматтық техникалардың үлгілерімен танысты. Мұндағы жаңа техника - Eurocopter Ec145 тікұшағы. Бұл - Қазақстанда құрастырылған еуропалық өнім. Аталмыш техника әскери, антитеррористік, сонымен бірге бейбіт мақсаттарда қолданылады. Авиабазада өткен сенаторлармен кездесу кезінде кешенді ғимараттың болмауы, авиациялық техникалар тұрағын күрделі жөндеуден өткізу, ұшқыштарды дайындауға арналған жаттығу құралдарының жоқ болуы сияқты маңызды проблемалар көтерілді.

Осыдан соң сенаторлар «Шы-ғыс» өңірлік қолбасшылығы штабында болып, Шығыс Қазақстанның әскери қорғаныс әлеуеті жөніндегі мәселені талқылады. Кейін делегация мүшелері «Семей Инжиниринг» АҚ-ға, 28738 әскери бөлімге келіп, нысандардың жай-күйін білді.

- «Семей Инжиниринг» кәсіпорны үнемі даму үстінде болады. Өйткені біздегі танк паркі ауқымды, әрі әрбір техника уақыт өте келе сынады, ескіреді. Негізі, танкілерді жөндеуге үш жыл уақыт кетеді. Бұл, әрине, тым ұзақ. Осы ретте Комитет төрағасы Дариға Назарбаева осы зауыттағы әскери техникаларды жөндеу мерзімін қысқартуды мақсат етіп отыр. Семейдің өндірістік базасы кез келген әскери техниканы жөндеуге қауқарлы,- дейді сенатор Талғат Мұсабаев.

Нысандарды аралау барысында Сенат депутаттары әскери қызметшілердің дайындығы мен әскери бөлімдердің материалдық-техникалық жабдықталуы жоғарғы деңгейде екенін ерекше атап өтті.

Жібек СЕРҒАЗЫ, «Семей таңы»

БІЗДІҢ МАҚСАТ – МЕМЛЕКЕТТІК ҚЫЗМЕТШІЛЕРДІ ЫНТАЛАНДЫРУДЫҢ ЖОҒАРЫ ДЕҢГЕЙІНЕ ҚОЛ ЖЕТКІЗУ

Ұлт жоспары - «100 нақты қадамның» кіріспесінде оның қоғам мен мемлекеттегі түбегейлі өзгерістерді қалыптастыратыны айтылған, олардың басты мақсаты жүйелі аурулардың сыртқы белгілерін жуып-шаю емес, оны емдеу болып табылады.

Дамыған 30 елдің қатарына кіруге жол ашатын, кәсіби мемлекеттік аппараттың қалыптасуына бөгет болатын осындай жүйелі мәселелердің бірі халыққа тиімді және адал қызмет ету идеясын құнсыздандыратын мемлекеттік қызметшілердің еңбекақы деңгейінің жеткіліксіз дәрежедегі бәсекеге қабілеттілігі болып табылады.

Бұл - мемлекеттік аппарат қызметкерлерінің кәсіби дәрежесінің төмен деңгейінің және олардың жемқорлыққа ұшырау себептерінің бірі.

Мемлекет басшысының тапсырмасымен біз осы мәселені шешудің кешенді амалдарын қарастырдық.

Біріншіден, кадрларды іріктеу және жоғарылату барысында біліктілік тәсілі енгізілді. Маманның білім деңгейін ғана емес, сонымен қатар оның өз білімін күнделікті қызметте қалай қолданатынын және осыған қажетті дағдылары мен қабілеттерінің болуын анықтаудың маңыздылығымен келіспеу мүмкін емес. Нәтижелі жұмыскер болу үшін теориялық білім жеткіліксіз. Мысалға, көшбасшылық саласындағы маман әрқашан көшбасшы болуға қабілетті емес.

Екіншіден, мемлекеттік органдардың қызметшілерін бағалау жүйесін қайта қарастыру іске асырылды. Бұл жүйенің кемшіліктері айқын. Мемлекеттік қызметшінің атқаратын жұмысының нәтижелілігі оның ұйымның стратегиялық жоспарын жүзеге асыруға қосқан жеке үлесіне әділ баға беруге мүмкіндік бермейтін ресми көрсеткіштерге орай анықталды.

Біз маманның кәсіби қалыптасуын ғылымға негізделген тексеру жүйесін енгізу арқылы осы және басқа кемшіліктерді жойдық. Бұл жүйенің сапасы «Б» корпусының әкімшілік мемлекеттік қызметшілерін кешенді аттестаттау барысында сыналды.

Мемлекеттік органдардың қызметшілерін қаржылық ынталандыруды күшейту қажет болды.

Мемлекеттік қызметшілердің еңбекақысын олардың қызметінің нәтижелеріне байланысты көтеру Ұлт жоспарында көрініс тапқан түйінді міндеттердің бірі екендігі белгілі. Оны шешу Мемлекет басшысының біздің барлық жұмысымыз халықтың табыс деңгейін арттыруға бағытталуы тиіс деген нұсқауы тұрғысында айрықша өзектілікке ие болады.

Ол үшін еңбекақы төлеудің жаңа жүйесі әзірленді, пилоттық режімде Агенттікте, Әділет министрлігінде, Астана қаласының және Маңғыстау облысының әкімдіктерінде енгізілді.

Ол екі бөліктен тұрады: факторлы-балдық шкала негізінде анықталатын «тұрақты» және бір жыл ішінде атқарған жұмыс нәтижелері бойынша кем дегенде 4 жалақыдан жоғары бонус төлеуге байланысты «ауыспалы».

Пилоттық жобаның мәні неде? Жаңа жүйенің үш айқындаушы факторы бар. Ол құзыреттілік пен жұмыс тәжірибесі, шешілетін міндеттердің ауыртпалық деңгейі және нәтижеге қол жеткізу үшін жауапкершілік деңгейі.

Аталған факторлар бойынша «ұпайлар» жиынтығы еңбекақы төлеудің жаңа кестесіндегі лауазымның орнын айқындайды. Ол 4 блокқа біріккен: жауапты хатшылар, аппараттардың басшылары мен комитеттердің төрағалары кіретін жоғары басқарушы, негізгі, жәрдем беруші және қосалқы.

Қызметінің тиімділігі ұйымның стратегиялық мақсаттарға қол жеткізуі үшін түйінді болып табылатын негізгі салалық бөлімшелердегі жұмыс, әрине, жәрдем беруші және қосалқы құрылымдардағы жұмыспен салыстырғанда әлдеқайда жоғары төленетін болады.

Еңбекақы төлеудің жаңа жүйесін енгізу не береді?

Біріншіден, материалдық ынталандырудың пәрменді тетігі құрылады. Біз бірінші рет, жұмыстың сипатына, ауыртпалық деңгейіне және тиімділігіне қарамастан, барлығы тең дәрежеде жалақы мен сыйақы алатын теңестірілген тәсілден бас тартамыз.

Мысалға, мемлекеттік органның стратегиялық мақсаттарына қол жеткізуде маңызды рөл атқаратын департаментінің сарапшысы, құжаттарды тіркеу мен жіберу бойынша міндеттерді атқаратын канцелярия бөлімінің маманымен бірдей еңбекақы алады. Біреуі тиімді басқарушылық шешімдерді тұрақты іздеумен айналысса, екіншісі әзірленген дайын алгоритм шеңберінде әрекет етеді. Сыйақыға байланысты жағдай да осындай.

Яғни, әділеттіліктің негізгі қағидасы бұзылады.

Екіншіден, жаңа модельді қолдану аймақтардағы және орталықтағы мемлекеттік қызметшілердің жалақысындағы үйлеспеушілікті 70%-дан 10%-ға дейін түбегейлі қысқартуға мүмкіндік береді. Ол «орталық – аймақ - орталық» қағидасы бойынша кадрлар айналымы тетігін тиімді қолдануға мүмкіндік береді.

Үшіншіден, осы жолмен біз мемлекеттік қызметті әсіресе талантты жастар үшін еңбек нарығындағы тартымды, бәсекеге қабілетті ойыншы ретінде таныстыра аламыз. Бүгінгі күннің өзінде пилоттық органдардағы мемлекеттік қызметшілердің жалақысы екі есе артты. Ол еңбекке деген қатынасты түбегейлі өзгертеді, яғни заманауи адамды жетістікке жетелейтін жасампаздық пен көшбасшылыққа шақырады. Әрине, санаулы айлар ішінде мемлекеттік қызметшілерді материалдық ынталандырудың үздік моделі құрылады деп есептеу қателік болар. Сол себепті бұл жобаны жүзеге асырудың барлық мәселелік жақтарын талдап, әрі қарай оны барлық мемлекеттік аппарат ауқымында іске қосу үшін пилоттық режімде енгізілді.

Пилоттық жобаның аралық нәтижелері қызметшілердің адал және тиімді еңбек етуге талпынысын, сонымен қатар бәсекенің артуын көрсетіп жатқанын атап өткен жөн. Өткен жылмен салыстырғанда кадрлардың ауысуы шамамен 3 есеге азайды, ал Әділет министрлігінде ағымдағы жылы мемлекеттік қызмет жүйесінен бірде-бір адам кетпеген.

Бір орынға жарияланған байқауға үміткерлер саны 55, ол мемлекеттік қызметтің тартымдылығы мен абыройының артуын дәлелдейді. Реформаның жоғары тиімділігінің маңызды көрсеткіштерінің бірі пилоттық жобаны жүзеге асыруға қатысатын мемлекеттік органдардан сұрастырылған жұмысшылардың 95% оның нәтижелеріне қанағаттануында.

Факторлық - балдық шкала шеңберінде жалақының артуына қарамастан, ағымдағы жылы Агенттіктің штат санын толықтыруға мораторий жүргізу арқылы орталықта 30% және аймақтарда 10% оңтайландырдық, бұл орталық аппараттың орындаушылық сатысындағы қызметшілердің жалақысын 60%-ға, аймақтық департамент қызметшілерінің жалақысын 10%-ға арттыруға мүмкіндік берді.

Бұл бағыттағы келесі қадам кадр қызметтерінің жұмысын қолданыстағы «Е-қызмет» ақпараттық жүйесі негізінде жалпы қызмет көрсету орталығының үлгісіне ауыстыру болды.

Шетелдік және отандық тәжірибе көрсеткендей, жеке компаниялар мен мемлекеттік мекемелердің адамзаттық капиталы сапасын айтарлықтай арттыруға қол жеткізу, сонымен қатар HR-саясат саласында шығындарды азайту қызметкерлерді басқарудың интеграцияланған жүйесін құру арқылы қамтамасыз етіледі. Ол - қызмет көрсету орталығының жалпыға ортақ модельдерінің бірі. Мысалы, Нидерландыда қызметкерлерді басқару саласында қызмет көрсететін осындай орталықты құру мемлекеттік мекемелердің аталған қызметті атқаратын жұмыскерлер санының 50 пайызға қысқаруына және 250 млн. АҚШ доллары көлеміндегі қаражаттың үнемделуіне алып келді.

Біздің жобаны жүзеге асыру HR-үрдістеріне жұмсалатын шығынды қысқартуға мүмкіндік береді.

Қызметкерлерді басқарудың интеграцияланған жүйесінің жұмыс істеуі шеңберіндегі кадрлық іс жүргізуді орталықтандыру мемлекеттік органдардың құрылымы мен қызметшілерін оңтайландырудың сапалы жаңа кезеңінің бастамасы болмақ. Біздің есебіміз бойынша, аталған модельді барлық мемлекеттік қызмет ауқымында қолдану кадр бөлімдерінің қызметкерлерін және жалақы төлеу бойынша бухгалтерлерді шамамен 4600 қысқартып, жыл сайын 5,5 млрд. теңге үнемдеуге алып келеді.

Оңтайландыру бойынша кешенді жұмыс мемлекеттік қызметшілердің еңбекақысының жаңа жүйесін енгізу бойынша жобаға қатысатын әкімдіктерде де жүргізілуде.

Осылай, өзгертудің арқасында Астана әкімдігі басқармаларының саны 30-дан 21-ге дейін қысқарды. Артық басқарушылық құрылымдар оңтайландырылды, қосарланушылық жойылды. Агенттікке ұқсас қызметшілерді басқарудың бірыңғай қызметі, сонымен қатар бақылау саласында Бірыңғай орган құрылды. Халықпен кері байланыс құруға арналған «I-komek» бағдарламасы іске қосылды.

Маңғыстау облысында басқарушылық құрылымдарды оңтайландыру, бизнес-үрдістерді автоматтандыру жүргізілуде, аудандар қағазсыз құжат алмасу жүйесіне ауысуда.

Бақылау-қадағалау міндеттерінің қысқаруы, қосарланушы міндеттердің жойылуы, міндеттерді бәсекелі ортаға жіберу және әрі қарай цифрландыру мемлекеттік органдардың құрылымдары мен штат санының оңтайландырылуына, мемлекеттік қызметшілердің еңбекақысын арттыруға арналған қажетті қаржы қорының пайда болуына әкеледі.

Лауазымдары қысқартылатын мамандарды әлеуметтік қорғау мақсатында біз бейінді мемлекеттік органдармен бірлесіп оларды қайта оқыту және әрі қарай жұмыспен қамтамасыз ету мәселесін шешудеміз.

Жалпы факторлы-балдық шкаланы енгізу бойынша жұмысты мемлекеттік органдарда шығындарды оңтайландыру есебінен қарастырылатын қаржының болуын есепке ала отырып, кезең-кезеңімен өткізу қарастырылған. Соның өзінде Президенттің 2007 жылғы 29 наурыздағы «Әкiмшiлiк реформаны одан әрі жүргізу жөнiндегi кейбір шаралар туралы» Жарғысына сәйкес еңбекақы төлеудің қолданыстағы қорының бюджетке қайтаруды қажет етпейтіндігін, яғни мемлекеттік органдардың теңгерімінде қалдырылатындығын ескертіп өткен жөн.

Мансаптық модельді құрудың әлемдік тәжірибесі бойынша мемлекеттік қызметшілерге қойылатын талаптарды арттырумен қатар, олардың әлеуметтік қорғалуының деңгейін де арттыру қажет. Сол себепті қазіргі уақытта Президент Әкімшілігінің қолдауымен Агенттік мемлекеттік қызметшілерді әлеуметтік қамту деңгейін жақсарту бойынша шаралар әзірлеуде.

Баспаналы болу және зейнетақы тағайындау, балабақшаларда орындармен қамтамасыз ету, аймақтарда денсаулықты қалыпқа келтіру үшін жағдайлар жасау барысында жеңілдіктер ұсыну сөз болып отыр.

Мемлекеттік қызметшілердің әлеуметтік жағдайларын жақсартуға Мемлекет басшысының 5 әлеуметтік бастамасын, оның ішінде «7-20-25» бағдарламасын жүзеге асыру маңызды серпіліс бермек. «Қазақстанның тұрғын үй құрылыс банкі» АҚ-мен бірлесіп, әскери қызметшілер мен арнайы органдардың қызметшілеріне арналған бағдарламалар сияқты, әкімшілік мемлекеттік қызметшілерге арналған «5-5-25» ипотека мәселесін әзірлеу шаралары басталды.

Жаңа еңбекақы жүйесін қосқанда, мұның барлығы мемлекеттік қызметшілердің ынтасын айтарлықтай арттыруға мүмкіндік беретін болады.

Мемлекеттік қызметшілердің жалақысын орташа деңгейде екі есе арттыру бойынша реформаны толыққанды жүзеге асыру 220 млрд. теңге қосымша қаржыны талап етеді. Қаражат мөлшері ауқымды, бірақ оны тіпті бюджетке ауыртпалық түсірмей-ақ қарастыруға болады.

Аталған жұмыс Ұлттық экономика министрлігінде Агенттікпен бірлесе Мемлекет басшысының мемлекеттік органдар мен ведомстволық бағынышты ұйымдарды оңтайландыру мен нығайту туралы тапсырмасы аясында орындалып жатыр. Біз бастапқы кезеңде бос жұмыс орындарын қысқартуды дұрыс деп есептейміз. Олардың мөлшері шамамен 12 мың. Ол бірден 13 млрд. теңгені бөлуге мүмкіндік береді.

Бағынысты ұйымдарды оңтайландыру тұрғысынан, олардың ұйымдық-құқықтық нысанын коммуналдық мемлекеттік мекемеден (КММ) коммерциялық емес акционерлік қоғамға (КЕАҚ) өзгерту тиімді шаралардың бірі болып табылады.

КЕАҚ форматында жұмыс істеудің негізгі артықшылығы - басқарудың икемділігі, бюджетті бөлудегі тәуелсіздік, қызметкерлерді бәсекеге қабілетті жалақымен қамтамасыз ету және қызметкерлер санының азаю мүмкіндігі.

Мысалы, осы өзгерістің нәтижесінде Астана әкімдігі балалар үйінің басшылығы қаржы-шаруашылық қызметінің ашықтығын арттырды. Салдарынан 90 млн. теңгеге үнемділік жасалып, өрт қауіпсіздігі жүйесін жетілдіруге, үй-жайларды жөндеуге және жылумен қамтамасыз ету инфрақұрылымын жақсартуға, биометриялық қол жеткізу жүйесін енгізуге бағытталған.Ең бастысы, қолда бар бюджетпен қызметкерлердің жалақысын 3-4 есеге көтеру мүмкіндігі болды. Егер бұрынғы еңбекақы 33-тен 120 мыңға дейін болса, бүгінгі күні 120-дан 450 мыңға дейін жетіп отыр. Астаналық балалар үйінде жүргізілген мұндай жұмыс басқа мемлекеттік мекемелер үшін үлгі бола алады деп ойлаймын.

Жоғары ынталанған мемлекеттік қызметші, өзінің мансаптық және материалдық келешегінің тұтас және толығымен ұйымның мақсаттарын жүзеге асыруға қосқан өз үлесіне, әлеуеті мен жеке қасиеттеріне баға беруге тәуелді екеніне сенімді болған жағдайда өзінің абыройын бағалап, әрқашан өзінің кәсіби білімі мен дағдыларын дамытуға талпыныс жасайтыны ешбір күмән туғызбайды. Бұл - біздің атқаратын еңбегімізден күтілетін нәтиже.

Алик ШПЕКБАЕВ, Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы.

ТЫҢ СЕРПІН, СОНЫ ЛЕП

Семей қаласының Шәкәрім атындағы мемлекеттік университетінің қазақ филологиясы факультетінде «Жаңа гуманитарлық білім. Қазақ тіліндегі 100 жаңа оқулық» жобасына қатысты семинар болып өтті. Семинарға университет оқытушылары, студенттер мен магистранттар қатысты.

Қазақ филологиясы факультетінің деканы Айбар Қадыров семинардың көтерген тақырыбына қатысты өз ойын білдірген соң, қазақ әдебиеті кафедрасының меңгерушісі философия докторы (PhD) Арай Қанапияқызы Жүндібаева сөз алды.

- 13 сәуірде арнайы жарық көрген 18 кітаптың таныстырылымы болды. Оны Ұлттық аударма бюросы қамтамасыз етті. Осы оқулықтармен жұртшылықты таныстыруға арналған іс-шаралар өз жалғастығын табуда. Біз де осы ортақ іске өз үлесімізді қосып, семинарлар циклін өткізбекпіз, - деді Арай Қанапияқызы. - Мемлекет басшысының «Рухани жаңғыру» бағдарламасы аясында, 100 оқулықты аудару үшін, өткен жылы Ұлттық аударма бюросы құрылып, маусым-шілде айларында еліміздегі жоғары оқу орындары мен жастар ұйымдарынан, қоғамдық-мемлекеттік мекемелерден қандай   кітаптарды  тәржімалау керектігіне байланысты түскен жазбаша ұсыныстар бойынша тізім жасалды. Енді сол тізімге енген 18 оқулық жұрт назарына ұсынылып отыр. Біз де бұл шарадан тыс қалмай, таяуда Тель-Авив кибернетика университетінің зертхана жетекшісі, нанотехнология саласының маманы Рои Тцезанның «Болашаққа жолнұсқау» («The Guide to the Future») кітабын қазақ тіліне аударып, Астанада қалың жұртшылық назарына 3D форматында ұсындық. Елордалықтарға, бұдан бөлек, Шәкәрім атындағы СМУ ректоры Мейір Ескендіровтің басшылығымен дайындaлған «Латынға төте жол» әдістемелік құралы да таныстырылды. Бұл кітаптарды 100 оқулық аясында шектеуге болмайды. Оның соңы 200-ден де асып кетуі ықтимал. Осы аударма оқулықтар білім нарығында тың серпілістер әкеледі деген үміттеміз.

Жиналған зиялы қауым осы игі шараның қазақ ғылымы мен білім беру саласына сіңірер зор үлесін ұғына алды. Бұл семинар осымен тоқталып қалмайды. Қазақ филологиясы факультеті ары қарай да Елбасымыздың «Рухани жаңғыру» бағдарламасы аясында қала ұстаздары мен студенттері арасында түрлі басқосулар ұйымдастырып, кең көлемді ағартушылық жұмыстар жүргізетін болады.

Семинар жұмысын қорытындылаған қазақ филологиясы факультетінің деканы Айбар Қадыров оқытушыларды, студенттер мен магистранттарды «Рухани жаңғыру» бағдарламасын жүзеге асыруға үлес қосуға шақырды.

Серік ӘБІЛҚАСЫМҰЛЫ, «Семей таңы»

 

Еще статьи...