Авторизация



Кто на сайте

Сейчас 107 гостей онлайн
ОФИЦИАЛЬНЫЙ WEB-САЙТ АКИМА ГОРОДА СЕМЕЙ
  • Семей қалалық соты мен медиацияны дамыту орталығы ынтымақтастық туралы меморандумға қол қойды

    Семей қалалық сотының төрағасы Н.Б.Әбдікәрімов пен Астана қаласының «Медиацияны дамыту орталығы» Республикалық қоғамдық бірлестігінің Шығыс Қазақстан облысы бойынша Семей қаласының өкілі Б.Д.Кенжина жанжалдарды шешудің медиация және басқа да балама әдістерін дамыту мақсатында ынтымақтастық туралы меморандумға қол қойды.

  • Жүлделі орынмен қайтып келді!

    Семей қаласының облыстық балалар биологиялық орталығының оқушылар командасынан құралған 2 жас натуралистер Жунусова Ляззат Кайратовнаның жетекшілігімен №17 ЖОББМ оқушысы Киякпаева Дильназ, Вощакина Дарья Николаевнаның жектекшілігімен № 1 ЖОББМ оқушысы Жерздева Екатерина 2018 жылдың 17 қарашасы Өскемен қаласында өткен «Таза қоршаған орта - «Қазақстан – 2030» стратегиясын жүзеге асыру негізінде» «Дарын» облыстық өңірлік ғылыми – практикалық орталығының бағыты бойынша облыстық байқауына қатыст

  • «Отбасы мен әйелдердің құқықтарын қорғау» атты пікірталас өткізілді

    Орталықтандырылған кітапхана жүйесінде жастардың құқықтық білім деңгейін арттыру, гендерлік мәдениетке тәрбиелеу мақсатында Радиотехника және байланыс колледжінің 1-2 курс студенттерімен «Отбасы мен әйелдердің құқықтарын қорғау» атты пікірталас өткізілді.

Яндекс.Новости: Казахстан

Курсы валют: курс доллара, курс евро

Купи-Продай

Случайная новость

Разъяснены основные направления

Информационно-пропагандистские группы проводят  встречи с населением с целью пропаганды и информирования по Посланию Президента народу «Казахстан в глобальной реальности: рост, реформы, развитие». Очередная встреча прошла с коллективом консультативно-диагностического центра г. Семей.

Выступая по основным направлениям Послания, член ИПГ, преподаватель финансово-экономического колледжа имени Р. Байсеитова Артур Искаков остановился на международной экономической обстановке, ее влиянии на экономические показатели Казахстана, а также на антикризисном плане, предложенном главой государства для успешного преодоления кризиса.

- Предложенное в Послании главы государства  «Казахстан в глобальной реальности: рост, реформы, развитие» - единственно верный ответ сегодняшнему положению в мировом сообществе, в котором учтены все сферы деятельности, - отметил он.

Подробнее ...
Home МӘДЕНИЕТ

МӘДЕНИЕТ

ОН САУСАҒЫНАН ӨНЕР ТАМҒАН ШЕБЕР

«Рухани жаңғыру» бағдарламасы аясындағы «100 жаңа есім» жобасының мақсаты – «жастар өмірге шынайы көзбен қарап, өз тағдырларына өздері иелік ете алатын азаматтар болуы үшін оларға үлгі ұсыну».

Өзінің еңбегімен, білімімен, талантымен ел дамуына зор үлес қосып, әр салада табысқа жеткен азаматтар біздің қаламызда да баршылық. Солардың бірі - Абылайхан Қалқаұлы.

Невзоровтар отбасы атындағы музейде мәдени және рухани құндылықтарды сақтау және жергілікті қолөнершілерімізді қолдау мақсатында ескіліктен жаңашылдық іздеген, қажетсіз заттан ерекше туынды жасап шығаратын қаламыздағы он саусағынан өнер тамған шебер Абылайхан Қалқаұлымен кездесу кеші ұйымдастырылды. «Көнені керек етпесең, жаңа табылмайды»,- деп Шәкәрім бабамыз айтқандай, қазіргі таңда елімізде «Рухани жаңғыру» бағдарламасы аясында ұлттық мәдениетіміз, қолөнеріміз қайта түлеуде.

Көненің мұрасын жаңғыртып жүрген қолөнер шебері Абылайхан Қалқаұлының есімі «Қазақстанның 100 жаңа есімі» жобасына енген. Абылайхан Қалқаұлы - қолданбалы өнер туындыларының жасалу технологиясын терең зерттеп, ізденіп, қолда бар шикізат көздерін оңтайлы пайдалана отырып қолөнер бұйымдарын дайындап, халық арасында насихаттап келе жатқан Семей қаласындағы бірден-бір тұлға. Ерік-жігері мықты азамат тағдырдың ауыр сынағына мойымай, тынбай еңбектеніп, өзінің қайталанбас қолөнер туындыларымен талайды таңдай қақтырып келе жатыр.

Жиынға Бизнес және сервис колледжі, Шәкәрім атындағы мемлекеттік университеттің «Дизайн және бейнелеу өнері» факультеті студенттері, сонымен қатар аталмыш оқу орындарының оқытушылары және қолөнер шеберлері Сағат Адылханұлы мен Құрман Абайұлы қатысты.

Абылайхан аға тағдырдың қатал сынағына ұшырап, 37 жасында мүмкіндігі шектеулі жандар қатарына қосылады. Бірақ мойымай, өмір үшін күресіп, жаңа өмір бастайды.

- Тағдыр маған үлкен сынақ жіберді. Бірақ мен мойымадым, ешкімге ренжіп кінә артпадым. Керісінше, аяқтан тез тұрып кетуге талпындым. Жатпай-тұрмай жаттығуымның арқасында 3 жылда балдаққа сүйенерліктей жағдайға жеттім. Қанша ауыр болса да өз бетімше жүріп-тұруға өзімді-өзім қамшыладым. Бәріне шыдап, ауруыммен күрестім, өйткені мен өмірді сүйдім,- деген шебердің ғибратқа толы әңгімесі жастардың жігерін жаныды.

Темірден түйін түйген Абылайхан шебер тағдырдың жазуымен қолөнер жолына бір жола түседі. Алдына нақты мақсат қойған қайсар жан осы өнердің қыр-сырын жетік меңгеру үшін арнайы ізденіп, 6 жыл көлемінде атақты шебер Дәркембай Шоқпарұлынан сабақ алады.

«Еңбек бәрін жеңбек» деген сөздің шындығына көз жеткізген Абылайхан ағамыз өмірге деген құштарлығы мен еңбекқорлығының арқасында өз ісінің шебері атанды. Ағаның өмірі қоғамдағы он екі мүшесі сау бола тұра бос жүрген адамдарға ой салары анық. Шебер зергерлік өнер, тері өңдеу, сүйек ұқсату, ағаш ұқсату, темір балқытып қару-жарақ соғу секілді қолөнердің алуан түрлері жайлы әңгімелеп, өз қолымен жасаған туындыларын көрсетті. Ерекше қызығушылық танытқан жастардың қойған сұрақтарына Абылайхан тұшымды жауаптар берді.

Кездесу барысында қатысушылар назарына шебердің жеке өмірі мен ұстаханадағы жұмысы жайлы арнайы әзірленген бейнебаян, слайд суреттері ұсынылды.

Абылайхан Қалқаұлы көненің мұрасы қазақ халқының қолданбалы өнерін  жаңғыртып, жетілдіріп, халық назарына жаңа үлгіде ұсынуға қашанда әзір екенін айтады. Сонымен қатар осы өнерді жастарға насихаттап, алдағы уақытта мүмкіндігі шектеулі азаматтарға арнап бір шеберхана ашсам деген ойын да жеткізді.

Қолөнер шеберлері Сағат Адылханұлы мен Құрман Абайұлы да қолөнер туралы әңгімелеп, Абылайхан Қалқаұлына жылы лебіздерін білдірді.

Шара соңында музей қызметкерлері Абылайхан Қалқаұлына алғыс айтып, Невзоровтар отбасы атындағы бейнелеу өнері музейі әзірлеген «Қазақстанның бейнелеу өнері» атты каталогін сыйға тартты.

Ә.ӘБІЛХАНҚЫЗЫ, Невзоровтар отбасы атындағы бейнелеу өнері музейінің маркетинг және ағарту бөлімі қызметкері.

РУХАНИ КЕЛІСІМ – ТАТУЛЫҚТЫҢ БАСТАУЫ

18 қазан – Рухани келісім күні. Осы айтулы күнге орай, Достық үйінде «Дін және                 жастар» атты семинар ұйымдастырылды. Рухани келісім мен татулықты сақтаудың маңыздылығын насихаттау мақсатында өткен мерекелік шараға Қоғамдық даму министрлігінің ғылыми-зерттеу және талдау орталығы басшысының орынбасары Бауыржан Шериязданов, қалалық ішкі саясат бөлімінің басшысы Нұржан Есенжолов және дін өкілдері қатысты.

Дінаралық татулық пен ұлтаралық келісімнің орнауы - тәуелсіз еліміздің басты жетістіктерінің бірі.

- Бүгін елімізде Рухани келісім күні. Адамдар арасында келісім мен түсіністік болмаса, ешқандай өркениетке жету мүмкін емес. Халқымыз «Бірлік бар жерде, тірлік бар» деген. Дәулеті өскен, сәулеті келіскен бүгінгі Қазақстанның толағай табыстары ынтымағымыз бен ырысымыздың берген жемісі деп білеміз. Біздің бірлігіміз төзімділікке, адамды сүюге, қайырымдылыққа шақыратын жоғары адамгершілік мұраттарға негізделген. Бүгінде Қазақстанда халықаралық қауымдастық мойындаған татулық пен бейбітшіліктің ерекше үлгісі қалыптасты. Міне, осындай сыйластық пен үйлесімділікке негізделген ізгі ниетімізді кейінгі ұрпақ бойына сіңіру - біздің басты мақсатымыз,- деді қалалық Достық үйінің директоры Берік Көпбаев.

Шара барысында Қоғамдық даму министрлігінің ғылыми-зерттеу жане талдау орталығы басшысының орынбасары Бауыржан Шериязданов Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауының негізгі бағыттарын түсіндіріп, оның ішінде жастарға жасалып отырған мүмкіндіктерге тоқталды. Дін саласының өкілдері исламның негізгі аспектілерін атап өтіп, жастарды түрлі жат ағымдардың жетегінде кетуден сақтандыру мақсатында діни сауаттылықтарын жетілдіру қажеттігін баса айтты.

Шара аясында Семейдің облыстық тарихи өлкетану музейі «Абай – ақыл-ойдың алыбы» атты жылжымалы көрме ұйымдастырып, Абай Құнанбаев пен Мұхтар Әуезовтің еңбектері мен қолданған заттарын көпшілік назарына ұсынды. Мұндағы мақсат - жас ұрпаққа ұлы тұлғалардың ынтымақ пен бірлікті ту еткен шығармаларын насихаттау. Сонымен бірге №№ 5, 22, 37, Түрксіб орта мектебі оқушыларының қолынан шыққан түрлі қолөнер бұйымдары мен суреттері де көрмеден орын алды. Шара концерттік бағдарламамен жалғасын тапты.

Айта кету керек, 1992 жылдың қазан айында Елбасы Нұрсұлтан Назарбаевтың бастамасымен Алматы қаласында І Бүкіләлемдік рухани келісім конгресінде 18 қазанды қоғамымыздағы өзара түсіністікті нығайту күні ретінде белгілеп, оны дәстүрлі түрде мереке ретінде атап өту ұсынылған болатын. Қазіргі таңда бұл күн барша қазақстандықтардың мерейлі мерекесіне айналып отыр.

Құралай ОМАШ, «Семей таңы»


ӨНЕРГЕ ҚҰШТАР ЖАНДАР

Сәрсенбі, 10 қазан күні Семей Қалалық Мәдениет үйінде «ШҚО Семей қаласының арнаулы әлеуметтік қызметтер көрсету орталығы» КММ мен «ШҚО Семей қаласының жұмыспен қамту, әлеуметтік бағдарламалар және азаматтық хал актілерін тіркеу бөлімі» ММ-нің ұйымдастыруымен, қала әкімдігінің қолдауымен мүмкіндігі шектеулі жандардың 5-ші облыстық «Екі жұлдыз-2018» шығармашылық конкурсының гала-концерті өтті. Мерекелік іс-шараға қала әкімінің орынбасары Надежда Шарова, қалалық мәслихаттың депутаттары, денсаулық сақтау және білім беру мекемелерінің өкілдері қатысты.

Аталмыш мерекелік шара Мүгедектер күніне және Астана қаласының 20 жылдық мерекесіне орай «Ән-жырым саған, туған ел!» айдарымен өткізілді. Ән сайысында қатысушылар әртүрлі байқаулардың лауреаттары мен дипломанттары атанған Қалалық Мәдениет үйінің кәсіпқой әншілерімен жұптасып өнер көрсетті. Елбасымыз өз Жолдауында: «Мүмкіндігі шектеулі адамдар үшін Қазақстан кедергісіз аймаққа айналуы тиіс»,- деп атап көрсеткені белгілі. Иә, ерекше жандардың рухани дамуына ықпал ету, олардың бойындағы қабілетін ашып, өнерін ел алдына шығару мақсатында өңірде «Екі жұлдыз» ән байқауы дәстүрлі түрде жыл сайын ұйымдастырылып келеді.

Өнер додасының негізгі мақсаты – музыкаға бейімі бар балаларды анықтау, олардың шығармашылықтарын шыңдау, өмірге деген құштарлығын, рухани деңгейін арттырып, отансүйгіштікке, ұлтжандылыққа тәрбиелеу, бағыт-бағдар беріп, қолдау көрсету,- дейді әлеуметтік жұмыс жөніндегі маман Райхан Байтілеуова.

«Екі жұлдыз» сайысы осыған дейін аудандық, қалалық деңгейде өткізіліп келсе, бұл жолы облыс көлемінде ұйымдастырылды. Байқауда облыстың жеті ауданынан, атап айтар болсақ, Зайсан, Аягөз, Абай, Көкпекті, Жарма, Үржар, Тарбағатайдан және Семей қаласының арнаулы әлеуметтік қызметтер көрсету орталығынан келген 13 сайыскер өздерінің бақтарын сынады.

Өткен жылғы «Екі жұлдыз» байқауының жеңімпазы, қонақ ретінде шақырылған Нұрым Мұратов есімді талантты жеткіншек сахнада өнерін көрсетіп, көрерменнің ыстық ықыласына бөленді. Жеңімпаздар дипломдармен марапатталып, ақшалай сыйлықтарға ие болды. Өнерлі өрендердің жетекшілеріне де алғыс хаттар табыс етілді.

Қуандық НӘДІРБЕКҰЛЫ, Семей қаласы.

ГОЛЛИВУДТЫҚ КИНОАКТЕР СЕМЕЙГЕ КЕЛДІ

Өткен аптада голливудтық киноактер Дон «Айдаһар» Уилсон Семейге келді. Дүйсенбі, 24 қыркүйек күні қаламызда өткен «Fashion House International – Шығыс Қазақстан аруы» халықаралық конкурсының өңірлік жартылай финалына қазылар алқасы төрағасы ретінде шақырылған голливудтық  жұлдыз және кикбоксингтен 11 мәрте әлем чемпионының бұл Қазақстанға алғаш мәрте келуі емес.

«Fashion House International – Шығыс Қазақстан аруы» жобасы Семейде осымен екінші жыл қатарынан жүзеге асуда. Бұл жолы Номад халықаралық кинофестивалі аясында қолға алынған жобаның президенті Даниал Ахметов болса, продюсері Еркін Ялгашев.

Кино саласында 28 жыл еңбек етіп келе жатқан Дон «Айдаһар» Уилсон бүгінде продюсерлікке бет бұрған екен. Сұхбат барысында Голливуд жұлдызы келешекте жергілікті актерлердің қатысуымен фильмдер түсіру үшін Қазақстанға қайта келуге ниетті екенін жасырмады.

- Кикбоксер ретінде 30 чемпионатта жеңіске жетіп, үш түрлі салмақ дәрежесінде әлемнің 11 дүркін чемпионы атандым. Ал «Айдаһар» лақап аты 1974 жылы кунг-фумен айналысып жүргенде пайда болды. Мен кикбоксингке келгенде лақап ат ойлап табуға кеңес берді. Бірден ойыма келгені «Айдаһар» болды. Содан бері мені Дон «Айдаһар» Уилсон деп атайды. Дон деген менің Дональд деген қысқарған есімім. Ал киноға досым Чак Норисстің кеңесімен келдім. Бұдан кейінгі мансабым киномен байланысты. 30-дан аса фильмде басты рөлдерді сомдадым, - дейді Д.Уилсон.

Оның айтуынша, бұл сұлулық байқауына төрағалық етуі болашақ киноактерлерді іріктеуге көмектеспек. Қазылар алқасының құрамында сондай-ақ облыстық, қалалық әкімшілік өкілдері, Қазақстан мен Азия арулары атанған бойжеткендер және продюсер Еркін Ялгашев енді.Өңірлік жартылай финалдың бағдарламасына сай, қатысушылар тек салтанатты түрде жүріп өтіп, олардың сахнадағы қимылдары мен өзін-өзі ұстауы, сыртқы сұлулығы бағаланды. Қазылар алқасының шешімімен Надежда Недосекова «Шығыс Қазақстан аруы – 2018» атанды. Енді ол Өскеменде өтетін халықаралық байқаудың ақтық сынында өнер көрсететін болады.

Жадыра ТӨЛЕГЕНҚЫЗЫ, «Семей таңы»

АНАЛАР - АСЫЛ ЖАНДАР

Елімізде қыркүйек айының үшінші жексенбісінде Аналар күні мерекесі тойланды. 24 қыркүйек күні Қалалық Мәдениет сарайында бұл мейрамды семейліктер де атап өтті. Достық үйі мен Аналар кеңесінің ұйымдастыруымен өткен мерекелік шараға Семей қаласының мәдениет және тілдерді дамыту бөлімінің басшысы Назерке Аққожина, Семей қалалық Достық үйінің директоры Берік Көпбаев және Аналар кеңесінің төрайымы Нағима Мойынбаева қатысты. «Мерейлі отбасы – 2018» байқауының жүлдегерлері Қанаевтар отбасы және ақ жаулықты батыр аналарымыз қадірлі қонақтар ретінде шақырылды.

Адам бойындағы бар ізгі қасиеттер ананың аялы алақанынан тарайды. Сондықтан бұл өмірдің мәні мен сәні болған асыл аналарымыз қандай құрметке болса да лайық. Тағылымы мол шарада Семей қалалық Достық үйінің директоры Берік Көпбаев құттықтау сөз сөйледі.

- Еліміздің дамыған 30 мемлекеттің қатарына енуі жолында, ер адамдармен қатар, нәзік жандылардың да қосар үлесі мол. Баланы дүниеге әкеліп, өсіріп-жеткізген, мықты азамат етіп тәрбиелеген аналарға неге алғыс айтпасқа? Бәріміздің үйімізде біздің тілеуімізді тілеп отыратын аналарымыз бар. Бүгінгі шара осы асыл жандарға арналып отыр. Бұл шараның негізгі мақсаты – аналарға құрмет көрсету, жастарға үлгі ету, отбасылық құндылықтарды насихаттау. Бүгінгі мерекенің қонақтары - отбасында көп бала тәрбиелеп отырған, қоғамға еңбек сіңіріп жүрген ару аналар. Аналарымыздың берер тәрбиесі мықты болса, еліміздің іргесі де берік болады. Тағы бір айта кетерлігі, Достық үйінде «Ақ орамал» атты акция бастау алды. Сол акцияға сәйкес, Аналар кеңесінің ұйымдастыруымен қонақтарымызға сыйлық ретінде ақ орамал жауып, құрмет көрсетіп жатырмыз. Барша аналарымызды шын жүректен мерекелерімен құттықтаймын!- деді қалалық Достық үйінің директоры.

Бұл күні асыл әжелер жас аналарға ақыл-кеңесін айтты. Қаламыздың көркейіп, дамуына өз үлесін қосқан нәзік жандыларға алғыс хаттар мен сыйлықтар табысталды. Өңіріміздің өнерпаздары жырдан шашу шашып, аналарға құрмет көрсетілді.

Иә, ақ жаулықты аналар қай қоғамда болмасын отбасының ұйытқысы болған. Шаңырақтарын шаттыққа бөлеп отырған асыл жандарға біздің елде құрмет жоғары.

Қуандық НӘДІРБЕКҰЛЫ, Семей қаласы.

Еще статьи...