Ұлттық экономиканың жетекші саласы болып табылатын – кәсіпкерлік Тарбағатай ауданында да қарышты қадаммен дамып келеді. Нарыққа бейімделген аудан тұрғындары қазіргі таңда мемлекеттің қолдауына арқа сүйей отырып, бейіміне, қабілетіне, мүмкіндігіне қарай өздері қалаған кәсіп түрлерімен шұғылданып, аудан экономикасын дамытуға сүбелі үлес қосып келеді. Аудан бойынша, қазіргі таңда 2652 шағын кәсіпкерлік субъектілері тіркелген екен. 1850 шаруа қожалықтары бар. Ауданда 361 сауда дүкені, 42 қоғамдық тамақтандыру орындарымен (асхана, дәмхана, мейрамхана), 80 қызмет көрсету орындары, 20 жанар жағар май құю станциясы, 15 дәріхана, 43 шағын наубайхана халыққа қызмет көрсетіп отыр. «Жұмыспен қамту-2020» бағдарламасының түпкі мәнін жете түсінген тарбағатайлықтар білек сыбана іске кірісіп, кәсіпорындар санын жылдан жылға арттырып келеді. Мысалы, осы бағдарлама негізінде былтыр аудан кәсіпкерлері 120 миллион теңге несие алып, қажеттеріне жаратса, бұл көрсеткіш биыл одан са-йын өсіп, 420 миллион теңгені құраған. Бұл бағыттағы құлшыныс алдағы жылы да арта түспек. Алдын ала жинақталған мәліметтерге қарағанда «Жұмыспен қамту-2020» бағдарламасы бойынша тіркеліп, тілек білдіргендер саны артып, олар 300 миллион сұрап отыр. Бұл бастамасы ғана. Осының өзінен-ақ, Тарбағатайда кәсіпкерлікті дамытуға деген ынта-ықыластың арта түскені аңғарылады.
Қалыптасқан дәстүрге сай тарбағатайлық кәсіпкерлер таяуда өздерінің бесінші форумында бас қосты. Кездесуде аудан әкімі Ділдабек Оразбаев құттықтау сөз сөйлеп, кәсіпкер азаматтарды еңбектегі жетістіктерімен құттықтады. Сондай-ақ, ол «Шағын бизнес саласындағы жылдың үздік кәсіпкерлері» аудандық конкурсының жеті номинациясы бойынша жеңімпаздарын марапаттады. Кәсіпкерлердің тағы да бір тобына Алғыс хаттар тапсырды.
Форумға қатысқан кәсіпкерлер өндірген тауарлардың көрмесін тамашалады. Өнім өндіру, оның сақталуы, сапасы жайлы өзара пікірлесіп, тәжірибелерімен бөлісті.
ХамЗА САТИЕВ.
