«Қарттары бар ел — қазынасы бар ел» деген сөз ауыз екі жиі айтылғанымен,сол қарияларымызға құрмет көрсету күнделікті күйбең тірліктің тасасында қалып, ел билеп жүрген азаматтардың тарапынан еліне еңбегі сіңген аға ұрпақ өкілдеріне көп көңіл бөліне бермейтінін көріп жүрміз. Ауданымызға Серік Зинабекұлы әкім болып келгелі қат-қабат жұмыстарына қарамастан, ақ сақалды аталар мен ақ жаулықты аналарға құрметпен қарайтыны халықтың назарынан тыс қалып отырған жоқ.
Аудандағы көпбалалы аналарды еліміздің Бас қаласы Астанаға бірнеше мәрте саяхатқа жіберіп, Тәуелсіздік алғаннан бергі жетіс-тіктерімізді өз көздерімен көріп қайтуға мүмкіндік жасаған Серік Зинабекұлы, ай сайын мерейтой жасындағы қарттардың әрқайсысын аудандық газет арқылы құттықтап, игі тілегін білдіруді де ұмытпайды.
Таяуда «Нұр Отан» партиясы аудандық филиалы төрағасының бірінші орынбасары Бақтыбай Баймұратов пен Үржар ауылдық округінің әкімі Сайлауғазы Шарықбаев Қызылту ауылының тұрғыны Мәстен Шүршітбаева әжейді 109 жасқа толуы құрметіне орай аудан әкімінің тапсырмасымен арнайы барып құттықтап, игі тілектерін білдіріп, сый сияпаттарын тапсырып қайтты.
Бүгін төрт ұл, екі қыздан немере, шө-бере, шөпшек сүйіп, Барқытбелдің баурайындағы ауылының, ауданның өсіп-өркендеуіне өз үлесін қосқан анаға:
-Аяулы ана, ұрпақ қызығын көріп отырған ардақты әже ретінде ғана емес,ауданымыздың қадірменді қариясы ретінде, Сіздің келген жылдың қызығын қызықтап, әлі де ұрпақтарыңыздың ортасында жаратушының берген жасын жасай беруіңізге тілектеспіз! –деген тілектерін жеткізді. Мәстен әжейдің бір перзенті Бородулиха ауданында тұрады.Сол жерде Әлия атты шөпшегі де дүниеге келген екен. Қазір әжейдің өзі 75 жастағы Мырзағали деген ұлынан туған, 54 жастағы Әлібек атты немересінің қолында тұрады. Қария-ның сөзі мәнді, өзі тың. Бір қарағанда 109 жаста деп айтуға келмейтіндей. 1905 жылы Қырғызстанда туған ана Құрман Шүршітбаевпен бас қосқан екен. Отағасы 1986 жылы бақилық болған, ал әже бұл күндері ұрпақ қызығын көріп, орталарында алаңсыз ғұмыр кешіп келеді:
-Айналайын, балаларым, мені елеп-ескеріп келгендеріңе алғыс-тан басқа айтарым жоқ. Серік баламның қарттарды сыйлағаны ата-ананың дұрыс тәрбиесін көргендігінің белгісі деп ойлаймын. Үлкенді сыйлаған жанның мерейі қашан да үстем болмақ. Ал менің бүгінгі бақытты қарттығым, көңілімнің жай болуы мына Күләш деген келінімнің баладай мәпелеуінің арқасы.Өздеріңнен де Жаңа жыл жақсылығын аямасын! Еліміз аман болсын, береке -бірлік, ырызық ортаймасын! Бүкіл аудан халқын Жаңа жылмен құттықтаймын! — деп ағынан жарылып, ақ батасын берді.
