Аудан әкімі Серік Зайнулдиннің балаларға арналған жаңа жылдық шырша мерекесі биыл аудан орталығындағы спорт модулі ғимаратында өтті. Мерекелік шараға Науалы балалар үйінің тәрбиеленушілері, аудан мектептерінде оқитын аз қамтылған отбасылардың балалары қатысты.
Шаттық сыйлайтын осынау шараға, сонымен қатар, аудан әкімінің орынбасары Қ.Сейітқанов, аудандық «Нұр Отан» партиясы төрағасының орынбасары Б.Баймұратов, облыстық мәслихаттың депутаты, Үржар ауданы бойынша ШҚО әкімінің қоғамдық кеңесшісі Р.Жанкүшікова, аудандық мәслихаттың хатшысы М.Бітімбаев, ішкі саясат, білім бөлімдерінің басшылары С.Жүнісова, Б.Тұрлыбековтер қатысты.
Шырша мерекесіне жиналған балаларды аудан әкімінің атынан әкімнің орынбасары Қ.Сейітқанов құттықтады.
Осыдан соң көңілді шара басталып кетті. Мерекелік сценарий бойынша жылдың 12 ертегі кейіпкері бейнеленді. Шырша тойының шарықтау шегінде балалар ескі жылдың иесі Жыланмен қоштасса, жаңа жыл кейіпкері Алтын адам алтын қанатты арғымақты қазақ халқына сыйға тартты: «Уа, қазақ халқы! Келе жатқан жаңа жыл елімізге бақыт әкелсін! Мына алтын қанатты арғымақты Қазақстанға табыс етемін! «Ер қанаты тұлпар» деп, қазақ халқы жылқы малын ерекше қадір тұтқан. Алтын қанатты арғымақ елімізді жарқын болашаққа апарады. Әлем көшінің алдына шығарады. Сондықтан, оның орны Қазақстан мемлекетінің Елтаңбасында болу керек!» Мемлекеттік рәміздеріміз арайланған Елтаңба, Тумен қатар ұштастырыла көрсетіліп, бақыт құсы қонған бүгінімізбен байланыстырыла, музыкалық әрлеумен көрсетілуі балаларға ерекше әсер сыйлады.
Мерекеге жиналған барлық бала дәстүрлі түрде Аяз ата мен Ақшақардың сыйлығына ие болып, өздеріне арнайы жайылған мерекелік дастарханда тәтті-дәмділерге бас қойды. Соңынан барша балақайға аудан әкімі Серік Зинабекұлының атынан арнайы әзірленген сый — сияпат тарту етілді.
Берікхан ТАЙЖІГІТ,
«Семей таңы»
