Нұрдәулет КӘКІШЕВ,
«Семей таңы»
31 желтоқсан күні семейліктер жылдағы дәстүр бойынша Жаңа жыл мерекесін Орталық алаңдағы биік те, әсем шырша маңында мерекеледі. Алаңға жиналған жұртшылық үшін қаладағы өнер ұжымдарының концерттік бағдарламасы мен театрланды-рылған қойылымдары ұсынылды.
Жаңа жылды қарсы алу сәтінде қаланың Орталық алаңы ерекше реңге боялды. Алаңдағы алып шырша маңында тұрғындар бір-бірін құттықтап, ізгі тілектерін арнады. Мерекеге арнайы дайындалған концерттік бағдарламалар тұрғындарды шаттыққа бөледі. Ал, балалар жағы Аяз ата және Ақшақармен естелік суретке түсіп, олардың қуаныштан жүздері бал-бұл жанды. Бұл күні ағытылған тілектерде де шек болмады. Алайда, барлық тілектің мазмұны бір, ол – елдің амандығы.
— Төрімізге шығып, желдей жүйткіп жеткен Арғымақ жылы жағымды жаңалықтар мен жақсылықтың жаршысы болсын! Семейіміз гүлдене берсін. Әр адамның жүзінен қуаныш арылмасын! Жаңа жыл тек қана жақсылығын ала келсін, — дейді Орталық алаңға келген қала тұрғындарының бірі Айдын Исаханов.
Мерекелік кешке ерекше сән берген Аяз ата мен Ақшақар да сахна төріне көтеріліп, өз тілектерін жеткізді. «Жаңа жылда тек жақсылықтар көп болсын» десті.
Қалалықтармен бірге алаңға келген қала әкімі Айбек Кәрімов өз сөзінде 2013 жылдың табысты бол-ғанын айта келіп, 2014 Жылқы жылы да ізгі бастамалар мен толайым табыстардың жылы болатындығына сенім білдірді.
— Жылқы — қазақ халқы үшін аса қадірлі де қасиет- ті жануар. Сондықтан, Жылқы жылы баршаңызға тек жақсылығын ала келсін. Әрқайсыңыздың денсаулықтарыңыз мықты болсын. Әр отбасына бақыт тілеймін! – деді Айбек Кәрімов өз сөзінде.
Қала басшысының құттықтау сөзінен кейін Орталық алаңға жиналған көпшілік қала аспанын жарқырата түрлі түске бояған отшашуды тамашалады. Мерекелік шара өнер ұжымдарының концертімен жал-ғасты. Осылайша, қала жұрты ескі жылды шығарып салып, Арғымақ жылды салтанатты түрде қарсы алды. Күннің суықтығына қарамастан семейліктер Орталық алаңдағы сұлу шырша маңында Жаңа жылды көтеріңкі көңіл күймен мерекеледі.
