Мүмкіншілігі шектеулі жандар қазіргі қоғамға емес, қоғам олардың ыңғайына қарай бейімделуі тиіс. Мүгедек жандар көп ретте өз құқықтарын дұрыс пайдалана бермейді. Көпшілік орындарда өздерін бөгде сезінетіндер де кездеседі. Ал, дамыған, зайырлы мемлекетте мұндай келеңсіздік орын алмауы тиіс. Аталмыш бағытта бүгінде еліміз бойынша көптеген қоғамдық ұйымдар, бірлестіктер мен шетелдік еріктілер түсіндіру жұмыстарын жүргізуде. Семей қаласындағы «Исток» қоғамдық бірлестігі де аталмыш бағытта БАҚ өкілдерімен бірге елеулі жұмыс жасауда.
Кеше түсте қаламыздағы «Арнұр» бизнес орталығында «Мүмкіндікті арттыру!» атты ақпараттық топ осы бағытта өз жұмысын бастағаны жайлы журналистер алдында баспасөз мәслихатын өткізді. Шараны ұйымдастырушы «Исток», «Намыс» және «Шырақ» қоғамдық бірлестіктері. Облыс орталығынан бастау алған шараның көздеген мақсаты қоғамдағы мүгедек жандармен қарым-қатынас мәдениетін нығайту, оларға мүмкіндігінше қолдау көрсету, өмірден өз орындарын алуға жәрдемдесу және осы жолда жұртшылық назарын аударып, нақты қадамдарға бару. Бұл орайда бірлестік өкілдерінің тізе қосуымен «Мүмкіндікті арт-тыру!» атты жаңа жоба даярланған. Жоба координаторы В.Палицкаяның айтуынша, аталмыш шара ең алғашқыда АҚШ және бірқатар Батыс елдерінде қолға алынған. Сондай-ақ, БҰҰ-ның қолдауына ие болған.
«Бүгінде еліміз бойынша 506,4 мың мүмкіндігі шектеулі жандар тұрады екен. Бұл жалпы халықтың 3%-ын құрап отыр. Соның үштен бірі еңбекке жарамды азаматтар мен азаматшалар болса, 17,5%-ы балалар. Ал 20 мыңнан астамы – жанарынан, 19 мыңға жуығы – есту қабілетенен айырылған жандар. Мінеки, сандардың сыры қайда жатыр?! Бұл мәліметтерді келтірудегі басты себеп, қоғамда «мүгедек» атанған жандардың аз емес екендігін көрсету. Ал біз тағдыр тауқыметімен «мүгедек», «кемтар» атанған жандардың құқығы қаншалықты қорғалып жатқандығын ойланып көрдік пе? Рас, мемлекет тарапынан мүгедектерді жұмыспен қамту тәрізді іргелі шаралар қолға алынуда. Алайда, қоғам әлі де оларға толық үйренген жоқ. Мүмкіндігі шектеулі жандардың кейбір мекемелерге кіруі де қиын» дейді жоба үйлестірушілері.
Басқосуда БАҚ өкілдері қоғам назарын мүгедектер мәселесіне қалай аударуға болады деген тақырыпта ортақ ой өрбітті. Және де баспасөз бетінде аталмыш тақырып бойынша қалам тербеп жүрген журналистер өз тәжірибелерімен бөлісті.
Қуаныш ҚОЖАЕВ,
“Семей таңы”.
