Семейде футболдың дамуы ерекше сезіледі. Аяқ доптың додасы соңғы кездері жиі ұйымдастырылып, түрлі деңгейдегі жарыстар өткізу дәстүрі де қалыптасып қалды. Ала доп тепкенге жаны құмар жасөспірімдерден бастап, жасы келсе де жасыл алаңды аңсап тұратын ардагер аяқдопшылар «Спартак» стадионында жиі бас қосады. Мәселен, өткен сәрсенбі күні шәкірт баулып, бақытын бапкерліктен тапқан, Семей өңірінде футболдың дамуына үлес қосқан балалар бапкерлерін еске алуға арналған шағын футболдан жасөспірімдер арасында ашық турнир қорытындыланса, аяқ доптың айналасындағы ардагерлер арасында басталатын жарыстың алғашқы жолдастық кездесу ойыны да өтті.
Алдымен 21 команда бас қосқан жарыстың марапаттау рәсімі өтті. Қаңтар айының 3-і мен 8-і аралығында өткен ашық турнир жоғары деңгейде ұйымдастырылған. Биыл әр турнирге тек қаладағы жасөспірімдер ғана емес, Аякөз, Бесқарағай сияқты аудандардың да жас жеткіншектері қатысты. Жай ғана қатыспады, жеңімаз атанып, мерейлері тасыды. Командалар үш топқа бөлініп, сынға түскен еді. 1998-1999 жылы туған үлкен топтар арасында 1 орынды «Цементник», 2 орынды «Спартак — 1», 3 орынды олимпиадалық резервтегі балалар мен жасөспірімдердің спорт мектебінің «СКА» командасы бөлісті. 2000 – 2001 жылы туғандар арасындағы сында 1 орынды «Спартак — 2001», олимпиадалық резервтегі балалар мен жасөспірімдердің спорт мектебінің «Иртыш», ал, 3 орынды «Спартак — 2000» командалары еншіледі. Кіші топтағы балғындар арасында Бесқарағай ауданынан келіп қатысқан «Жас Қанат» командасы үздік деп танылды. «Спартак — 2002» және «Цементник — 2002» командаларындағы ойыншылар өзара екінші және үшінші орындарды бөлісті.
Жеңімпаз атанып, жүлдеге іліккен барлық командаға Семей қаласы дене шынықтыру және спорт бөлімінің арнайы медальдары, бағалы сыйлықтары тапсырылды.
Жарыстың бас төрешісі Станислав Лесивтің айтуынша, балалар арасындағы футбол жыл өткен сайын қарқынды дамып келеді. Жылдан – жылға командалар санының көбеюі де ашық турнирдің жоғары деңгейде ұйымдастырылуына септігін тигізуде.
-Әр ойын өзіндік тартысты өтуімен есте қалды. Балалардың қысқы демалысын жақсы әрі тиімді өткізуде жарыстың маңызы айрықша. Жыл сайын осындай жарыс өткізіп тұрсақ, балғын спортшылардың да қызығушылығы арта түсері анық. Бұл жарыс білгенін шәкіртіне үйреткен, бірақ, бүгінде арамызда жоқ бапкерлерге деген балалардың құрметі, — дейді бас төреші.
Ардагерлер арасындағы жарыстың жөні бөлек. Семейге басшылыққа келгелі спорттың, әсіресе, футболдың дамуына ерекше көңіл бөліп жүрген қала әкімі Айбек Кәрімов өткен ғасырдың басында құрылған «Семей спорт клубын» қайта жаңғыртуға бастамашы болды. 1913 жылы Семейде алғаш Қазақстандағы аяқдоптың тарихы бастау алған тұста құрылған клуб заманның ағымымен өз жұмысын тоқтатқан еді. Міне, футболдың ғасыр тойын абыроймен өткеріп, осы жүз жылдықтың аясында жүргізілген жүйелі жұмыстарды жалғастыра отырып, Айбек Мүталапханұлы клубтың жұмысын бір жолға қоюға қадам жасады. Әлбетте, өткен мен бүгінді байланыстыру берекелі іс, ұрпақ сабақтастығы. Әсіресе, қазақ футболының отаны саналатын Семейде сабақтастық деген сындарлы ұғымды жалғастыру жарасымды – ақ. Сол «ССК» (Семей спорт клубы) қала әкімінің қатысуымен кезекті ұйымдастырылған жарысқа тыңғылықты дайындықтарын бастау негізінде «Медик» командасымен жолдастық кездесу де өткізіп үлгерді. Команда сапында Айбек Мүталапханұлының өзі де шабуылшы ретінде жасыл алаңның көрігін қыздырды. Оң қаптал мен сол қапталдан қатар табылатын қала әкімі қырағы ойыншы ретінде белгілі. Алдағы жауапты ойындарда жеңіс добын соғатынына командаластары да бек сенімді.
-Қаланың чемпионатына қатысуға өтініш бергендер қатарында Семейдің «ССК» командасы бар. Команданың тарихы тереңде, өздеріңіз білетіндей 1913 жылы құрылған болатын. Қазақстанның, оның ішінде Семейде құ-рылған ең алғашқы футбол командасы қайта түледі, қатарға қосылды. Сапында «Спартакта» доп тепкен, тер төккен, «Елім-айда» ерлік көрсеткен аяқдопшылар жиылған. Жаттығу өткізу аптасына екі рет деп жоспарланып отыр. Ал, ойындар Семей қаласындағы үш үлкен алаңда өтеді, — деп атап өтті өз сөзінде Айбек Мүталапханұлы.
Ойындар өтетін алаңдарға алаңдаудың қажеті жоқ. Соңғы үлгідегі жабдықталған жасанды алаңдар дайын. Орталық «Спартак» стадионының, «Турист» қонақ үйінің маңындағы және кеме жөндеу зауытының жасанды жасыл алаңдарында сәуір мен қазан айларында қызықты жарыстар өтеді деп күтілуде.
Осы күнге дейін жарысқа жалпы жиыны 12 команда қатысуға ниет білдіріпті. Семей қаласының Шәкәрім атындағы мемлекеттік университетінің «Университет», Шығыс өңірлік әскери қолбасшылығының «Восток», медицина мамандарынан құралған «Медик», құқыққорғау саласының қызметкерлері жиылған «Динамо» және екі ауылдық округтің құрамасы мен бірқатар кәсіп-орындар сынға түседі. Алдағы уақытта команда қатары толыға түспек. Теміржолшылар да жасыл алаңдағы бәсекеге аттанбақ екен.
Айтпақшы, орайы келіп, аяқ допқа қатысты әңгіме өрбіген соң, Айбек Мүталапханұлынан «Спартак» командасын қаржыландыру мәселесін де сұраудың сәті түсті. Қала басшысының ықпалымен қаржының қыспағынан құтыл-ған команда жоғары топқа тоғыз жыл салып қайта шыққаны белгілі.
-Премьер – лигада ойнайтын команда облыс әкімінің құзырында болады. Облыстық бюджетке барлық тиісті құжаттарын бердік. Қазір 400 млн. теңге қаражат бөлінді.ШҚО атынан өнер көрсететін команда болғандықтан, қаржы мәселесінен тарығу болмайды, — деді қала басшысы.
Ерзат ЖАНАТҰЛЫ,
«Семей таңы»
