Қала әкімі Ермак Сәлімовтің қатысуымен қалалық мәслихаттың VI шақырылымының I сессиясы болып өтті. Айта кету керек, 20 наурыз күні өткен деңгейлік мәслихаттар сайлауынан соң қалалық халық қалаулыларының құрамы біршама жаңарыпты. Бұл орайда ұйымдастырылған саяси науқанның нәтижесі жайында қаламыздағы аумақтық сайлау комиссиясының төрағасы Зейнолла Тоқаев мағлұмат беріп өтті.
Аталмыш сайлауда қалалық мәслихат төріндегі 24 орынға 83 үміткер өтініш білдірген екен. Алайда саяси дода барысындағы сайлау бюллетеніне 57 кандидаттың ғана есімдері тіркеліпті. Ал дауыс беру шарасына қаламыздағы электораттың 71,3 %-ы қатысқан. Сонымен қатар өз ақпараттандыруында Зейнолла Тоқаев қалалық мәслихаттың алтыншы шақырылымына депутат болып сайланған азаматтармен таныстырып өтіп, барлығын жеңістерімен құттықтап, алдағы уақыттағы қызметтерінде өңіріміздің өркендеуі жолында өзіндік мол үлес қосатындықтарына сенім білдірді.
Осыдан соң халық қалаулылары дауысқа салу арқылы кезекті ұйым- дастырылған қалалық мәслихаттың бірінші сессиясының төрағасы ретінде №22 сайлау учаскесінен түскен депутат Рафаиль Хазиповты таңдап алды. Сонымен қатар депутаттар қалалық мәслихат хатшысына да дауыс берді. Бұл орайда аталмыш лауазымды осыған дейінгі шақырылым бойынша да атқарған Бейсенбек Ақжаловқа сенім артылды.
Осыдан соң қалалық халық қалаулылары мәслихаттың тұрақты комиссиялары, олардың құрамы мен хатшыларын таңдау мәселесін де қарастырды. Атап айтсақ, бюджет және қаржы, экономиканы дамыту істері бойынша тұрақты комиссия хатшысы ретінде №19 сайлау округінен түскен депутат Бауыржан Қайрамбаев; құқықтық мәселелер, депутат этикасы және құзыреттілігі мәселелері бойынша №8 округ депутаты Руслан Шелдебаев; өндірісті, әлеуметтік құрылымды дамыту, тұрғын үй коммуналдық шаруашылығы бойынша №16 округ депутаты Әміржан Ахмеджанов; әлеуметтік қорғау, денсаулық сақтау, білім беру, мәдениет пен спортты дамыту бойынша №21 округ депутаты Айнұр Арғынбекова тұрақты комиссия хатшылары болып сайланды.
Сонымен қатар депутаттар Семей қалалық мәслихатының кезекті сессиясының хатшысы мәселесін де қарады. Мәслихат хатшысы Бейсенбек Ақжалов айтып өткендей, бұл ретте қалыптасқан дәстүр бойынша сессия хатшылары сайлау округтерінің нөмір реттілігі бойынша тағайындалады екен. Бұл үрдісті осы жолы да сақтау барша халық қалаулылары тарапынан мақұлданды. Сондықтан кезекті сессияның хатшысы ретінде №1 сайлау округінің депутаты Марлен Көкірекбаев сайланды.
Жиын соңында депутаттар алдында қала әкімі Ермак Сәлімов сөз алып, барша халық қалаулыларын жаңа мандатты иеленулерімен құттықтады.
— Қазіргі депутаттық корпус 50%-ға жаңарды. Ендігі аралықта біз бірлескен түрде алдымызда тұрған тапсырмаларды тиімді тұрғыда шеше аламыз деп сеніммен айтуға болады. Алдағы жұмыс ауқымы айқын. Ынтымақтаса атқаруға тиісті бағдарламалар бар, сіздердің сайлаушыларыңыз — қалалықтардың үміттері мен сенімдері бар. Біз бірлескен түрде көп нәрсені атқара аламыз деген ойдамын,- деді өз сөзінде Ермак Бидахметұлы.
«СТ» — ақпарат
