Үржар аудандық әкімдігінің мәжіліс залында аудандық ардагерлер кеңесінің жиыны өтті. Жиынға аудан әкімі Серік Зинабекұлы Зайнулдин, Шығыс Қазақстан облысы ардагерлер кеңесінің төрағасы Айтқазы Шерубаев, аудан әкімінің орынбасарлары, бөлімдер басшылары, қоғамдық ұйымдар өкілдері мен ауылдық округтерден 50 белсенді ардагер қатысты.
Көпшілік алдында алғашқы болып Үржар аудандық ардагерлер кеңесінің төрағасы Нұрланбек Сандыбаев сөз алып, аудан көлемі бойынша атқарылып жатқан ардагерлер кеңесінің жұмысын баяндап өтті.
— Биылғы жылдың қаңтар айында ШҚО Ардагерлер ұйымының 7-ші есеп беру-сайлау конференциясында ШҚО Ардагерлер кеңесінің төрағасы болып Айтқазы Сейітұлы Шерубаев сайланды. Айтқазы Сейітұлы бүгін арнайы сапармен біздің аудан-ға аудандық ардагерлер кеңесінің активімен кездесіп, осы кезеңге дейінгі атқарылған жұмыстармен жан – жақты таныстыруға арнайы келді,- деген Нұрланбек Бөлекбай-ұлы өз атынан, Үржар ауданы ардагерлер кеңесінің мүшелері атынан Айтқазы Шерубаевтың жұмысына сәттілік тіледі.
Сондай-ақ Нұрланбек Сандыбаев өз баяндамасында аудандық ардагерлер кеңесінің жұмысымен жан – жақты таныстырды. Үржарда ардагерлердің бастамасымен атқарыл-ған шараларға тоқталып, аудан әкімі Серік Зинабекұлының ұйымдастыруымен үржарлық ардагерлердің Астана қаласына саяхат жасап, Алакөл жағалауында «Үржарайым» демалыс үйінде демалуға мүмкіндік ал-ғанын, соңғы үш жылда Наурыз мейрамында аудан басшының мерекелік дастарқан басында қабылдауы дәстүрге айналғанын айтып, ардагерлер атынан аудан басшысына ризашылығын білдірді.
— Биыл сәуір айында Республикалық ардагерлер ұйымының VII съезді болады. Делегат ретінде сол съездің жұмысын одан әрі жандандыруға барлық күш-жігерімізді саламыз деп сенім білдіруге руқсат етіңіздер,- деп өз сөзін аяқтады аудандық ардагерлер кеңесінің төрағасы Нұрланбек Бөлекбайұлы.
Сөз кезегін алған облыстық ардагерлер кеңесінің төрағасы Айтқазы Шерубаев:
— Ардақты ардагерлер, менің өз қызметімді алдымен сіздердің аудандарыңыздан бастауым сіздермен танысайын, қандай мәселе бар екенін білейін, бірақ сіздерді үйретейін деп емес, керісінше, сіздерден үйренейін деген ойымнан еді,- деді Айтқазы Сейітұлы. — Үржар ауданы ШҚО – дағы әлеуеті әлді, экономикасы тұрақты аудандардың алдыңғы қатарында. Алдағы уақытта бірлесіп, ақылдасып жұмыс жасауға шақырамын. Өйткені осы жердің тарихын, мәселелерін тек сіздер, ардагерлер ғана білесіздер. Сонымен қатар 20 наурыз күні өткен ҚР Парламенті Мәжілісі мен жергілікті мәслихаттар депутаттарының сайлауында ШҚО бойынша үржарлық ардагерлер жоғары көрсеткіштер көрсетті. Бүгінгі күні Елбасы Н.Ә.Назарбаевтың салиқалы саясатының арқасында әр ардагер өзінің жеке басының қамын емес, елдің, жердің мәселелерін көтереді. Осының өзі еліміздің тыныштығы мен жайма-шуақ өмір сүріп жатқандығымызды білдіреді, — деп түйіндеді өз сөзін облыстық ардагерлер кеңесінің төрағасы.
Қашанда алдыңғы аға буынға қолдау танытып отыратын аудан әкімі Серік Зинабекұлы бұл жиынға арнайы қатысқан еді. Аудан әкімі кездесу кезінде аудан ардагерлері әрдайым әр істе белсенділік танытып отыратынын айрықша атап өтті.
-Құрметті Айтқазы Сейітұлы, ардагерлерімізбен осындай келелі жиын өткізгеніңіз үшін көптен-көп рақмет. Үржарлық ақсақалдардың берекесі мен бірлігі жарасқан. Алдағы уақытта бірлесе жұмыс істеуге шақырамын,- деді қорытынды сөзінде аудан басшысы Серік Зинабекұлы.
Аталмыш жиын барысында ауданымыздың белсенді ардагерлері С.Сапаров, Ж.Жақанбаев, Ш.Кәкімжанов, Қ.Етекбаева, А.Жанұзақовалар сөз алып, облыстық ардагерлер алқасының төрағасы А.Шерубаевтың алдағы жұмысына табыстар тіледі. Сондай-ақ аудан әкімі Серік Зинабекұлына бір ауыздан ардагерлерге деген қамқорлығы үшін ризашылықтарын білдіріп, жылы лебіздерін жеткізді. Өмірдің сан өткелінен өткен ардагерлер қауымы жақсы істердің жаршысы болуға, жастарға тәлімді тәрбие беріп, Үржардың шоқтығын биіктен көрсетуге атсалысамыз деп тарқасты.
Бауыржан ЖАҚЫП, «Семей таңы»
