Семей қаласының Ақпарат орталығында көктемгі санитарлық тазалық жұмыстарының басталуы және көгалдандыруға байланысты межеленген шаралар жөнінде БАҚ өкілдері үшін баспасөз мәслихаты болып өтті.
Басқосуға Семей өңірі бойынша Тұтынушылар құқығын қорғау басқармасының басшысы Бағлан Шегедеков, ТҮКШ бөлімінің сектор меңгерушісі Ерлан Уәлиев келіп, тың мағлұматтармен бөлісті.
Аталмыш басқосуға келген қаланың бас санитары Бағлан Шегедеков көктемнің келуімен қала ішіндегі тазалық жұмыстарының басталатынын жеткізді. Қазіргі күні шаһардағы санитарлық тазалықтың сын көтермейтінін жасырмаған Бағлан Салихұлы бүгінгі таңда қала әкімінің қаулысымен тазалыққа байланысты экологиялық екі айлық басталғанын жария етті. Яғни, қаламыздағы барлық мекемелер бойынша және жеке секторлардағы тұрғын үйлер бойынша сенбіліктер ұйымдастыруды қолға алу қажеттігі туындайды. Қазіргі күні қалалық әкімдік учаскелік полиция қызметкерлерімен бірге арнайы рейд жүргізіп, тексеру шараларын ұйымдастырмақ. Бұл ретте тазалыққа мән бермеген және айналасының қоқыстануына жол берген немқұрайлы тұрғындар әкімшілік жазаға тартылады. Оларға салынатын айыппұл көлемі де қомақты болмақ. Атап айтсақ, заңды тұлғалар үшін салынатын айып көлемі 10-нан 100 айлық есептік көрсеткішке дейін жететін болады. Сол себептен де барлық тұрғындар өз тұрғын үйлері мен өздеріне қарасты нысандар аумағында тазалық шараларын жүргізулері шарт.
Қазіргі күннің өзінде қала көшелеріндегі тазалық жұмыстарын жүргізуге қызу ден қойылуда. Бұл мақсатта 25 техникалық бірлік шаһар көшелерінде жұмыс істеуде. Бұған қоса сәуір айында үш рет жалпықалалық сенбіліктер ұйымдастырылатын болады.
Сонымен қатар жиналған БАҚ өкілдері алдында ТҮКШ бөлімінің сектор меңгерушісі Ерлан Уәлиев да алдағы уақытта қаламызда атқарылатын абаттандыру, көркейту шаралары қатарымен таныстырып өтті. Атап айтсақ, Орталық алаң мен Жеңіс саябағына ағымдағы жөндеу жұмыстары жүргізіледі. Оның ішінде аспашамдар, сәкілер жаңартылатын болады. Мұнымен қоса шаһар ішіндегі бірқатар аумақтардағы гүлзарлардың дизайны өзгертілмек. Биылғы жылы қала бойынша 24,02 мың шаршы метр жерге гүл егіледі. Оның ішінде сәндік бағытта өсірілетін петуния, астра, георгина, кохия және раушан тұқымдас гүлдерге орын берілмек. Әлбетте, көктемгі көшет отырғызу ісі де жүйелі түрде жүргізілетін болады. Осы орайда қолға алынатын барлық жұмыстарға пәтер иелері кооперативтері де тартылмақ. Қорыта айтқанда, қаламыздың әдемі келбетін сақтау мақсатындағы жұмыстар, жылдағы дағдыға сай, биыл да жалғасатын болады.
Ал қаладағы Орталық алаңнан салынып жатқан субұрқақты алдағы мамыр айында ашу көзделуде. Өткен жылы 80 пайыз жұмыстары аяқталған жаңа нысанның қала көркін еселей түсетіні анық. Бұған қоса қаланың орталық бөлігіндегі жаңғырту жұмыстары биыл да ширатыла түспек. Атап айтсақ, алаңға 120 түп шырша көшеттері отырғызылып, жаңадан брусчаткалар салынбақ. Және де қала көшелерінің эстетикалық әдемілігін арттыру мен тұрғындар қауіпсіздігін сақтау мақсатында көріксіз әрі шіріген ағаштарды қию ісі де тұрақты түрде жүргізілмек.
Осы мәліметтер жайында пікір бөліскен мамандар барша қалалықтарды тазалық айлығын өткізу ісіне барынша сергек қарап, өз аумақтарында тиісті талап тұрғысындағы жұмыстарды жүргізуге шақыру керектігін жеткізді. Баспасөз мәслихаты соңында қатысушылар тақырып аясында сұрақ-жауаптармен алмасты.
Қуаныш ЖОЛЫМБЕТ, «Семей таңы»
