Семейде ғасыр жасаған қарияларға қала әкімдігі құрмет көрсетті. Семей қаласы әкімінің орынбасары Надежда Шарова қаладағы 100 жасқа жеткен үш көнекөз қариялардың шаңырағында болып, гүл шоқтары мен сый-сияпаттарын табыс етті.
Қала әкімінің орынбасары Надежда Васильевна алдымен Березовка кентіндегі Күнгей көшесінде тұратын жасы ең үлкен қарт ана Зейнезайп Шукшумбаеваның үйіне аялдады. Надежда Васильевна қарт әжейді қазақ тілінде құттықтап, өзінің жылы лебізін білдірді.
– Ғасыр жасап, көпті көрген қариясыз, заманыңызда ба-сыңыздан небір қиын сәттерді өткіздіңіз. Өмір ағымында тағдырдың тәлкегіне қарсы тұрып, әрқашан адамгершілікті бәрінен жоғары қоя білген рухы мықты, жүрегі таза, мейірімі мол ана тұлғасымен шыңға шықтыңыз. Жүз жас – Алланың берген сыйы, еңбегіңіздің зейнеті, туған – туыстарыңыздың ырыздығы,- деді қала әкімінің орынбасары Надежда Шарова.
Зейнезайп әжей дәл осы күні, яғни 12 сәуірде, 100 жасқа толып отыр екен. Ұзақ жасаған қария әлі де тың. Құр қарап отырмайтын әжей бау-бақшада жұмыс жасағанды ұнататын көрінеді. Кейуананың ұзақ жасауының сыры да оның осындай еңбекқорлығында дейді жақындары. Әжейдің өмір жолы сан қилы. Сұрапыл соғыс кезінде, соғыстан кейін де талай қиындықты басынан өткерген Зайнезайп әжей еңбекқорлығының арқасында ешбір ауырып көрмеген екен.
– Мен өмірі ауырған емеспін, ауруханаға да жатып көрмеппін. Дәрі-дәрмек те ішкен емеспін. Соғыс жылдары балалар үйінде жұмыс істедім. Колхоз жұмысына да араластым. Талай қиын жағдайлар бастан өтті. Өзімізде жоқ болса да барымызды майданға жіберіп отырдық. Бір күнде қаншама адам майданға аттанатын, жылап-еңіреп қалатынбыз. Енді соғыс болмасын, еліміз аман, жұртымыз тыныш болсын,- дейді көнені көрген қарт әжей. Тыл еңбеккері бүгінде екі ұлдан отыздан астам ұрпақ сүйіп, бақытты ғұмыр кешуде.
Қарт әже Александра Красильникова 10 сәуір күні 100-ге толды. Семей қаласында дүниеге келген қария да сұрапыл соғыс жылдары талай қиындықты бастан өткерген екен. Нагорная көшесінде тұраты Мария Коваленко да 100 жасқа толды. Өңіріміздегі колхоз-совхоздарда жұмыс істеп, кейін зейнетке шыққан. Тыл еңбеккері – бүгінде немере, шөбере сүйіп отырған ардақты ана, бақытты әже.
Айта кетейік, биылғы жылы шаһарда 100 жасқа толатын 11 қария бар. Бүгінгі күнге дейін қалалық әкімдік жеті қарияны ғасыр тойымен құттықтап шыққан. Жергілікті әкімдік жыл бойы ғасыр жасаған қарияларымызға құрмет көрсетіп, әрбірінің үйіне баруды жоспарлап ортыр.
– Қарияларға қамқорлық жасау Елбасының да ұдайы назарында болып келеді. Біз көпті көрген үлкен кісілердің өмірлік тәжірибелерін үлгі-өнеге ете отырып, кейінгі буын жастарға ұлағатты тәрбие бере аламыз,- дейді қала әкімінің орынбасары Н.Шарова.
Асан МЫРЗАХАН,
«Семей таңы»
