ҚазИГЗУ-дің әскери кафедрасында, Жеңіс мерекесінің 71 жылдығына және Қазақстан Республикасы Қарулы Күштерінің 24 жылдығына орай, әскери шеру болып өтті. Аталмыш шара Ашық есік күні түрінде өткізілгендіктен, негізінен, әскери қызметті меңгеруге ден қойған студент жастардың өмірі жайында мағлұмат беруге басымдық берілді. Сондықтан болар, бұл күні ұзын-сонар баяндамалар мен концертке емес, жастардың әскери өнерді қаншалықты меңгергендіктеріне назар аударылды.
Аталмыш шараны өткізуде әскери кафедра басшысы, полковник А.Б.Сақауовтан бастап оқу взводтарының кураторлары да белсенділік танытты. Ал әскери өнерге машықтанушы студенттер өнерін бағалау үшін «Шығыс» өңірлік әскери қолбасшылығы мен қалалық әкімдік, «Нұр Отан» партиясының қалалық филиалының және қалалық қорғаныс істері басқармасының өкілдері жиналған екен. Сонымен қатар әскери шеруді арнайы тамашалау үшін әскери кафедрада оқуға ниет еткен университеттің өзге де жастары мол жиналды.
Студенттер даярлығы да жоғары деңгейде екен. Салтанатты әскери шеруге қатысушы жастар адымдау өнері түрінен өз біліктіліктерін байқата білді. Ал осыдан соң әрбір сарбаз меңгеруге тиіс әскери ұрыс қимылдарын орындауға кезек берілді. Атап айтсақ, осыған дейін студенттер АКМ автоматынан оқ жаудыру, электронды тир бойынша ПМ пистолетінен оқ ату бойынша өзара сайысқа түскен болатын. Сонымен қатар батылдық танытқандар сарбаздар спорттық снарядтар мен қол гранаталарын қалай пайдалану керектігін көрсетіп берген еді. Ал түстен кейінгі салтанатты жиын барысында әскери кафедра тәлім алушылары бір кісідей сапқа тізіліп, кафедра туын қарсы алды.
Ашық есік күнінің ашылу салтанатына университет ректоры, саяси ғылымдар докторы Шырын Құрманбаева арнайы келіп, тәлім алушы студенттер мен кафедра оқытушылары алдында ізгі лебіз білдірді. Мерекелік митинг барысында генерал-майор А.Мартынов, соғыс ардагері П.Коломин, Семей қалалық ішкі саясат бөлімінің бас маманы Ю.Осьмаковтар да жиналған қауым алдында пікір білдіріп, аталмыш кафедрада дәріс алушы жастарға арнап құттықтау тілек білдірді.
Осыдан соң бірден әскери шеру өткізілді. Запастағы полковник А.Тойкеновтің нұсқауымен әскери кафедрадан тәлім алған студенттер өз өнерлерін ортаға салды. Яғни алдымен саптық ән айту машықтарын көрсетті. Ал осыдан соң жастар оқу взводының кураторы И.Лагустың нұсқауымен қолма-қол ұрыстың 15 тәсілі бойынша жаттығуларды орындады. Студенттердің қимыл-әрекеттері кәсіби шеберлерден еш кем түскен жоқ. Тамашалаушы жұртшылық тәнті болғандарын жасырмады.
Осыдан кейін кафедра тәлім алушылары арнайы жабдықталған алаңда ерекше іс-қимыл үлгілерін көрсетті. Яғни отты шеңберден секіріп өтіп, түрлі кедергілерден қарғып, еңбектеп, жүгіріп өту сияқты қимыл-әрекеттер арқылы әскери өнерді қаншалықты дәрежеде меңгергендіктерін дәлелдей білді. Бұл шаралардың барлығы да олардың ұстаздарының, әскери сала мамандарының қадағалауымен ұйымдастырылған болатын.
Аталмыш шараны өткізудегі бір мақсат жастарға әскери-патриоттық тұрғыда тәрбие беру, бойларында жауынгерлік рух қалыптастыру һәм болашақ әскери өмірге бейімдеу болатын. Кафедра ұстаздары бұл мақсаттарға қол жеткізе алды деп білеміз. Себебі барлық қатысушы студенттер жоғары дәрежеде өнер көрсетіп, талап үдесінен табыла білді.
Танымдық-тағылымдық тұрғыдан берері мол мұндай шаралар алдағы уақыттарда да өткізіліп тұратынын айтады пікір білдірген ұстаздар қауымы.
Қуаныш ЖОЛЫМБЕТ, Семей таңы»