Орталық алаңда шаһарымыз бойынша дәстүрге айналған «Мамандығымды мақтан етемін» атты акция ұйымдастырылды. Жыл сайын өткізілетін аталмыш шараның негізгі мақсаты мектеп бітіруші түлектерге, сонымен қатар өзге де жастарға мамандық таңдауда дұрыс бағыт-бағдар беру, кәсіби-техникалық білімнің маңыздылығын көрсету, жұмысшы мамандықтарын насихаттау болатын.
Биылғы жылы да түлектер үшін маңыздылығы жоғары саналатын акцияға қаламыздағы 29 колледждің ұжымдары толық қатысты. Бұл шараға арнаулы білім беретін мекемелер өкілдерінің жоғары даярлықпен келгендіктері байқалып тұрды. Орталық алаңды бойлай орналасқан мамандықтар көрмелерінен қаламыздағы әрбір колледждің кәсіптік білім берудегі әлеуеті туралы мол мағлұмат алуға болатын еді. Сонымен қатар техникалық, медициналық, аспаздық мамандықтар бойынша оқытатын оқу орындарының студенттері де кеңес сұрап келгендер үшін тиісті мәліметтер беріп жатты. Қызығушылық танытушылар арасында әсіресе биылғы жылы мектеп бітіретін түлектердің ата-аналары мен туыстары мол болды.
Ал осынау сәттерде алаң төріне көтерілген облыстық білім басқармасы басшысының орынбасары А.Нурсеитова, қала әкімінің орынбасары Н.Шарова, Шығыс Қазақстан облысы техникалық және кәсіби білім беру ұйымдары директорлары облыстық кеңесінің төрағасы О.Сартаевтар аталмыш акцияға орай өз пікірлерін білдірді. Акцияның берер мүмкіндігінің жоғары екенін атап өткен қала әкімінің орынбасары Надежда Васильевна ағымдағы жылы алтын ұяларымен қоштасқалы отырған түлектерге мамандық таңдауға бейжай қарамауға шақырды.
Ал өз пікірін білдірген ШҚО Кәсіпкерлер палатасы Семей қалалық филиалының директоры Ардақ Әділжанов барша түлектерді өз болашақтарымен ұштастыратын мамандықтар таңдауда дұрыс шешім қабылдауға үндеді. Ардақ Әділғазыұлы айтып өткендей, бүгінгі таңда өңіріміздегі кейбір кәсіп иелеріне сұраныс аса жоғары болса, кейбіріне керісінше. Мәселен, дәнекерлеуші мамандықтарын игерген жұмысшылардың жасы бүгінде 50-60 жасты құрайды екен. Яғни, жастар аталмыш кәсіпке бара бермейді. Нәтижесінде аймағымыздағы құрылыс, қайта жөндеу саласы бойынша аталмыш кәсіп түріне деген тапшылық қалыптасқан.
«Мамандығымды мақтан етемін» акциясы аясында шараға қатысқан мектеп директорлары, мектеп бітірушілер мен олардың ата-аналары сонымен қатар арнайы ұйымдастырылған концерттік бағдарламаны да тамашалады.
«СТ» – ақпарат
