Мамыр айының алғашқы парағын біз жылдағы дәстүрмен халқымыздың достығы мен татулығын, бейбітшілігі мен мызғымас бірлігін айғақтайтын мемлекеттік мереке – Қазақстан халқының бірлігі күні ретінде салтанатпен атап өтеміз.
Бұл күн — әрбір қазақстандық үшін Отанға деген сүйіспеншілік пен патриоттық сезімнің, азаматтық борыш пен жалпыұлттық келісімнің мерекесі.
«Біздің ең басты құндылығымыз – Тәуелсіздік»,- деп Елбасымыз ұлықтағандай, сол құндылықты қастерлеу — баршамыздың қасиетті парызымыз. Тәуелсіздігіміздің 25 жылдығында алған асуларымыз бен жеткен жетістіктерімізде еліміздегі барша ұлт өкілдерінің еншісі бар. Осындай табыстарға қол жеткізуде Семей жұртшылығының да өзіндік үлесі мол. Себебі еліміздегі барлық ұлттардың татулық пен келісімде өмір сүруінің арқасында баршамыз алаңсыз ғұмыр кешіп, білім алып, еңбек етудеміз.
Халық бірлігі мерекесі күні ел азаматтары ұлттар пен ұлыстың өткен кезеңдегі тарихы мен оның сабақтарын дәріптеп, әлемдік қауымдастық тарапынан жоғары бағаланған қазақстандық татулық пен келісімді паш етеді.
Қымбатты жерлестер!
Айтулы мерекемен шын жүректен құттықтай отырып, баршаңызға зор денсаулық, отбасыларыңызға құт-береке, бақыт тілеймін.
Мерекелеріңіз құтты болсын, жерлестер! Тәуелсіз еліміздің еңсесі биік, тұғыры берік, болашағы мәңгілік болсын!
Құрметпен,
Семей қаласының әкімі Ермак Сәлімов
Қалалық мәслихаттың хатшысы Бейсенбек Ақжалов
