«Нұр Отан» партиясы Семей қалалық филиалының төрағасы, қала әкімі Ермак Сәлімов азаматтарды жеке сұрақтары бойынша қабылдады.
Қала әкімінің жеке қабылдауына жалпы саны 10 адам жазылып, өздерін толғандырған сауалдарға нақты жа-уаптар алды. Келіп түскен өтініштердің дені қоғамдық маңызы бар мәселелер. Олардың арасында әлеуметтік көмек көрсету, көшелердің жарықтандырылуы, ауыз су мен тұрғын үй мәселелері сөз болды. Əр адамның өтініші мен ой-пікірі мұқият тыңдалып, заң аясында жауаптар берілді.
Жеке сұрағымен келген азаматтардың бірі — Қанат Кемерханов. Ол қаламыздағы 35-ші, 40-шы ықшам аудандары тұрғындары атынан аталмыш аудандардағы көшелердің жарықтандырылуы мен тұрғын-үй аулаларын абаттандыруға қатысты мәселелерін жеткізді. Аталмыш мәселелер бойынша қала әкімі тұрғын-үй — коммуналдық шаруашылық бөліміне алдағы 2018 жылы қаламызда жүзеге асырылатын «Менің аулам» атты ауқымды арнайы бағдарлама аясында мүмкіндіктерді қарастырып, тұрғындар арасында бағдарламаға қатысу бағыттарын түсіндіру жұмыстарын жүргізу жөнінде тапсырма берді.
Әлеуметтік көмек сұрап келген 2 бала тәрбиелеп отырған жалғыз басты ана Индираға Жаңа жыл қарсаңында партия филиалы тарапынан материалдық көмек көрсетілетін болып шешілді.
Қабылдау барысында қойылған барлық сұрақтарға қала әкімі Ермак Бидахметұлы қолданыстағы Қазақстан Республикасының заңдарына сәйкес жауап беріп, азаматтардың өтініш-ұсыныстарын негізге ала отырып, әрбір азаматтың арыздарының дәйектілігін мұқият зерделеп, өзі қатаң бақылауға алатынын жеткізді.
Дархан ЖҰМАДІЛОВ, «Нұр Отан» партиясы Семей қалалық филиалының қоғамдық қабылдау бөлімінің меңгерушісі.
