Семей қалалық мәслихатының депутаттары қашанда өз сайлаушыларының әлеуметтік-тұрмыстық мәселелерін шешу бойынша келелі істердің басы-қасында жүретінін күнделікті өмірдің өзі көрсетіп келеді. № 5 қалалық сайлау округі бойынша қалалық мәслихат депутаты Айдар Ғаббасұлы Ибраевтың өз сайлаушыларының әлеуметтік мәселелерін шешудегі атқарған жұмыстары ауыз толтырып айтуға тұрарлық. Айдар Ғаббасұлы «Менің мектебім» акциясы аясында өз сайлау округіндегі №5 және 27 мектептерге және «Ертіс» балалар аула клубының керек-жарақтарына демеушілік жасап келеді. — Айдар Ғаббасұлы айтқан өтінішімізді жерге тастамай, екінші рет 9 қабатты Қостанай көшесіндегі 75-ші үйдің екінші подъезінің тұрғындары үшін жеделсатыны іске қосуға қол ұшын созды. Былтыр Тәуелсіздік күні қарсаңында осы тұрғын үйдің 1-ші подъезіне жеделсаты орнатып берген болатын. Енді екінші үйдің тұрғындарының алғысына бөленіп отыр,- дейді «Қостанай-79» ПИК төрайымы Ділда Желдыбаева. Тұрғындарға 1996 жылдан бері арман болған жеделсатының іске қосылуына қала басшысы Ермак Сәлімов қатысты. Қала әкімі қаламыздың көркеюі жолында жасалатын істер жайында пәтер иелерімен ой бөлісіп, қуаныштарына ортақтасты. Осылайша, жергілікті өкілетті билік тарапынан қала тұрғындарының әлеуметтік-тұрмыстық мәселелерін шешуге арналған тағы бір құтты қадам жасалды.
Серік ӘБІЛҚАСЫМҰЛЫ, Семей қаласы.
