Ардақты оқырман! Міне, тағы бір жылды тарих қойнауына тапсырып, жаңа жылмен қауышатын сәт те таяу қалды. Әр адамның ескі жылды шығарып салып тұрып, өткеніне көз жүгіртіп, жыл бойғы істеріне баға беруі заңдылық. Сонымен, өткен Тауық жылы несімен есте қалды, Ит жылынан не күтеміз деген сауалға бір сәт ой жүгіртейік.
2017 — Тауық жылы жайлы әр қилы жорамал айтқан сәуегейлердің пікірлері қаншалықты шындыққа жанасқанын кім білсін, ең бастысы, Қазақстан «ЭКСПО-2017» көрмесін өткізу бақытына ие болып, әлемді өзіне қаратты. Еліміз Универсиада ойындары, ШЫҰ саммиті сияқты маңызды халықаралық оқиғалардың саяси алаңына айналды. Халқымыз үшін тыныштық пен тұрақтылық сақталған сәтті жыл болғандығына тәубе деуіміз керек.
Елбасы Қазақстан халқын ұлттық кодты сақтауға, тарихты қастерлеуге, туған жерді түлетуге, дәстүрдің озығын сақтап, тозығын тастауға шақыратын «Болашаққа бағдар: рухани жаңғыру» атты бағдарламалық мақаласын жариялады. Ұлт Көшбасшысының бұл еңбегін қазақстандықтар Тәуелсіздігін алған еліміздің жаһандану дәуіріндегі рухани кеңістігіміздің жаңа бастауы деп қабылдады.
2017 жылы халқының азаттығын аңсап, қазақ зиялыларының басын біріктірген «Алаш» партиясының құрылғанына 100 жыл толды. Ұлт ардақтыларының үні болып Семейден шыққан, тәуелсіздік жолындағы күрес идеологиясының қалыптасуына қызмет еткен «Сарыарқа» газетінің жарық көргеніне 100 толуы аталып өтті. Сан жылдар бойы тарих қойнауында атаусыз қалып келген басылым тарихын таразылау мүмкіндігіне ие болғанымызды да тәуелсіздігіміздің тартқан сыйы деп қабылдадық.
«Семей таңы» газеті бетінде жыл бойы талай бастамалар көтерілді. Оқырмандармен ұлт мүддесі, тіл тағдырына қатысты ой бөлістік. Есімдері ескерусіз қалып келе жатқан ардақтылар рухына құрмет көрсету жайлы жазылған талай мақалалар жарық көрді. Барлығы болмаса да бірқатар бастамаларымыз биліктің құлағына жетіп, қолдау тапқанын да айта кеткен артық болмас. Семейдің орталық көшесінен Алаш көсемі Әлихан Бөкейхановқа ескерткіш қойылып, біздің редакция орналасқан көшеге Қайым Мұхамедханов есімі берілгенін бүгін мақтаныш сезіммен жеткізе аламыз.
Тарихы сонау «Сарыарқадан» басталатын бүгінгі «Семей таңы» газеті кешегі бабалар өсиетіне адалдық пен жас ұрпақты отаншылдық рухта тәрбиелеуге үлес қосуды басты бағдар етіп ұстап отыр.
Елбасы Нұрсұлтан Назарбаевтың латын әліпбиіне көшу туралы бастамасын Қазақстанда бірінші болып қолдаған біздің «Семей таңы» газеті болғаны да өткен жылдың айта кетуді қажет ететін айшықты оқиғаларының қатарында деп есептейміз. Латын әліпбиімен жазылған тұңғыш мақала республика бойынша біздің газетте жарық көрді.
Еліміздегі жетекші партия «Нұр Отанның» — «Нұр Сұңқар» байқауында ең үздік аймақтық басылым деп танылып, жеңімпаздар қатарында болдық. Геннадий Толмачев атындағы сыйлықтың жүлдесі де бізге бұйырды. Республикамызда өткен тұңғыш «Үркер» байқауында сайысқа түскен 600 БАҚ арасында алдыңғы үштіктің бірі болғанымызды да газет жұмысына республикалық деңгейде берілген баға деп есептейміз. Облыс әкімі Даниал Ахметовтің жүлдесі де биыл бізге бұйырды. Жыл соңында аймақ басшысы Даниал Ахметов біздің газетке арнайы сұхбат беріп, облыстың өткені мен болашағы жайлы ойларын «Семей таңының» оқырмандарымен бөлісті.
Сонымен, 2017 жыл да аяқталды. Байқап отырған боларсыздар, «Семей таңы» газеті үшін өткен жылдың есте қалар жарқын сәттері аз болған жоқ. Алайда біздің ең басты байлығымыз бен қолдаушымыз өздеріңіз деп білеміз, ардақты оқырман! Редакция қызметкерлері жыл бойы өздеріңізбен тығыз байланыста болды. Көшпелі редакция оқырманы көп аудандардың барлығын аралап, әр өңірге айқара бет арнадық.
2018 жылға баспасөзге жазылу науқаны да аяқталды. Қазақ мал мен жанды санамайды ғой, тіл мен көзден сақтанғандықтан шығар. Дегенмен оқырман санының азаймағанын айта кеткен орынды болар. Газетіміздің таралым аумағы кеңейді. Жаңа жылдың оқырмандары қатарын күршімдіктер толықтырды. Баспасөзге жазылу мәліметтеріне қарағанда, Абай ауданындағы соңғы жылдары жоғалтып алған оқырмандарымыз қайта оралған сияқты. Жаңа жылға жоспарланған істер де аз емес.
Келіп қалған жыл — халқымызда жеті қазынаның бірі саналатын Ит жылы. «Адамның досы болып саналатын жануар адалдықты жақсы көреді. Еңбекқор, шыдамды, алға қойған мақсат-міндеттерді орындау жолында табанды жандарды қолдайды. Көтеріңкі көңіл-күйді, ойын-сауықты ұнатады. Бірақ арамдықты, әділетсіздік пен өтірікті кешірмейді. Ит — адал ойынның жақтасы, жыл соңында әр адамды еңбегіне, таза ниетіне қарай марапаттайды, жауапкершілікті талап етеді» деген жұлдызшылар жорамалының қаперімізде жүргені артық болмас.
Ардақты оқырман, Сіздерге келіп жеткен 2018 Жаңа жылдың жағымды жаңалықтары мен толағай табыстары көп болып, қолға алған әр игі істеріңіз бен жаңа бастамаларыңызға сәттілік серік болсын! Жаңа 2018 жыл әр шаңыраққа құт, береке, ырыс алып келсін! Ит басына іркіт төгілетін молшылық жылы болсын деген тілек айтқым келеді!
Құрметпен, РИЗА МОЛДАШЕВА.