Кеше, 28 желтоқсан күні, Семей қаласының әкімі Ермак Сәлімовтің балаларға арналған жаңа жылдық шыршасы өтті. Қала әкімінің шыршасына ата-анасының қамқорлығынсыз қалған, аз қамтылған және көпбалалы отбасылардың балалары қатысты.
Балалар мен жастардың шығармашылық сарайында өткен биылғы мерекеге 150 оқушы қатысса, оның 30-ы қала маңындағы ауылдық мектептерден келіпті.
«Қымбатты балалар! Баршамыз асыға күтетін жарқын мереке Жаңа жылға санаулы күндер ғана қалды. Мен сендерді алда келе жатқан Жаңа жылмен шын жүректен құттықтаймын! Осынау шырша тойы естеріңде қалатын ерекше кеш болады деп сенемін. Сендер берекелі, бейбіт елде өсіп келе жатқан бақытты ұрпақсыңдар. Халқымыз «Өсер елді өскелең ұрпағынан таниды» деген сөзді бекер айтпаған.
Ата-ананың үкілі үмітін ақтайтын да, туған еліміздің асқақ рухын сақтайтын да сендер. Сондықтан біз сендердің ақылды да алғыр, зерделі де зерек болғандарыңды қалаймыз.
Айналайын, балалар! Мен бәріңе мол игілік, жарқын болашақ тілеймін. Балалық шақтарың базарлы, өмірлерің ажарлы болсын. Жаңа жылда армандарың орындалып, тәуелсіз елімізбен бірге өсіп-өркендей беріңдер! Мерекелеріңмен!»-деген Президенттің қазақстандық барша балаларға арналған құттықтауынан соң оқушылар жаңа жылдық қойылымдарды тамашалады.
Қойылым барысында жас жеткіншектер ертегілер әлеміне сапар шегіп, Аяз атамен және Ақшақармен кездесті. Түрлі тосқауылдарға төтеп беріп, балаларға жаңа жылдық көңіл-күй сыйлаған олардың сиқырлы қоржыны да бос болған жоқ. Көңілдері шат-шадыман балғындар Аяз атамен және Ақшақармен естелік суретке де түсті.
Жадыра ТӨЛЕГЕНҚЫЗЫ, «Семей таңы»
