Семей қалалық әкімдігінде өткен аптада шаһар басшысы Ермак Сәлімов «Бақылау» онлайн порталына қатысты жиын өткізіп, кейбір бөлімдердің жұмыстарына ескерту жасады.
«Бақылау» сайты қала тұрғындарына қызмет көрсету сапасын жақсарту мақсатында былтыр қыркүйек айында іске қосылған болатын. Алайда, қала басшысы атап өткендей, нәтиже ойдағыдай болмай тұр.
— Кейбір тұрғындардың сұрақтары жауапсыз қалған. Жедел шешілуі тиіс мәселелер сөзбұйдаға салынған. «Цифрлы Қазақстан» бағдарламасында «Бақылау» жүйесінің өзіндік орны бар. Сондықтан сайт жұмысын жақсарту керек. Ал ескертуге құлақ аспағандарға шара қолданылатын болады. Осы орайда білім бөлімі, ішкі саясат бөлімі, дене шынықтыру және спорт бөлімі, тұрғын үй-коммуналдық шаруашылығы бөлімдеріне жолданған сауалдарға межелі уақытынан кешіктірмей жауап қайтаруды тапсырамын. Жүйеге келіп түсетін сұрақтар мен өтініштерді күнделікті мониторингтен өткізетін жауапты тұлғаларды тағайындау керек. Регламент бойынша жауап екі апталық мерзімде берілетін болса да, оны жеделтетуге болады,- деді Ермак Сәлімов.
Сайтқа осы уақытқа дейін 286 сауал жолданса, оның 200-і алғашқы үш айда келіп түскен. Соңғы уақытта тұрғындардың белсенділігі 57 пайызға төмендепті.
— Бұған бірден-бір себеп — сауалдардың назардан тыс қалуы немесе жауаптың ұзаққа созылуы. Қала әкімінің онлайн қабылдауы деген айдар ашып, тізімде тұрған көпшілік тұрғынның сауал жолдауына мүмкіндік жасау қажет,- деді сайт модераторы Әлия Сансызбай.
