Семейліктер Жаңа жылды жағымды жаңалықпен қарсы алды. 30 желтоқсан күні 20 су жаңа автобус қалаішілік жолға шықты. Олардың барлығы да жаңадан құрылған автобус паркіне тиесілі. Қала әкімі Ермак Сәлімов желіге шыққан қоғамдық көліктің біріне отырып, автобустарға өз бағасын берді.
Дәл осы күні шаһардың Орталық алаңында жиырма көлікті жиып, жаңа автобустардың алғашқы техникалық тұсаукесерін өткізді. Бұл айтулы оқиға шын мәнінде қаламыздағы қоғамдық көлік қатынасының қайта жандана һәм жаңғыра бастағанын білдіреді. Өйткені жаңа техниканы жақында ғана құрылған автобус паркі сатып алып отыр. Бұл турасында аталған автобус паркінің директоры Асқар Зияданов:
— Семейдің қалалық жолаушы тасымалы көліктерінің жағдайы онша мәз емес. Бағыттарда ескі автобустар өте көп. Техниканың 70%-дан астамы 20 жылдан аса қызмет етіп келеді әрі заманауи талапқа еш жауап бермейді. Сол себепті біз қаламызда ең алдымен өз сапасы жағынан өзгелерден ерекшеленіп тұратын автобус паркін құруды жөн деп шештік,- деді.
Қазіргі жолаушыларға ұсынылып отырған автобустар өзінің сыртқы түрімен ғана емес, қолайлылығымен де жолаушылардың көңілінен шығатынына шүбә жоқ. Автобус паркі басшысының айтуынша, көліктерді сатып алу кезінде өңіріміздің жол жағдайы мен күн райының ерекшеліктері ескеріліпті. Әрі мүмкіндігі шектеулі жандарға жағдай жасалу жағы да қаперге алыныпты.
— Бұл маңызды оқиға Семей қаласының қалаішілік жолаушы тасымалы нарығына жаңа жолау-шы тасымалдаушының шыққанын паш етті. Автобустар уақыт талабына жауап беріп қана қоймай, жолаушыларға сапалы қызмет көрсетуді жаңа белеске көтеріп отырған жайы бар. Бірыңғай жаңа формадағы кондукторлар мен жүргізушілер кең де жайлы салонда отыратын жолаушылардың көңілінен шығатын болады.
Бұдан былай аталған автобустар №5 және №8 бағыттар бойынша жолаушы тасиды. Осы бағыт бойынша бұрын жүріп келген автобустар енді уақытша басқа бағыттарға қатынайды. Біздің қаланың тұрғындары оларға өздерінің жоғарғы бағасын беретін болады,- дейді жолаушылар тасымалын бақылау орталығының директоры Бейсенғазы Тастекеев.
Орталық алаңда шаһар басшысы Ермак Сәлімов желіге шыққан 20 автобус 2017 жылы бастау алған жолау-шы тасымалы бойынша кең көлемді жұмыстардың нәтижесі екенін, бұл бағытта атқарылатын ауқымды істер әлі де алда екенін атап өтті.
— Облыс әкімі Даниал Ахметовтің тапсырмасы бойынша қалада жолау- шы тасымалының сапасын жақсарту бағытында нәтижелі істер қолға алынып жатыр. Бұл жұмыстар өзіндік қиындықтарға толы болғанымен, қол жеткізген табыстарымыз баршамызға айқын. Осы орайда біз жан-жақты саралай отырып, жаңа автобус паркін құруға қол жеткізе алдық. Жолаушыларға барлық жағдай жасалған жаңа техникаға қол жеткізу жолында ішінде жергілікті «Гордорстрой» ЖШС бар көптеген инвесторларға қолқа салдық. Олар сөзге келмей, бизнестің әлеуметтік жауапкершілігі аясында көмек қолдарын соза білді. Бүгінгі таңда 2018 жылдың тамыз айына дейін басты бағыттардағы техникаларды жаңартатын боламыз. Ол үшін отандық өнім өндірушілерге арқа сүйейміз,- деді қала әкімі өз сөзінде.
Жаңадан құрылған жолаушы тасымалдаушы мекеме жақын арада автобус паркін елу автобуспен толықтыруды жоспарлауда. Мұның бәрі алдағы уақытта жолаушы тасымалы саласындағы қордаланған барлық мәселені шешіп бермесе де, қалаішілік жолаушылар тасымалының жақсаруына мүмкіндік туғызары сөзсіз.
Серік ӘБІЛҚАСЫМҰЛЫ, Семей қаласы.
