Әке – отбасының тірегі һәм қамқоршысы. Оның мінез-құлқы, өзгелермен қарым-қатынасы, өмірі мен білімі баланың көз алдындағы әлем.Осы ретте әкелердің бала тәрбиесіндегі рөлін арттыру мақсатында бейсенбі, 8 ақпан күні қалалық білім бөлімінің ұйымдастыруымен Балалар мен жастардың шығармашылық сарайында әкелер слеті өтіп, 300-ге жуық адам бас қосты. Ауқымды жиында «Әкелер кеңесінің рөлін күшейту жолдары», «Ата-аналардың ұрпақ тәрбиесіндегі жауапкершілігін арттыру», «Ұлды, ерді, әкені, патриотты тәрбиелейміз!», «Дені сау әке – дені сау бала», «Мәселені әкелер жолымен шешу» тақырыптары қозғалды.
2016 жылы шаһардың барлық білім беру мекемелерінде Әкелер мен Аналар кеңестері құрылған болатын. Осы жылдың 15-20 қаңтары аралығында қаламектептерінде әкелер слетінің мектепішілік кезеңі өтіп, оның аясында дөңгелек үстелдер мен спартакиадалар ұйымдастырылған. Байқау жеңімпаздары осы алқалы жиынға жолдама алыпты.
-Қаламызда әкелер слетінің жұмысын бастағанына екі жылдың жүзі болды. Осы уақыт аралығында әкелермен бірлесе бірқатар жұмыстар атқардық. Отбасында бала тәрбиесі көбіне аналардың мойнына жүктелетіні рас. Біз бұл сеңнің сетінегенін қалаймыз. Әкелер де мектеппен тығыз қарым-қатынас жасап, ондағы өмірге араласуы қажет. Бала тәрбиесінде әкелердің шет қалғаны дұрыс емес,- дейді білім бөлімінің бас маманы Сәуле Қожыбекова.
Салауатты өмір салтын қалыптастыру орталығының маманы Бауыржан Мұқашев әкелер денсаулығын нығайту жайлы әңгіме өрбітіп, маңызды мәліметтермен бөлісті.Салтанатты кеште «Әкелер кеңесінің үздік төрағасы» анықталды. Сондай-ақ мектепке арнайы демеушілік көмек көрсеткені үшін «Жомарт жүрек» иесі марапатталып, көп балалы әкелер «Даңқ сәті» аталымын иеленді. Білім саласында 45 жыл еңбек етіп келе жатқан 5 баланың әкесі, 6 немеренің атасы, №21 орта мектептің директоры Тоқтарбек Зейнелов көп балалы әкелерді марапаттады.Әсіресе көпшілік ықыласына бөленген №15 орта мектептен қатысқан 18 баланың әкесі Виктор Владимирович болды.
-Президентіміз «Болашаққа бағдар:рухани жаңғыру» мақаласында: «Егер жаңғыру елдің ұлттық рухани тамырынан нәр алмаса, ол адасуға бастайды»,- деп, ұлттық жаңғырудың негізгі алғышарттарын айқындап берді. Демек, көне дәуірлерден бастау алатын өзініңтарихи тәжірибесінен, игі салт, ізгі дәстүрлерінен мүлде қол үзген қоғамда жаңғыру мен жаңару мүмкін емес. Елбасы өз мақаласында отбасылық құндылықтарға да көп тоқталғанын білесіздер. «Әке-асқар тау, ана – мөлдір бұлақ, бала – жағасындағы құрақ» деген даналық сөз ұлттық тәрбиенің отбасылық өмірдегі рөлін айқындап тұрғандай. №23 жалпы орта білім беретін мектепте Әкелер кеңесі 2015-2016 оқу жылында құрылды. Әкелер кеңесін құрудағы мақсатымыз – ұлттық құндылықтарды сақтай отырып, әкелердің балаларды тәрбиелеудегі жауапкершілігін арттырып, жасөспірімдер арасындағы құқық бұзушылықтың алдын алу.Елбасы: «Жаңғыру атаулы бұрынғыдай тарихи тәжірибемен ұлттық дәстүрлерге шекеден қарамауға тиіс. Керісінше, заман сынынан сүрінбей өткен озық дәстүрлерді табысты жаңғырудың маңызды алғышарттарына айналдыра білу қажет»,- деп атап көрсетті. Ендеше, ардақты әкелер, Президентіміз айтқан тарихи тәжірибе мен ұлттық дәстүрлерді, құндылықтарды ата-ана болып, ұстаз болып, оқушылар болып бірге орындауға атсалысайық,- деді №23 мектептің Әкелер кеңесі төрағасы Ербол Елеусізов өз баяндамасында.
Ұрпақ тәрбиесі – ұлт болашағы. Әр бала, атаның қанымен, ананың сүтімен келетін туабітті қасиеттер сияқты, ұлттық рухани құндылықтарды ең алдымен отбасында бойына сіңіретіні анық. Ендеше, ұлттық тәрбиеұлт болып ұйысудың, ел болып ертеңге нық қадам басудың негізі болмақ.
Жадыра ТӨЛЕГЕНҚЫЗЫ, «Семей таңы»
