Шығыс Қазақстан облысының әкімі Даниал Ахметовтің тапсырмасымен Елбасы Жолдауындағы басты 10 міндетті түсіндіру мақсатында облыстық ақпараттық-насихат тобы құрылған болатын. Осы топтың құрамына бекітілген облыс әкімінің орынбасары Серік Ақтанов тарихи құжаттағы нақты 10 міндетке қатысты қаламыздағы техникалық колледждердің студент жастары және ұстаздарымен кездесу өткізді.
Кәсіби білім беру саласы және ел болашағының ертеңі сөз етілген алқалы отырысқа қала әкімінің орынбасары Николай Ушаков қатысты. Жолдау жолдарының талқыға түсуіне электротехникалық колледждің директоры Азат Толқынұлы Сарпеков төрағалық етті. Семей электротехникалық колледжі осындай басқосуға тегін таңдалып отырған жоқ. Білім ошағы өз саласында еліміз бойынша үздік білім беретін 10 колледждің қатарына енеді. Онда білім алып жатқан шәкірттерге еңбек нарығында сұраныс мол. Әрі студенттер теория мен тәжірибені берік ұштастырып жүргені де жасырын емес. Еуропа даму және қайта құру банкінен оқу мен білімді ұштастырған талапты студенттер өздері жасаған жобаға 1 миллион теңгенің грантын ұтып алған, бұл — ұжым ұстаздары үшін зор мәртебе, үлкен жетістік.
— Қазақстан дамыған елдер қатарына қарай батыл қадам басуда. Бұл жолы Ұлт Көшбасшысы цифрлы білім беру ресурстарын дамытуға бет бұрды. Кең жолақты интернетке қосу және арнайы білім беру ошақтарын заманға сай жабдықтау жұмыстарын жалғастыру міндеттерін алға қойды. Мұндай талаптарды орындауға қазір мүмкіндік өте көп. Біз, ұстаздар, заман талабына сай білім беруді қолға алып жатырмыз,- деді жиын шымылдығын ашқан Азат Толқынұлы.
Алқалы жиында облыс әкімінің орынбасары стратегиялық маңызды құжаттың ел дамуына жол ашатын басым бағыттарына тоқталды.
— Сіздер, жастар, бүгінгі алған кәсіптеріңізден өз нәсіптеріңізді табатын боласыздар. Кезі келгенде араларыңыздан алашқа танымал тұлғалар да шығады. Елбасы Жолдауындағы міндеттер сіздер білек сыбана кіріскенде жүзеге асады. Елбасы айтқандай, бүгінде көл-көсір мұнай дәуірі аяқталып келеді. Сондықтан қазір назар аударатын маңызды міндеттердің бірі – индустрияландыруды жолға қойып, «ақылды технологияның» қызығын көріп, агроөнеркәсіп кешенін дамыту. Бұған елімізде кеңінен мүмкіндік беріліп жатқанда, бізге еңбек өнімділігін арттырып, экспортқа бағытталған тауарларды молынан шығару қажет. Өндірісті жаңғырту жайы да ұмытылмауы тиіс,- деді Серік Қасымбекұлы.
Кездесуді қорытындылаған колледж басшысы:
— Бұл Жолдаудың мәні ерекше. Бүгінгі күннің өзекті мәселелері қозғалып, алдағы бағыттарымыз айқындалды. Соның ішінде бәріміз «Адами капитал – жаңғыру негізі» деген тарауға ерекше назар аударуымыз қажет,- деп сөзін түйіндеді.
Сондай-ақ жиында басты инвестиция – адами капиталға ерекше көңіл бөлінді. Білім беру сапасы ұдайы назарда тұруы қажеттігі айтылып, сұранысқа орай кәсіптік білім берудің маңыздылығы да сөз болды. Жолдауға қатысты талқылау біткен соң, облыс әкімінің орынбасары Серік Ақтанов Азат Сәрпеков басшылық ететін Семей электротехникалық колледжінің білім беру процесімен егжей-тегжей танысып шықты. Осындай биік дәрежеге жетіп отырған ұжым ұстаздарына облыс әкімшілігі атынан өзінің ризашылығын білдірді.
Серік ӘБІЛҚАСЫМҰЛЫ, Семей қаласы.
