Биыл Семей қаласы әкімінің халық алдындағы 16 есептік кездесуінде 22 мәселе бақылауға алынды. Сұрақтардың дені тұрғын үй-коммуналдық шаруашылық саласын қамтиды. Мәселелерді шешуге бағытталған жоспар қабылданды. Бұл туралы қала басшысы Ермак Сәлімов БАҚ өкілдерімен өткен баспасөз мәслихатында баяндады.
Қала басшысының есептік кездесулерінде қозғалған күрделі мәселелердің бірі ауыр сырқатқа шалдыққан Ділназ Әбуғалиға қатысты болды. 12 жастағы жеткіншек сирек кездесетін CINCA синдромымен туғаннан бері ауырады. Мұндай диагноз әлем бойынша 180 адамға, республикамызда Ділназға қойылған екен. Айта кету керек, аталмыш синдром медициналық көмек тегін көрсетілетін сырқаттар тізіміне енгізілмеген. Науқасты емдеу үшін «Канакинумаб» атты ресейлік препарат қажет. Оның бағасы да қымбат. Препараттың бір ғана ампуласы 31 млн. теңге тұрады. Алайда Ділназға толыққанды емдеу курсын жүргізу үшін жеті ампула керек. Ал қарапайым отбасында қомақты қаражат қайдан болсын? Осы мәселеге қатысты айтылған өтінішті жауапсыз қалдырмаған шаһар басшысы Ділназдың үйіне барып, ата-анасымен тілдесіп қайтқан-ды.
— Қиын сәттерді басынан өткеріп отырған жанұямен жүздестім. Мән-жайды сұрастырғаннан кейін мәселенің түйінін шешу жолында бірқатар шаралар қолға алынды. Біріншіден, ШҚО Денсаулық сақтау басқармасына CINCA синдромы ауруын кепілдендірілген тегін медициналық көмек тізіміне енгізу жөнінде сұрау (запрос) жіберілді. Бұл қыз баланың еміне мемлекеттік бюджеттен қажетті қаржы бөлуге мүмкіндік бермек. Өтініш назарға алынғанға дейін стратегиялық мәні бар мәселені шешуде Ділназдың отбасына қажетті қаражатты жинап беруге қол ұшын созуымыз керек. Жаны жомарт, қайырымды азаматтардың арқасында бір ампуланы сатып алуға жететін ақша жиналды. Бірақ науқас толық ем қабылдауы үшін бір ампула жеткіліксіз. Сол себепті біз меценаттардан, кәсіпкерлер мен мейірімді жандардан, сонымен бірге Семей қаласымен тығыз қарым-қатынас орнатқан бірқатар мемлекеттердің елшілерінен қолдау көрсетулерін сұрап, олардың әрқайсысына қаржылай көмек беру жөнінде өтініш жібердік. Сондай-ақ ем-дом шараларына қажетті соманы жинау мақсатында қайырымдылық акцияларын ұйымдастыруды да жоспарлап отырмыз,- деді Ермак Сәлімов.
Қазіргі күні Ділназдың ата-анасы жұмыс істемейді. Үлкен ұлдары қаладағы колледждердің бірінде білім алуда, ал 9 жасар қыздары сал ауруына шалдыққан екен. Бұл жағдайларды да назарға алған қала басшысы көмек беруге кірісіп кетіпті. Ағымдағы жылдың 1 наурызынан бастап Ділназдың әкесі тұрақты жұмыс орнымен қамтылмақ. Ал мүмкіндігі шектеулі балаларды қарап отырған үш баланың анасы әлеуметтік жәрдемақы алатын болады. Биыл колледжді тамамдағалы отырған тұңғыш ұлдарын «Жастар тәжірибесі» бағдарламасы шеңберінде жұмысқа орналастыру ісі де, баспана мәселесі де қарастырылу үстінде.
Әкім таяуда үйі отқа оранып, күлге айналған көпбалалы Ғабдуллиндер отбасын да назардан тыс қалдырмады. Қала басшысының қорытынды есеп беру жиынына қатысып, әкімнен көмек сұрай келген отанасы мен оның балаларына қазіргі уақытта, жеке тұлғалармен қоса, қоғамдық ұйым өкілдері де материалдық көмек көрсетіп жатыр.
Есептік кездесуде тұрғындар тарапынан Рыков көшесінің жолдарын жөндеуге қатысты өтініштер де болған еді. Осыған орай қала әкімі күн жылына салысымен аталмыш көше қалыпқа келтірілетінін мәлім етті. Бүгінде тиісті қаржы қарастырылды, сметалық құжаттар да дайын тұр. Жауапты мердігер компания анықталған бойда жұмысшылар 1,3 шақырым жолды жөндеу ісіне кіріспек. Ол үшін қазынадан 46 млн. 504 мың теңге бөлінетін болады. Айта кеткен жөн, биыл Ленин көшесін абаттандыру мәселесі де түбегейлі шешімін таппақ. Әкімнің сөзіне қарағанда, бөлінетін қомақты қаржыға 1,7 шақырымды қамтитын жол жөнделеді. Әрі Ленин көшесін «Мәңгілік Ел» деп өзгерту де көзделіп отыр. Жалпы, осы жылы қалаішілік жолдарды жөндеуге 2 млрд. теңгеден астам қаржы қарастырылған.
Журналистермен кездесуде кеңінен қозғалған мәселелердің бірі қараусыз жатқан кәріз құдықтарын жабу туралы мәселе болатын. Бірнеше рет адамның өмірін қиған ашық жатқан құдықтарды жабу үшін әкім тапсырмасымен арнайы комиссия құрылған екен. Әзірге қараусыз жатқан 45 құдық анықталып, қауіпсіздік шаралары жүзеге асырылды. Иесіз құдықтар түгелдей тізімге енгеннен кейін, олар «Зеленстрой» мемлекеттік коммуналдық кәсіпорнына тапсырылатын болады.
Семейліктерді толғандырған сұрақтар тиянақталған жиында қала әкімі осы және өзге де мәселелер бойынша жауапты мекемелер жұмыс атқаратынын атап өтті.
Жібек СЕРҒАЗЫ, «Семей таңы»
