Семей мемлекеттік медицина университетінде мектеп оқушыларына арналған даярлық курсы ашылды. Бұл туралы жергілікті БАҚ өкілдеріне университет ректоры Ерсін Жүнісов мәлімдеді.
«Денсаулық» мемлекеттік бағдарламасын жүзеге асыруға арналған «Medical foundation» даярлық курсы 9-10-11 сынып оқушыларына арналған. Мұнда талапкерлердің ағылшын тілін, химия мен биология пәндерін терең меңгеруіне басымдық берілген. Ерсін Тұрсынханұлының айтуынша, бұл еліміздің медицина саласын дамытуда маңызды қадам болып отыр.
— ШҚО әкімі Даниал Ахметовтің тапсырмасымен Қазақстанда алғаш болып Семей мемлекеттік медицина университетінде «Medical foundation» даярлық курсы ашылды. Мұндағы негізгі мақсатымыз, ҚР Денсаулық сақтау саласын дамытудың 2016-2019 жылдарға арналған «Денсаулық» бағдарламасында көрсетілгендей, жоғары оқу орындарындағы білім беру жүйесін жаңғырту, талапкерлерге бағыт-бағдар беріп, дұрыс таңдау жасауға көмектесу. Осылайша, университетіміздің студенті атанатын болашақ дәрігерлерді алдын ала қабылдап, дайындаймыз. Айта кету керек, бұл бастаманы Қазақстандағы оқу орындары арасынан Семей мемлекеттік медицина университеті алғаш рет қолға алып отыр. Көптеген әріптестеріміз осы тәжірибенің сәтті шығуын күтуде. Бұл шараның тек біз үшін емес, бүкіл Қазақстанның медицина саласын дамытуда маңызы зор,- дейді университет ректоры.
Болашағын медицина саласымен байланыстырған талапкерлердің білім сапасының жоғары болуын көздейтін аталмыш бастама ҚР Денсаулық сақтау министрлігі тарапынан мақұлданып, өз жұмысын бастаған. Университет ұжымы алдағы уақытта еліміздің басқа да қалаларымен бірлесе жұмыс істеуге ниетті.
— Жасыратыны жоқ, кейбір студенттер медицина саласын ата-анасының ықпалымен таңдаса, кейбірі оқудыңқиындығына шыдамай орта жолдан тастап кетеді. Сондықтан біз бәсекеге қабілетті студенттер даярлауды басты мақсат етіп отырмыз. Университет алды даярлық курстары Еуропа елдерінің тәжірибесіне әлдеқашан еніп кеткен. Бұл — әлемдік технология. Алдағы уақытта Павлодар облысы және Өскемен қаласымен бірлесе жұмыс істеу ойымызда бар. Сонымен қатар оқушыларға сапалы білім беретін профессорлық-оқытушылыққұрамды да даярлап жатырмыз. Оқушылар даярлық курсын 9 ай көлемінде оқиды. Бір топта 16 адамнан көп болмауы тиіс,- деді Ерсін Жүнісов.
Талапкерлер курс барысында медицина саласының негізгі күре тамыры саналатын химия және биология пәндерін тереңдете оқып, ҰБТ-ға дайындалады. Сондай-ақ оларға ағылшын тілінің деңгейлік курстарына байланысты арнайы сертификаттар да табысталатын болады.
Жадыра ТӨЛЕГЕНҚЫЗЫ,
