Аягөзде апатты жағдай орын алған уақытта, Шығыс Қазақстан облысының әкімі Даниал Ахметов шұғыл келіп, тасқын судан баспаналары бүлінген тұрғындармен жүздескенінде олардың ешқайсысы баспанасыз қалмайтынын, тиісті деңгейде көмек һәм қолдау көрсетілетінін айтқан еді.
Айтылған сөз жерде қалмай, араға апта салып, облыс әкімі Даниал Ахметовтің тапсырмасы бойынша, «Аягөз-Болашақ» қайырымдылық қорына жинақталған 49 млн. 500 теңгеге 12 үй сатылып алынып, құжаттары рәсімделді. Осылайша, Аягөз қаласында қызыл судан зардап шеккен отбасылардың алғашқы легі баспана кілтін алды. Даниал Ахметов Аягөзге 20 наурыз күні арнайы іссапармен келіп, жеке өзі сатылып алынған үйлерді аралап, онда тұрып жатқан отбасылардың жағдайымен толық танысып шықты. Қоныс тойын тойлап жатқан жанұялардың қуанышына ортақтасқан облыс әкімі әр шаңыраққа теледидар табыс етіп, мерекелік тарту жасады. Сапар барысында аймақ басшысы бірқатар әлеуметтік нысандардың жұмысымен танысты. Даниал Кенжетайұлы аягөздіктерге еліміздің әр аймағынан, облыстың аудандарынан жеткізілген гуманитарлық көмек жинақталған қойма алдында зардап шеккендермен жүздесті. Уәдеге берік басшыға осы жерде ақжарма тілектер айтылып, 82 жастағы Совет Исағұлов ақсақал ақ батасын да берді.
Облыс басшысының өткен жолғы сапарында көмек сұраған ана Меруерт Дүтбаеваға жан-жақты қолдау көрсетілетінін айтқаны ел есінде.
— Сіз табиғат апаты басталғаннан бері екінші рет келіп тұрсыз. Бір апта ішінде талай шаруа тындырылды. Халық та куә. Апатқа ұшырағандардың көңіл-күйі жақсы. Бәріміз жылап едік, қазір күліп жүрміз. Жан-жақтан азық-түлік, киім-кешек, құрылыс материалдары келіп жатыр. Мың да бір рақмет,- деп тілегін жеткізді, — М.Дүтбаева.
Кездесу сәтінде облыс әкімі зардап шеккендерге көмек көрсету мұнымен тоқтамайтынын, облыстан 80 млн. теңге қосымша қаражат бөлінетінін жеткізді. Аудан әкімі Бақытжан Байахметовке тағы да 15 отбасын тұрғын үймен қамтамасыз етуді тапсырды. Мұнан кейін облыс әкімі гуманитарлық жәрдем қоймасына еліміздің әр аймағынан келіп түскен қайырымдылық көмек түрлерімен танысты.
Сапар барысында ШҚО Денсаулық сақтау басқармасының басшысы М.Шоранов облыс әкімін Аягөз аудандық орталық ауруханасында биылғы жылы ашылатын Инсульт орталығы мен Перинаталдық орталықтың жұмысымен таныстырды. Мұнан кейін аймақ басшысы аудандық орталық аурухананың терапия, хирургия, операция блогында емделушілердің хал-жағдайларын біліп, қысқаша әңгімелесті. Аурухананың жағдайымен танысқан Даниал Кенжетайұлы ғимараттың ішкі бөліктеріне еуропалық талаптарға сай жөндеу жүргізу қажеттігін және оған қаражат бөлінетінін жеткізді. Аягөз аудандық орталық ауруханадан ашылатын Инсульт орталығына 610 млн. теңге және Перинаталдық орталыққа 425 млн. теңге заман талабына сай құрал-жабдықтар алуға «KAZ Minerals» компаниясы бизнестің әлеуметтік жауапкершілігі аясында қаражат бөліп отыр.
Сапар соңында облыс әкімі Аягөз қаласындағы политехникалық колледжде болып, білім ордасының материалдық — техникалық базасымен танысты. Бірінші кезекте, осы бағыттағы жұмыстардың Ақтоғай ауылдық округі шегінде жұмыс атқарып отырған «KAZ Minerals» компаниясымен екі жақты жасалған меморандум негізінде ұйымдастырылуы қажеттігіне тоқталды.
Айта кету керек, ауданға бүгінде 34 млн. 255 мың теңгеге гуманитарлық көмек көрсетілді. Сонау Атырау, Алматы, Павлодар облыстарынан да, азық-түлікпен қатар, құрылыс материалдары жеткізілді.
Даниал Ахметов, қоғам белсенділерінің қатаң бақылауымен, жиналған қаражат пен гуманитарлық қорды тек мақсатты іске жұмсауды тапсырды. Өз кезегінде аягөздіктер аз уақыт ішінде атқарылған жұмысқа, әсіресе күллі Қазақстан халқының ауызбіршілігіне ризашылықтарын білдірді.
Марат ЖҰМАБАЕВ, «Семей таңы»
