Семейде ауыз су мен жарық берілсе, шарапатын көрер едік деп отырған шағын аудандар бар. Солардың бірі – қала іргесіндегі Комсомол және Ұшақтар кенттері. Мұнда қоныс тепкен халық су мен жарыққа зәру. Осы аумақтан жер телімін алып, баспана тұрғызып жатқандар да жетерлік. «Өркениеттің дамыған дәуірінде көштен қалып бара жатырмыз» деп налыған қос кенттің тұрғындарымен қала әкімі Ермак Сәлімов Ұшақтар кентіндегі №49 мектеп қабырғасында жүздесіп, халықтың мұңын тыңдады.
Жоғарыда аталған екі мәселе он жылдан бері тиісті шешімін таппай келеді. Кент көшелеріне әлі күнге дейін электр желісі тартылмаған, су құбырлары орнатылмаған. Тұрғындар болса қауіпсіздік ережелерін елемей, үйлерін өз бетінше жарық жүйесіне қосып алған.
— Әркім өзінше сыммен тартып жатыр. Бағаналар жоқ. Заңға қайшы болса да, сымдарды бір-біріне жалғап, электр жарығын қосып отырмыз. Ауа райы күрт бұзылып, жел соғып, қатты боран болса, жалғанған сымдар үзіліп қалады. Ашық-шашық жатқан тоқтан біреу-міреу, әсіресе кішкентай бүлдіршіндер оқыс оқиғаға тап бола ма деп зәреміз ұшады,- дейді тұрғындар.
Иә, бұл — шағын аудан бейнесінің бер жағы. Мұндағы жол мәселесі де халықты алаңдатып отырған өзекті тақырып. Жаңбыр жауса, көлге, көктемде ми батпаққа айналатын көше жолдары жаяу жүргіншілерді де, көлік жүргізушілерді де әуре-сарсаңға түсіреді. Алайда жолға қатысты проблема су құбырлары жүргізілгеннен кейін ғана шешімін таппақ. Биыл тек жаңадан бой көтерген №49 мектептің айналасындағы жолды жөндеуге ғана 9 млн. теңге қарастырылып отыр. Көп ұзамай мектеп аумағы асфальтталатын болады.
Жылдар бойы қордаланған мәселелермен жергілікті билік өкілдері жақсы таныс. Осымен екінші мәрте қала басшысымен кездесуге келген кент тұрғындары бос уәде берілмей, нақты іс жасалса деген тілекте. Қала әкімі Ермак Бидахметұлының сөзіне сенсек, электр жарығын жүргізуге қатысты жоба дайын, тиісті сараптамадан да өткен. Қалалық мәслихаттың сессиясында жобаны қаржыландыру мәселесі қарастырылып, қала бюджетінен 600 млн. теңгеден астам қомақты қаржы бөлінеді деп күтілуде. Бұдан кейін жобаны жүзеге асыратын мердігер компаниялар арасында байқау өткізілетін болады. Қысқасы, жарық жүйесін жаңғырту мәселесі келесі жылы толығымен реттелмек. Ал әзірге жарықтан тарыққан тұрғындар уақытша электр қондырғыларын қосуға мәжбүр.
Су мәселесіне келер болсақ, облыстық мәслихаттың шешімімен қаражат бөлінді. Алдағы он күннің ішінде су құбырларын тарту жұмыстары басталмақ. Нәтижесінде «Семей-Водоканал» коммуналдық мекемесі арқылы әр көшеге су тартылып, құдықтар орнатылатын болады. Осы құдықтан ауласына су кіргізуге әр тұрғын өзі жауапты.
— Бұл бір күнде шешілетін мәселе емес. Уақыт керек. Жобалар, жоспарға сәйкес, кезең-кезеңімен, рет-ретімен іске асады. Тек сабырлық танытып, қолдау білдірсеңіздер болғаны,- дейді қала әкімі Ермак Сәлімов.
Осылайша, жергілікті билік мәселе келер жылы толықтай шешімін табады деп сендірді қарапайым халықты. Ал су мен жарықтан таршылық көріп отырған тұрғындардың күтуден басқа амалы қалмады. Әліптің артын бағайық…
Жібек СЕРҒАЗЫ, «Семей таңы»
