Жұма, 14 қыркүйек күні қала әкімдігінде шаһар басшысының орынбасары Қайрат Ерембесовтің төрағалығымен әлеуметтік маңызы бар азық-түлік тауарларының бағасын тұрақтандыру мәселелері жөніндегі штабтың кезектен тыс отырысы болып өтті. Жиынға Табиғи монополияларды реттеу және бәсекелестікті қорғау комитетінің ШҚО бойынша департаменті басшысының орынбасары Наталья Петрова қатысты. Семей қалалық кәсіпкерлік бөлімінің сауда секторының меңгерушісі Айжан Хасенованың әлеуметтік маңызға ие азық-түлік тауарларының бүгінгі бағалары жөніндегі есебі тыңдалып, штаб мүшелері азық-түлік қауіпсіздігін сақтау, бағалардың тұрақтылығын қамтамасыз ету мәселелерін қозғады.
Кәсіпкерлік бөлімнің мәліметіне сәйкес, осы жылдың тамыз айында әлеуметтік маңызды үш тауардың бағасы өскен. Мәселен, күнбағыс майының бағасы 0,5, құс еті 2,3, сәбіз 4,5 пайызға көтерілген екен. Ал картоп бағасы 17,2, орамжапырақ 12,5 пайызға төмендеді. Ұн, бірінші сұрыпты ұннан жасалған нан, дәнді дақылдар, қант, сиыр еті, пастерленген сүт, күріш, тұз сияқты азық-түліктердің бағасында тұрақтылық байқалады.
— Азық-түлік өнімдері қоры таусылып қалса, тауарлар жаңа бағалармен қайта сатылып алынады. Дәл қазір бағаны тұрақтандыруды қатаң қадағалауымыз керек. Ірі көтерме сауда компанияларымен тығыз байланыста болу қажет,- деген Қайрат Ерембесов штаб мүшелеріне әлеуметтік маңызы бар азық-түлік тауарларының бағаларының негізсіз өсуін болдырмауды, тұрақты түрде мониторинг жүргізуді тапсырды.
Семей қалалық кәсіпкерлік бөлімінің сауда секторының меңгерушісі Айжан Хасенованың баяндауынша, ағымдағы жылдың 4-11 қыркүйек аралығында тек тауық жұмыртқасының бағасы өскен. Қалған азық-түліктің бағасы сол қалпында сақталған. Азық-түлік өнімдерін тиімді бағамен сату мақсатында кәсіпкерлік бөлімі мен ірі кәсіпорындар арасында 160 меморандумға қол қойылыпты. Осы келісім аясында 133 рейд жүргізілген екен. Жуырда, 12 қыркүйекте, мониторинг жүргізу тобы Мирный кенті, 1-ші шағын аудан, 343, 342, 72-квартал, облыстық аурухана, Глинка көшесі аумақтарындағы сауда нысандарын аралап, тексеру жұмыстарын жүргізген. Мониторинг қорытындысы бойынша, әзірге азық-түліктердің бағасы бірқалыпты екені анықталды.
Жібек СЕРҒАЗЫ, «Семей таңы».
