Сейсенбі, 18 қыркүйек күні алдағы кезекті мәслихат сессиясы отырысы аясында депутаттар қаланың жылу маусымына дайындығын тексеріп, бірқатар жылу қазандықтары мен құбырларды ауыстыру жұмыстарымен танысты. Сонымен қатар әуежайдағы қайта қалпына келтіру барысы да назардан тыс қалмады. Қала әкімінің орынбасары Николай Ушаков, мәслихат хатшысы Бейсенбек Ақжалов, депутаттар Дариға Дайрова, Талғат Баймұратов, Қайрат Құсаинов, Айдар Ибраев, Сергей Родионов жағдаймен танысқан болатын.
Жылу маусымына әзірлік жұмыстарын тұрғын үй-коммуналдық шаруашылығы және тұрғын үй инспекциясы мамандары іс барысында таныстырды.
Бірінші кезекте депутаттар қаланың орталық көшелерін ыстық сумен қамтитын «Ғаббасов» қазандығының жұмысын көрді. Мұнда алдағы жылу маусымына қазандықтың техникалық тұрғыдан дайындығы жайлы сұрап білді.
— Қазандықта үлкен желілік және қоректік сорғы жұмыс істеп тұр. Көмірден қиындық туындамайды. Күнделікті 80 тонна көмір жеткізіледі, сапасы жақсы. Қазандықтағы техникалар қыс маусымына дайын. Бізде жұмысшылар уақытша және тұрақты түрде жұмыс атқарады. Қазан айынан бастап уақытша жұмысшыларды қабылдаймыз,- деді «Ғаббасов» қазандығының өкілі Мақсат Сәбетханов.
Депутаттар тарапынан ғимараттың ішкі және сыртқы бейнесін қалыпқа келтіру қажет екендігі айтылды.
Бұдан кейін халық қалаулылары №1 ЖЭО-ға бет бұрды. Шаһардың жылу орталықтары мен олардың дайындығы жөнінде қалалық ЖЭО басшысы барлық сұрақтарға жауап берді. «Ғаббасов» қазандығы мәселесіне де тоқталды.
— Дәл қазір біз №1 жылу орталығында тұрмыз. Бұл — біздің кәсіпорынның басты бөлімі. Қалада №1 ЖЭО, РК-1 және қаланың сол жақ жағалауында Шүлбі қазандығы, ал оң жағалауда 13 қазандық бар. Сонымен қатар 315 шақырымдық магистраль жолдары қатынайды. Бұл жерде көмір қоры сақталады. Жылына 360 мың тонна көмір жағылады. Бүгінде Қаражырадан 40 мың тоннадан аса көмір жеткізілді. Қазан айының 15-не дейін 80 мың тонна көмір қоры жеткізілуі керек. Қара алтын еш қиындықсыз күнделікті келуде. Қазандықтар жылу маусымына толықтай дайын. Сондай-ақ №1 ЖЭО мен РК-1 қазандықтарында жаңа заманауи сорғылар орнатылды,- деді Қалалық ЖЭО басшысы Расылхан Жолдасов.
Биыл облыс әкімінің тапсырмасымен қаланың оң жағалауындағы тұрғындар жазғы уақытта да ыстық сумен қамтылды. Осыған орай «Ғаббасов», 35-квартал, №5 интернат, орталық, МЭН және №1 ЖЭО қазандықтары үзіліссіз жұмыс істеді. Мекеме басшысының айтуынша, жылу мен ыстық суға кейбір тұрғындар уақтылы төлем жасамайды. Салдарынан қазандық қызметкерлері қиындық көруде.
— Қала тұрғындарының су мен жылуға жалпы берешегі 240 млн. теңгеден асады. Нәтижесінде мекеме жұмысшылары шілде айынан бастап айлықтарын ала алмаған. Сондықтан БАҚ өкілдері арқылы тұрғындардан коммуналдық қарыздарын уақтылы төлеп тұруды сұраймыз. Бүгінде осы мәселеге байланысты топ құрылды. Оның ішінде тұрғын үй-коммуналдық шаруашылығы және тұрғын үй инспекциясы, заңгерлер жұмыс істеуде,- деген Р.Жолдасов «Ғаббасов» қазандығындағы жағдайды да түсіндіріп айтты.
— «Ғаббасов» қазандығына келсек, ол қаланың орталығын ыстық сумен қамтиды және мөлшерден көп жұмыс істейді. Қазандықтың жалпы жүкемесі 40 Гкал болу керек болса, оған бұдан да артық күш түсіп тұр. Себебі ол екі қазандықтың жұмысын атқарып тұр. Мұнда қыс мерзіміне дайындық жұмыстары аяқталды. Бүгінде ғимараттың ішкі және сыртқы бейнесін қалыпқа келтіру жұмыстары ғана қалды,- деді қалалық ЖЭО басшысы.
Сонымен қатар Засядко, Найманбаев көшелері мен Шәкәрім даңғылындағы жылу желілері құбырларын ауыстыру жұмыстарын тексерді. Мұндағы жылу желілері ескірген. Барлық гидравликалық сынақтар жылу желісін ауыстыру керектігін көрсеткен.
— Жөндеу жұмыстарын жеделдету мақсатында жұмысшылар екі ауысымда жұмыс істейді. Ауа райының қолайсыздығы жұмысқа кедергі келтіруде. Жөндеу жұмыстарына бюджеттен 120 млн. теңге бөлінді. Құбырларды ауыстыру келтіру қыркүйек айының соңына дейін аяқталады деп жоспарлануда. Жылу желілерін толығымен ауыстырып, орнатқаннан кейін, бүлінген асфальт қалпына келтіріледі,-деді «SOWAD сталь» ЖШС-нің басшысы Сергей Агеев.
Халық қалаулылары Семей қаласының халықаралық әуежайының қайта жаңғырту жұмыстарын да назардан тыс қалдырмады. Жобаны жүзеге асыру үшін 10 млн. теңгеден аса қаражат бөлінген. Құрылыс барысындағы мамандардың айтуынша, әуежайды қолданысқа беретін күн алыс емес.
— Әуежайдағы қайта қалпына келтіру жұмыстары аяқталып қалды. Бүгінде тек әрлеу жұмыстары жүргізіліп жатыр. Ұшып-қону алаңы дайын. Жыл соңына дейін жөндеу жұмыстарын бітіріп, қолданысқа беруді жоспарлап отырмыз,- деді жөндеу жұмыстары бойынша бас маман Дархан Омарханов.
Енді қаламыздағы әуежай авиакомпаниялармен келісімшартқа отырып, жаңа бағытта ұшақтар қабылдайтын болады.
— Қазір негізгі жұмыстар аяқталып, әуе вокзалында күрделі жөндеу жүріп жатыр. Ұшып-қону жолағы ұшақтар қабылдауға дайын. Бүгінде келісімшарттар жасалып, билеттер сатылуда. Қыркүйек айының сонында ұшақтар Алматы — Астана, Өскемен — Үржар бағыттары бойынша қатынай бастайды. Қазан айының соңында «SCAT» және «Qazaq Air» авиакомпанияларымен жұмыс істейтін боламыз. Келесі жылдың наурыз айынан бастап ресейлік «S7» компаниясының ұшақтары Мәскеу, Новосібір, Петербург қалаларына бағыт алады деп жоспарлап отырмыз. Алдағы уақытта ұшақ билеттерінің құны тұрақталады деп ойлаймын. Бүгінде ең қымбат билеттің құны 45 мың теңге,- деді Семей қаласының халықаралық әуежай директоры Нұртай Оспанов.
Құралай Қайыржанқызы, Семей қаласы.
