Бейсенбі, 27 қыркүйек күні «Нұр Отан» партиясы Семей қалалық филиалының ғимаратында Семей қаласы Ішкі істер басқармасының басшысы Дулат Қазақбаев азаматтарды жеке мәселелері бойынша қабылдады. Қабылдауға келгендер, негізінен, құқықтық қатынастарға қатысты түйткілді мәселелерін ортаға салды.
Кез келген мемлекеттің басты құндылығы адам мен оның құқықтары екені сөзсіз. Сондықтан мемлекеттік орган үшін халықтың өтініштері мен ұсыныстарын тыңдау аса маңызды. Қоғамдағы қордаланған мәселелерге және жеке басына қатысты сұрақтарына жауап іздеген тұрғындар қабылдауға жазылып, тұшымды жауаптар алды. Арыз-шағымдарын айта келген тұрғындардың көбі әлеуметтік мәселелерді көтерді. Сондай-ақ құқық қорғау органдары қызметкерлерінің қоғамдық тәртіпті қадағалау шараларына көңілдері толмайтындарын жеткізді.
Қабылдауға келген Силикатный кентіндегі 9-үйдің тұрғыны Гүлжан Селеубаева учаскелік полиция жұмысына сын айтты. Оның сөзінше, көршілерімен арадағы дау-дамайдың туындағанына 7 жыл уақыт өтіпті. Оған себеп ащы суға сылқия тойып алатын көршісі ауланың тыныштығын бұзып, маза бермейтін көрінеді. Осы орайда көршісін айыптап талай мәрте сотқа жүгінген Гүлжан Селеубаева іс сотқа дейін ғана қаралып, айыпталушы тек айыппұл төлеумен шектелетініне наразы. Учаскелік полиция инспекторының сөзіне сүйенсек, арадағы кикілжіңдерге қатысты жағдайлардың бәрі заң негізінде қаралып, жан-жақты тексерілген. Дегенмен мәселенің байыбын түсінген басқарма басшысы Г.Селеубаеваның өтініші негізінде істі қайта қарауды учаскелік полиция инспекторына тапсырды.
Қала тұрғыны, зейнеткер Иван Демидов көршісінің түн ішінде жұмыс істеп, мазасын алатынын айтып арыз жазып, учаскелік полицияға бірнеше рет шағымдағанын жеткізді.
— Мен көршілеріме жұмыс істемесін демеймін. Бірақ түнгі сағат он бірден асқан соң жұмысты доғару керек қой. Біз зейнеткерлік жастағы қариялар болған соң, қатты дыбыс, шудан ұйықтай алмаймыз. Түн ауа жұмыс істеулерін қойып, тыныштық беру үшін осыған бір шара қолданылса екен деймін,- дейді Иван Демидов.
Қарияның арыз-шағымын мұқият тыңдаған ІІБ басшысы осы мәселе бойынша бүгіннен қалмай аталған тұрғын үй секторы тексеріліп, рейдтік жұмыс жүргізіліп, шара қолданылатынын жеткізді.
ІІБ басшысы Дулат Қазақбаев барлық сұрақтар бойынша заң нормаларын жан-жақты түсіндіріп, өз орынбасарларына тиісті тапсырмалар берді.
— Жеке қабылдауға азаматтар кәсіптік құқықтық көмек алуға, сондай-ақ түйткілді мәселелерінің шешімін табуға үміт артып келеді. Полицияға шағымданған әр азамат арыздың жан-жақты қаралып, кінәлі тұлғалардың жауапқа тартылатынына сенеді. Келіп түскен әрбір шағым мен арызды жіті қарап, заң шеңберінде әрекет етуге тиіспіз, бірде-бір шағым ескерусіз қалмауы керек,– деді ІІБ басшысы жиын соңында.
Қуандық НӘСІПБЕКОВ, Семей қаласы.
