Сейсенбі, 9 қазан күні Ертіс ауылдық округіне қарасты Мұқыр ауылында жастардың қолдауымен елді мекенге кіреберіс жолға арка орнатылып, салтанатты түрде ашылды. Елбасы Нұрсұлтан Назарбаевтың «Болашаққа бағдар: рухани жаңғыру» мақаласынан туындаған «Туған жер» бағдарламасына орай, жер-жерлерде елжанды азаматтар бастамалар көтеріп, туған өлкесінің өркендеуіне үлес қосуда. Елді мекеннің атауын білдіріп қана қоймай, ауылдың ажарын ашып тұрған Мұқыр ауылындағы кіреберіс қақпа — сөзіміздің айғағы. Салтанатты шараға ауыл тұрғындары және ауыл әкімі қатысты.
Алғашқы құттықтау сөз ауыл әкіміне берілді.
— Құрметті қауым, ауылдастар, қонақтар! Міне, бүгін сіздер 2008 — 2013 жылғы мектеп түлектерінің бастамасымен қолға алынып, орта буын өкілдерінің қолдауымен жүзеге асырылған істің куәсі болып отырсыздар. Мектебімізден түлеп ұшқан шәкірттеріміз өздерінің туған жеріне деген патриоттық сезімдерін білдіріп, тамшыдай болса да үлестерін қосып отыр. Бұл ауыл жастарының ерекеше сыйы деп білемін. Осындай көз тартарлық арка орнатып бергендеріңіз үшін әкімшілік атынан алғысымды білдіремін,- деді Ертіс ауылдық округінің әкімі Хасен Сейітхасимов.
Елді мекеннің атын үлкен етіп жазып қою үрдіске айналды. Жақсы үрдіс. Өйткені ауылға кіреберісте еңселі, айшықты, сәні мен салтанаты келіскен қақпа тұрса, риза пейіліңізді танытып, «па, шіркін!» деп өтпейсіз бе ауылға қарай. Қазір әсіресе жан-жақта түрлі салада еңбек етіп жүрген, туған жеріне оқта-текте ғана сағына жететін азаматтар ауылына бір белгі қалдыруды армандап-ақ жүретін сияқты. Иә, Мұқыр ауылында жақсы бір үрдіс қалыптасқан екен. Білім ошағын тамамдағанына 5, 10, тіпті 20 жыл болған түлектер ауылдарына қарайласып, атамекенін көркейтуде ауызбіршілік танытып, игілікті істің ұйытқысы болып жүрген көрінеді.
Аталған шарада осы тағылымы мол іске өз үлестерін қосқан ауыл тұрғындарына алғыс хаттар табысталды. «Өскелең ұрпаққа үлгі болсын деген ниетпен біз ауылдастардың еңбегін бағалап, құрмет көрсетіп отырмыз»,- дейді. Осы игілікті істің басы-қасында жүрген ауыл азаматтары да өз пікірлерін білдірді:
— Сыныптастарымызбен ақылдаса келе осы нысанды салу жағын ойластырдық. Туған жерімізге ескерткіш болсын, әрі пайдамыз тисін деген ниетпен кіреберіс қақпа орнатуды ұйғардық. «Көп түкірсе — көл» деген. Алғашында қолымыздан келер ме екен деген күдіктің де болғаны рас. Дегенмен барлығымыз жұдырықтай жұмылып, білек сыбана кірісіп кеттік. Біздің бастамамызға қолдау білдірген ауыл тұрғындарына және өз ісінің шебері, дәнекерлеуші ағамыз Шалқар Сағымбаевқа 2008-2013 жылғы түлектер атынан үлкен рақметімізді айтамыз,- дейді Нұрлыбек Ерқұлан есімді ауыл мектебінің түлегі.
Ауылдың көркі осындай әдемі нысандар, жерлестердің береке-бірлігі екені сөзсіз. Бұл орайда мұқырлықтар ауылдарының гүлденуіне жарыса үлестерін қосып жатыр. Ауылдағы ағайын да түлектерге алғыстарын жаудыруда. Осындай туған жерді көркейтуге бағытталған бастамалар жалғасын таба берсін деп тіледік.
Қуандық НӘДІРБЕКҰЛЫ, Семей қаласы
