Өткен аптада Ішкі істер басқармасының өкілдері мен жолау-шылар көлігі және автомобиль жолдары бөлімі қызметкерлерінің ұйымдастыруымен «Автобус» жедел алдын алу шарасы өткізілді. Негізгі мақсат — көлік апатының алдын алу, сондай-ақ жолаушыларды тасымалдау талаптарын күшейту, жүргізушілердің рұқсат құжаттарының дұрыстығын тексеру.
Қоғамдық көлікті күнделікті пайдаланамыз. Қарапайым халықтың көпшілігінің тіршілігі қалаішілік автобустармен тікелей байланысты. Өйткені онсыз шаруамыз бітпейді. Жасыратыны жоқ, сол қоғамдық көліктердің кейбірінің сапасы сын көтермей жатады. Тазалық пен тәртіп, мәдениет, жолаушыларды шамадан тыс отырғызу, бірімен-бірі жарысу сияқты кемшіліктер орын алып жатады. Міне, осындай жағдайлардың алдын алу мақсатында жүргізілген тексеріс кезінде жүргізушілердің бірінің құжаты қате болса, кейбір автобустардың техникалық жағдайы талапқа сай келмейтіні анықталды. Мамандардың айтуынша, 25 құқық бұзушылық анықталып, жүргізушілерге айып-пұл салыныпты. Атап айтсақ, ереже бұзушылардың арасында жылдамдықты асыру, ұялы телефонмен сөйлесу секілді заңға қайшы әрекеттер тіркелген.
Семей қалалық ішкі істер бөлімінің жол және техникалық инспекция тобының мемлекеттік автоинспекторы, полиция аға лейтенанты Аслан Рахимжанов кезекті рейд жайлы түсіндіріп өтті.
— Қазіргі уақытта біздің қызметкерлер жолаушылар тасымалымен айналысатын авто-көлік кәсіпорындары мен жеке кәсіпкерлер тарапынан азаматтарды тасымалдау кезіндегі қауіпсіздік талаптарының орындалуын тексеру жұмыстарын жүзеге асыруда. Әсіресе қаладағы автобустардың техникалық жай-күйіне, жүргізу-шілердің жол қозғалысы ережелерін мұқият сақтауына ерекше назар аударылуда. Мұнымен бірге техникалық жағдайы жол қозғалысы қауіпсіздігі талаптарына сәйкес келмейтін автобустарды пайдалануға тыйым салуға байланысты шаралар да қабылданады,- деді полиция аға лейтенанты.
Сондай-ақ тәртіп сақшы-ларының айтуынша, құқық бұзушылыққа екінші қайтара жол берген автобус жүргізушілері жол қозғалысы ережелері біліктілігін тексеруге жіберіледі, ал тиісті қаулы шығарылғаннан кейін екі ай ішінде емтихан тапсырмаған жағдайда, Қазақстан Республикасының «Жол жүрісі туралы» Заңына сәйкес, іс материалдары көлік құралын басқару құқығынан айыру туралы шешім шығару үшін сотқа жіберілетін болады.
Үш күндік шара аясында көлік басқару құқығынан айырылған жүргізушілердің көлік жүргізуі, сақтандыру полисінің болмауы, маневр жасау қағидаларын бұзу, апатты жағдайлар туындату, қозғалыс кезінде ұялы телефонды пайдалану, жылдамдықты шамадан тыс асыру, көлік құралының аялдау ережесін бұзу және тағы басқа да фактілерді анықтауға ерекше назар аударылды,- дейді мамандар.
Жергілікті полиция қызмет-керлері жүйелі түрде өткізіліп отыратын «Автобус» жедел алдын алу шаралары жолаушылар тасымалдайтын автокөліктердің қатысуымен орын алатын жол-көлік оқиғаларының жолын кесіп, санын азайтуға септігін тигізетінін айтады.
Қ.НӘСІПБЕКОВ,«Семей таңы»
