Жер бетінің қай бұрышында жа- салғанына қарамастан көрсетілген ерлігіне сай өз азаматтарына құрмет көрсетіп, мадақтау кемел болашаққа ұмтылған тәуелсіз ел үшін парыз саналады. Сонымен қатар, келешек ұрпақты отан-сүйгіш, батыр етіп тәрбиелеудің өзіндік бір жолы деуге болады. Кеңес одағы әскерінің ауған жерінен шығарылғанына 25 жыл толуына орай ұйымдастырылып жатқан шаралар ауған соғысы ардагерлеріне деген құрмет пен жастарға аға буын өкілдерінің ерліктерін үлгі етудің озық тәсілі іспеттес. Ширек ғасырлық датаны атап өту аясында ауған соғысы ардагерлеріне ТМД мемлекеттері Қорғаныс ми- нистрліктерінің келісімі бойынша жасалған арнайы медальдар табысталып жатыр. 21 ақпан күні қала әкімдігінде осы наградалармен марапаттау рәсімі өткізілді.
Аталмыш шараға қала әкімінің орынбасары Зәуреш Исабаева мен шаһарымыздың қорғаныс істері жөніндегі басқармасының басшысы полковник Жәнібек Идришев қатысты. Сонымен қатар, мерейтойлық медальдарды табыстау рәсіміне жалпы саны 20 ауған соғысы ардагерлері шақырылған. Шараның негізгі бөлігі басталмас бұрын сөз сөйлеген Зәуреш Исабаева жиналғандарды кеңес әскерінің ауған жерінен шығарылғанына 25 жыл толуымен құттықтап, осынау соғысқа қатысқан жерлестеріміздің ұрыс алаңдарындағы ерліктері ешқашан ұмытылмайтынын тілге тиек етті.
— Атқарған шаруаларыңыз жемісті болсын. Сіздердің бүгінгі таңда жас ұрпақты отансүйгіштікке баулу ісінде жасап жатқан істеріңізге ризашылығымызды білдіре отырып, атқарушы биліктің өкілі ретінде қала әкімдігінің есігі сіздерге әрдайым ашық екендігін айтқым келеді. Игілікті бастамаларыңыздың жүзеге асуына қолдау білдіруге дайынбыз,- деді қала әкімінің орынбасары.
{jcomments on}Жиын барысында медальдарды иеленген ардагерлер награданы кеуделеріне таққаннан кейін орындарына «Қазақстан Республикасына қызмет етемін» деген сөзді айтып барып отырып жатты. Сондай-ақ, олар Кеңес Одағы әскерінің ауған жерінен шығарылғанының 25 жылдығына орай түрлі шаралар ұйымдастырып, ауған соғысы ардагерлерін ұмыт қалдырмай, ескеріп жатқан атқарушы билік өкілдеріне алғыстарын білдірді. «Мұндай шараның маңызы өте зор. Біз қазір жас ұрпақты батырлық рухында тәрбиелеуді ойлауымыз қажет. Осы тұрғыда жастарға аға буын өкілдерінің ерліктерін үлгі ету мақсатымен ұйымдастырылатын шаралар жиірек өткізілсе, нұр үстіне нұр болмақ. Болашақта мұндай соғыстар қайталанбауын тілейміз, ел іші мен іргесіндегі тыныштық сақталсын». Ардагерлердің марапаттау рәсімінде айтқан пікірлерінің ортақ мағынасы осындай болды.
Тағы бір айта кетерлік жайт, ардагерлерге табысталған бұл медальдар мерейтойлық естелік емес, мемлекеттік марапат саналады. Бұл да ауған соғысына қатысқан жауынгерлердің ерлігіне берілген зор баға болса керек. Ауған соғысы ардагерлеріне арнайы марапаттарды табыстау шаралары алдағы уақытта да жалғасын таппақ.
Мирас ҚҰСАЙЫН,
«Семей таңы»
