Жастар жылы аясында студенттердің шығармашылық бастамаларын қолдау мақсатында осы жексенбіде, яғни 21 сәуір күні, Қалалық Мәдениет сарайында ішкі саясат бөлімі мен «Жастар және балалар ұйымдарының Шығыс Қазақстан облыстық Ассоциациясы» заңды тұлғалар бірлестігінің Семей қалалық филиалының ұйымдастыруымен «Үздік жас-тар театры – 2019» қалалық байқауы өтті. Байқауға қала колледждері мен жоғары оқу орындарының 9 студент жас-тар театры қатысты.
Театр өнері саласындағы жаңа үрдіс, жаңалықтарға көпшілік қауымның назарын аудару, ұлттық салт-дәстүрімізді, тіліміз бен ділімізді өскелең ұрпаққа насихаттау, жас өнерпаздардың шығармашылық бастамаларын ынталандыру мақсатында ұйымдастырылған байқауда М.Төлебаев атындағы музыкалық училищенің «Жігер», «Ес-Аймақ» және «Самғау» студенттік жастар театрлары, Құрылыс колледжінің «Қазақ жастары» драма театры, «Авиценна» колледжінің «Жебе» театры, М.Әуезов атындағы педагогикалық колледждің «Ес-аймақ» драма үйірмесі, Бизнес және сервис колледжінің «Айбарыс» жастар театры, Innovative колледжінің «Жалынды жастар» театры, Шәкәрім атындағы мемлекеттік университеттің «Қаракөз» драма театры өнер көрсетті.
Байқау шартына сәйкес, театрлар отбасылардың ажырасуы, ішімдік пен есірткіге әуестіктің, жат діни ағымдардың жетегінде кетудің салдары, суицид сынды әлеуметтік маңызы бар тақырыптар бойынша сахналық қойылымдар ұсынды. Байқауға Абай атындағы қазақ мемлекеттік драма театрының әртісі Бекзат Омашев, қалалық Жастар ресурстық орталығының басшысы Олжас Соғымбай, «SEMEI» телеарнасының жаңалықтар бөлімінің жүргізушісі Бақытгүл Қазез әділ қазылық етті.
— Жастар жылы аясында, жылдағы дәстүр бойынша, студент жастар театрлары арасында қалалық байқау ұйымдастырдық. Студенттік өмір қоғамдық өмірдің бір бөлшегі болғандықтан, жастар ғылыми конференциялар мен спорт сайыстарына қатысумен ғана шектелмей, мәдени, рухани салаға да араласқандары дұрыс. Байқауға қатысуға қаламыздағы колледждер мен жоғары оқу орындарынан тоғыз өтініш келіп түсті. Барлық театрлардың қойылымдарын алдын ала көріп, пысықтадық. Барлығы жақсы дайындықпен келген, көтерген мәселелері өзекті деп айта аламын. Әрбір қойылымның жастарға айтар ойы мен ұсынысы бар,- дейді қалалық ішкі саясат бөлімінің басшысы Нұржан Есенжолов.
Әділ қазылар алқасының шешімімен, Мәсәлім Ықылас «Ең үздік ер адам бейнесі», Жанна Құрманғазиева «Ең үздік әйел адам бейнесі» аталымдарын иеленіп, 10 мың теңгенің сертификаттарын жеңіп алды. Жүлделі ІІІ орынды Құрылыс колледжінің «Қазақ жастары» драма театры, ІІ орынды Мұхтар Әуезов атындағы педагогикалық колледждің «Ес-аймақ» драма үйірмесі иеленсе, І орынды Бизнес және сервис колледжінің «Айбарыс» жастар театры жеңіп алды.
Сондай-ақ трагедия жанрын өзгеше форматта сахналаған Шәкәрім университетінің «Қаракөз» драма театры мен жастар арасындағы ажырасу мәселесін қозғап, жақсы өнер көрсеткен М.Төлебаев атындағы музыкалық училищенің «Жігер» студенттер театрына көрермендер ықыласы ерекше болғанын айта кеткен жөн.
— Бүгін керемет өнер додасы болды. Сіздермен бірге толқыдық, тебірендік. Бізге керемет көңіл-күй сыйлаған театрларға мың алғыс айтқым келеді,- деп Абай атындағы қазақ мемлекеттік драма театрының әртісі Бекзат Омашев байқауды қорытындылады.
Айта кетейік, жеңімпаз театр байқау барысында ұсынылған спектакльді қаламыздағы барлық колледждерде сахналайтын болады. Сонымен қатар бейнежазбаға түсіріліп, әлеуметтік желілерде таратылмақ.
Айтолқын САМАТОВА, «Семей таңы»{jcomments off}
