Апта дүйсенбісінде Семей қалалық жұмыспен қамту және әлеуметтік бағдарламалар бөлімінде Еңбек қауіпсіздігі мен еңбекті қорғау жылына орай Семей қаласының мемлекеттік еңбек инспекциясы және Кәсіпкерлер палатасының ұйымдастыруымен арнайы брифинг болып өтті. Басқосуда еңбеккерлер мен жұмыс беруші арасындағы еңбек қауіпсіздігі бойынша қарым-қатынас, жұмыс орындарындағы қауіпсіздік, өндірістегі жарақаттану мен өлім-жітім және кәсіптік сырқаттардың алдын алу мәселелері қозғалды.
Брифинг барысында қаладағы еңбек инспекциясының өкілдері еңбек қауіпсіздігі бойынша өткен жылы орын алған келеңсіз жайттарға, көрсеткіштерге тоқталып өтті. Атап айтсақ, былтырғы жылы өңірімізде жұмыс орындарындағы еңбек қауіпсіздігінің сақталмауына байланысты қайғылы жағдайға әкеліп соқтырған 5 оқиға орын алыпты. Мұның негізгі себебі қарапайым еңбек адамдарының техникалық қауіпсіздік ережелеріне мән бермеуі болып отыр. Жоғарыда айтылған жайттардың екеуі «ҚТЖ — ҰК» АҚ Семей жүк тасымалы филиалында тіркелсе, тағы біреуі «Қаражыра» ЖШС-де болған. Бұл үш факті де өндірістегі қауіпсіздік шараларын ескермеу салдарынан орын алған болатын. Тағы екі оқиға жекелеген фирмаларға тиесілі.
Бұл орайда Семей қаласы бойынша еңбек заңнамасын бақылау бөлімінің басшысы Тоқтарбек Түсіпбаев жұмыс беруші тарап пен жұмысшы арасындағы еңбек қауіпсіздігін сақтауға байланысты міндеттер қатарына тоқталды. Көп жағдайда жұмыс орындарындағы жазатайым жағдайларға еңбеккердің өзі кінәлі болып жатады. Қарапайым ғана мысал – құрылыс нысандарындағы жұмысшылар қорғаныш каскасын киместен немесе арнайы бекітпе белдіксіз жұмысқа кіріседі. Ал жарақат алған жағдайда, жұмысшының өзі кінәлі болып саналады. Егер аталмыш мәселе күрделенген сипат алса, еңбек дауларын сот шешеді.
Мамандар айтып өткендей, ағымдағы жыл республикамыз бойынша Еңбек қауіпсіздігі мен еңбекті қорғау жылы деп жарияланған болатын. Қазіргі таңда бірқатар шаралар қолға алынуда. Сәйкесінше, жұмыс орындарындағы апаттардың алдын алу жұмыстары да біршама ширатылған. Атап айтсақ, өндірістік жарақаттану деңгейі өткен жылдың сәйкес кезеңімен салыстырғанда 2 адамға, немесе 1%-ға азайды. Сонымен қатар жұмыс орнында жазатайым жағдайлардан зардап шеккендердің коэффициенті 1000 адамға шаққанда 0,309-ды құрады.
Өндірістік салалар бойынша ең көп зардап шеккендер тау-кен және металлургия өнеркәсібінде екен, олардың жалпы саны 56 адам. Ал бюджеттік ұйымдарда 47 адам болса, шағын бизнес ұйымдарында 27 адам, құрылыста 23 адамды құрап отыр.
Кәсіпорындар мен ұйымдардағы еңбек жағдайын жақсарту, өндірістік жарақаттану мен кәсіби ауруларды азайту мақсатында Қазақстан Республикасының Еңбек және халықты әлеуметтік қорғау министрлігі мемлекеттік органдармен және әлеуметтік әріптестермен бірлесе отырып, 2019 жылды Еңбек қауіпсіздігі мен еңбекті қорғау жылы деп жариялады. Яғни, жыл көлемінде еліміздегі кәсіпорындар мен мекемелерде, оның ішінде біздің аймағымыздағы әсіресе жұмысшылар саны өте көп іргелі мекемелерде осы бағытта бірқатар шаралар атқарылатын болады.
Мамандар сөзіне сүйенсек, жұмыс орындарындағы еңбек жағдайын жақсарту; өндірістік жарақаттану мен кәсіби ауруларды азайту; ақпараттық кампаниялар өткізу Еңбек қауіпсіздігі мен еңбекті қорғау жылында ұйымдастырылатын шаралардың негізгі міндеттері болып табылады екен.
Брифинг барысында БАҚ өкілдері тарапынан қойылған қазіргі қоғам өмірінде жиі кездесіп жататын еңбек қауіпсіздігі мәселелеріне қатысты түрлі сауалдарға мамандар тарапынан толыққанды жауаптар берілді.
Қ.ЖОЛЫМБЕТ, «Семей таңы»{jcomments off}
