Өткен жұма күні қалалық мәслихат депутаттары қоғамдық көліктерде жүріп, автобустардың және ондағы жолаушыларға көрсетілетін қызмет сапасын өз көздерімен көріп, бақылады. Қалалық мәслихаттың өндірістік және инфрақұрылым, тұрғын үй шаруашылығы мен қоршаған ортаны қорғау жөніндегі тұрақты комиссияның мүшелері тексеру шарасы барысында кездескен кемшіліктерді мәслихаттың кезекті сессиясында қарамаақ. Жолаушы тасымалдау- шылар да халық қалаулыларына өздеріне қатысты проблемаларды ортаға салды.
«Семавтопарк» және «Азия Combi» ЖШС-теріне қарай бағыт алған қалалық мәслихатың өндірістік және инфрақұрылым, тұрғын үй шаруашылығы мен қоршаған ортаны қорғау жөніндегі тұрақты комиссияның төрағасы Бауыржан Қайрамбаев бастаған депутаттар кәсіпорындарға жеткенше №41 және №2 автобустарға отырып, қоғамдық көлік қызметінің сапасын тексерді. Автобус ішіндегі жарнамаларға дейін бақылаған халық қалаулылары жолаушылармен де тілдесті. Алайда, олардың тасымалдаушылар қызметіне көңілдері аса толмайтын көрінеді. Бірі автобустардың аялдамаларға үнемі уақытынан кешігіп келетінін айтса, тағы бірі кейбір бағыттағы автобустардың жолаушы тасымалдауға аздық ететіндігін тілге тиек етті. Дегенмен, жолаушылар №2 автобусының жиі жүретінін де жасырмады. «Азия Combi» ЖШС-і қаладағы ең ірі жолаушы тасымалдау кәсіпорындарының бірі. 10 бағыт бойынша күнделікті 100-ге жуық үлкен және шағын автобустар жолаушыларға қызмет көрсетеді.
Ал, «Семавтопарк» ЖШС-нің тарихы әріде. Ол да шаһардағы ең ірі жолаушы тасымалдау кәсіпорындарының бірі, тіпті, бірегейі деуге де болады. 1957 жылы құрылған аталмыш кәсіпорын жолаушыларды тасымалдау байқауының қорытындысы бойынша 22 бағыттық қызмет көрсетеді. Тасымалдаушылардың қарамағында сыйымдылығы үлкен және шағын автобустар да бар. Күнделікті бір уақытта 200-ге дейін көлік шығады. Қос кәсіпорынның да жеңілдіктері бірдей. Мүмкіндігі шектеулі жандар мен Ұлы Отан соғысының ардагерлеріне, І топтағы зағип жандарға және күтушісімен жүретін зағип жандарға қоғамдық көліктерде тегін жүру құқығы берілген. Ал, 7 мен 15 жас аралығындағы балалар мен көп балалы аналарға, зейнеткерлерге жеңілдік қарастырылған. Айта кетерлігі, кейбір автобустарда «депутаттарға жол жүру ақысы тегін» деп көрсетілсе керек. Алайда, мұның өтірік екеніне халық қалаулылары қоғамдық көліктермен жүрген уақытта көз жеткізді.
Автобус паркінің базасын аралап, жолаушы тасымалдаушылардың жұмыс барысымен толықтай танысып шыққан депутаттар оларға қоғамдық көлік қызметіне қатысты қалалықтардың ұсыныс-тілектерін де жеткізді. Мысалы, халық қалаулыларының бірі Бейсенғазы Тастекеев Волгоград көшесіндегі жаңадан бой көтерген ауданға қатынайтын автобустардың жөнді бармай жүргенін, соның салдарынан ол жақтан мектеп оқушылары уақытында сабаққа келіп үлгермей жүргенін айтты. «Семавтопарк» және «Азия Combi» ЖШС-терінің заңгері Николай Чнегов бұл мәселенің алдағы уақытта бір жақты шешімін табатынына сендірді. Сонымен қатар, Бейсенғазы Тастекеев тұрғындар тілегін жазбаша түрде де алып келген екен. Халық қалаулысы кәсіпорындардың заңгеріне қағаздағы өтініш-тілектер бойынша да жұмыс жасауды тапсырды. Қалалық мәслихаттың хатшысы Бейсенбек Ақжалов пен Бауыржан Қайрамбаев, Рафаэль Хазипов сынды бірқатар депутаттар да тұрғындар тарапынан түскен өтініш-тілектер бойынша өздерінің пікірлерімен бөлісіп, ұсыныстарын да айтты.
{jcomments on}Сондай-ақ, тасымалдаушылар да қызмет сапасын жақсартуға тосқауыл болған қордаланып қалған бірқатар мәселелерін де ортаға салды. Мысалы, «Семавтопарк» ЖШС-нің директоры Сергей Должиков кадр мәселесін сөз етті.
– Үлкен автобустарды жүргізу екінің бірінің қолынан келе бермейтіні белгілі. Бірақ, ауа райының қолайсыздығынан, мысалы, жолдар көк мұз, тайғақ болған кездерде қоғамдық көлік жүргізушісі аяқ астынан басқа көліктерді сырып кетуі немесе, зақымдап кетуі де әбден мүмкін. Ал, ондай жағдайлар орын алған уақытта жол сақшылары көп жағдайда айыппұл салғанның орнына белгілі бір мерзімге дейін көлік жүргізу құқығынан айырып жатады. Соның салдарынан аязды күндері немесе ,көк тайғақ кездерінде қалалық ТҮКШ бөлімі жолға шығуға рұқсат берсе де жүргізушілеріміздің өздері рөлге отырудан бас тартып жатады. Осындай мәселелерден кейін автобустар кешігіп шығады, – дейді ол.
Сергей Должиковтың айтуынша, кәсіпорын қарамағындағы әр автобус аялдамаларға 7 минут сайын келіп тұруы тиіс. Ал, автобустардың кешігіп келетіндігі тек түскі уақыттарда болуы мүмкін екенін айтып ақталды ол. Тілшілерге берген сұхбатында С.Должиков:
– Кәсіпорындарға келген депутаттар жолдарды тазарту мен тариф жөніндегі мәселелерді көтерді. Сонымен қатар, оларға енгізілген GPS жүйесін түсіндіріп, көрсеттік. Бұл жүйені «Азия Combi» ЖШС-імен бірге енгізген болатынбыз. Депутаттар тарапынан жолаушылар тасымалына қатысты қатал ескертулер болған жоқ, – дейді.
Бұдан кейін депутаттар жолаушылар тасымалымен айналысатын тағы бір кәсіпорын «Таксопарк» ЖШС-не ат басын тіреді. Мұнда да тариф, қызмет көрсету сапасын арттыру мен қоғамдық көліктер қозғалысының кестесіне қатысты сұрақтар талқыланды.
– Сапалы қызмет көрсетуде көптеген сұрақтар бар. Алайда, біз автобустардағы жолаушылармен әңгімелесу барысында олардың басым көпшілігі қызмет көрсету сапасына көңілдері толатынын байқадық. Ал, көңіл толмаушылық уақытша ғана. Солардың басым көпшілігі автобустардың кешігіп келуін сөз еткен еді, – дейді қалалық мәслихаттың депутаты Бауыржан Қайрамбаев тілшілерге берген сұхбатында.
Оның сөзіне сүйенсек, қаладағы қоғамдық көліктердің мәселесі жан-жақты талқыланып, жолаушыларды тасымалдаумен айналысатын мекеме өкілдерінің қатысуымен өтетін қалалық мәслихаттың алдағы сессиясында қаралатын болады.
Нұрдәулет КӘКІШЕВ,
«Семей таңы»
