1 Мамыр — Қазақстан халқының бірлігі күні мейрамын Семей жұртшылығы да кең көлемде атап өтті. Бұл күні Бейбітшілік аралындағы алаңға қалалықтар көп жиналды. Айта кетерлігі, биыл Бейбітшілік аралында ұйымдастырылған мейрам жаңа форматта, айрықша сипатта аталып өтті. Ауа райының салқындығына қарамастан, мерекелік шараға әсіресе жастар мен мектеп оқушылары көптеп келді.
Арал ортасындағы алаңдарда, сонымен қатар Бейбітшілік стелласында мереке құрметіне арналған концерттік бағдарламалар ұйымдастырылып, қалалық көркемөнерпаздар ұжымда-рының сый-тартуы жасалды. Сондай-ақ жастар арасында спорттық жарыстар мен халықтық ойындар, жергілікті диаспоралардың мәдениеті мен дәстүрлерін таныстыруға арналған этномәдени бірлестіктердің көрмесі ұйым-дастырылды. Бұл шараға әсіресе мектеп оқушылары белсене атсалысты. Сонымен қатар Бейбітшілік стелласында жас суретшілерге арналып алаң жұмыс жасады.
— Қазақстан халқының бірлігі күні — бұл достық пен ынтымақтың және тұрақ-тылықтың мерекесі. Бүгінде тек бірліктің арқасында көп ұлтты еліміздегі бейбіт өмірдің куәсі болып отырмыз. Қазіргі таңда біздің қаламызда 80-нен астам ұлт пен ұлыс өкілдерін біріктіріп отырған Достық үйі жұмыс істейді. Бұл шаңырақ астында 22 ұлттық этномәдени орталық жұмыс істеуде. Осынау мереке күні баршаңызға денсаулық, игілік және бейбіт аспан тілеймін, — деді өз құттықтау сөзінде қала әкімі Ермак Сәлімов.
Мерекелік шара барысында барша қала тұрғындары ән айтып, көңіл көтерді. Спорттық сайыстарды тамашалады.
Ал қаламыздағы этно-мәдени орталықтар қала тұрғындары мен қонақтарына өздерінің ұлттық тағамдарын ұсынып, дастарқан жайды. Көпшілік те оларды мерекемен құттықтап, ізгі тілектерін білдіріп, дәм ауыз тиіп жатты.
— Қазақстан халқының бірлігі күні — біз үшін ең басты мереке, — дейді Достық үйінде орын тепкен «Возрождение» неміс қоғамдық бірлестігінің төрағасы Лилия Гончарук. — Бұл — біздің бірлестіктің мерекесі. Қазақстанда тұратын барлық немістер жақсы өмір сүреді, бізге ешқайда кетудің қажеті жоқ. Қазақстан — туған жеріміз, өз Отанымыз! Оның аспанының ашық болуына біз де тілектеспіз,- деді өз сөзінде.
Қазақстан халқының бірлігі күніне арналған мерекелік шарадан көпшіліктің үлкен әсермен қайтқаны анық.
«СТ» — ақпарат{jcomments off}
