26-27 сәуір күндері Семейдегі Шәкәрім университетінде Шығыс Қазақстан облысының дін істері басқармасы және Шығыс Қазақстан облысының дін мәселелерін зерттеу орталығының ұйымдастыруымен Елбасы Нұрсұлтан Назарбаевтың «Рухани жаңғыру: болашаққа бағдар» бағдарламасын жүзеге асыру мақсатында және Жастар жылы аясында «Сенің болашағың сенің қолыңда!» атты жастар жиыны өтті.
Жиынға ШҚО дін мәселелерін зерттеу орталығының директоры Ернат Қыдырмоллаев, ШҚО дін мәселелерін зерттеу орталығының діни ахуалды зерттеу, талдау және мониторинг бөлімінің меңгерушісі Алуа Сабалақова, Семей қаласының жастар ресурстық орталығының директоры Олжас Соғымбай, ШҚО дін мәселелерін зерттеу орталығының интернет желісінде мониторинг жұмыстарын жүргізу маманы Ерсін Қожанжаров, Семей қаласының Шәкәрім атындағы мемлекеттік университетінің психология кафедрасының қауымдастырылған профессоры, PhD докторы Индира Оралқанова, «Ұлы дала академиясы» ҚҚ директоры Берік Кәдіров, ШҚО дін мәселелерін зерттеу оралығының ақпараттық-түсіндіру жұмыстары бойынша маманы Дулат Жақиянов қатысты.
Халықтың құқықтық және діни сауаттылығын арттыру — Қазақстанның діни саладағы мемлекеттік саясат тұжырымдамасының негізгі бағыты. Аймақтағы конфессияаралық және этносаралық келісімді сақтап, нығайту, ақпараттық және түсіндірмелік сипаттағы шараларды ұйымдастыру – Шығыс Қазақстан облысының дін істері басқармасы және Шығыс Қазақстан облысының дін мәселелерін зерттеу орталығының маңызды қызметтерінің бірі. 2019 жылдың басынан облысымыздың әр өңірінде еңбек ұжымдарының, жастардың, университет пен колледж студенттерінің қатысуымен ақпараттық-түсіндіру жұмыстары ұдайы жүргізіліп келеді.
Жиынды ашқан ШҚО дін мәселелерін зерттеу орталығының директоры Ернат Қыдырмоллаев аймағымыздағы жалпы діни ахуалға тоқталып өтті. Ернат Қыдырмоллаұлының айтуынша, аймағымызда 314 діни субъектілер тркелген: Қазақстан мұсылмандары діни басқармасының 208 филиалы, 40 православие, 61 протестанттық және 6 католик шіркеуі, 1 Кришна санасы қоғамы, 1 Еврей діни бірлестігі. 303 ғибадат үйі, ғибадат үйлерінен тыс жерлерде діни іс-шараларды өткізуге арналған 36 үй-жай (20 намазхана, 15 сағат, 1 сиыну бөлмесі), діни әдебиетті және діни мазмұндағы өзге де ақпараттық материалдарды тарату үшін 108 арнайы тұрақты үй-жайлар бекітілген.
— Дін саласындағы мемлекеттік саясатты іске асырып, мемлекетіміздің рухани тірегіне айналған дініміздің жалпыға ортақ адамгершілік қағидаларын насихаттау, ұлттық рухани құндылықтарымызды жаңғыртып, деструктивті діни ағымдарға қарсы күрес жүргізу мақсатында Шығыс Қазақстан облысының дін істері басқармасының дін мәселелерін зерттеу орталығы тарапынан бірнеше айрықша жобалар іске асырылуда,-деді Е.Қыдырмоллаұлы. Жастар арасында түрлі тақырыптарды және «Рухани жаңғыру» бағдарламасы аясында өткізілетін іс-шаралар мен шаһардағы діни ахуал жайлы қалалық Жастар ресурстық орталығының директоы Олжас Соғымбай баяндады. Олжас Амангелдіұлының айтуынша, Семей қаласында «Ұлы дала жастарына – Ұлттық тәрбие» жобасы қолға алынған. Жобаның мақсаты — Елбасының «Рухани жаңғыру» және «Ұлы даланың жеті қыры» мақалаларында аталған бағыттарды жүзеге асыра отырып, жастарға рухани-мәдени, танымдық тәрбие сағаттарын өткізу. Жоба аясында тарих мамандығында оқитын кемінде 1000 студент тарихи өлкетану мұражайында, актерлік шеберлік және режиссерлік мамандықтарындағы топтар жыл көлемінде кемінде 20 сағат Абай атындағы театрда, бейнелеу өнері және сызу мамандығы бойынша білім алып жатқан студенттер Невзоровтар отбасы мұражайында, кітапхана және баспа ісі мамандығында оқитын студенттер қала кітапханаларында ашық сабақтар өткізбек. Сондай-ақ кемінде 500 бойжеткен «Айша-бибі» әлеуметтік-мәдени орталығында «Бүгінгі қыз – болашақ ана» тақырыбында тәрбиелік курстан өтіп, Семей қалалық ұлттық ат спорты қауымдастығы арқылы кемінде 2 мың ер бала атқа міну мәдениеті бойынша сабақ алып, жергілікті БАҚ өкілдері арқылы студенттердің 20 пайызы журналистика курстарынан өтеді. Жобаға қала жастарының кемінде 60 пайызын қамту жоспарлануда.
ШҚО дін мәселелерін зерттеу орталығының діни ахуалды зерттеу, талдау және мониторинг бөлімінің меңгерушісі Алуа Сабалақованың айтуынша, бүгінде ШҚО-дағы діни ахуал тұрақты.
— Елімізде 14 пен 29 жас аралығындағы жастар саны 4 млн. 206 мың адамды, яғни халықтың 24 пайызын құрайды. Оның ішінде 686 мың жас — өзін-өзі жұмыспен қамтыған және жұмсыссыз. Әсіресе осы өзін-өзі жұмыспен қамтыған және жұмыссыз санатындағы жастарға ақпараттық-түсіндіру жұмыстарын жүргізу маңызды. Бұл бағытта ШҚО дін мәселелері зерттеу орталығы жоспарлы жұмыстарды жүзеге асыруда. Жыл басынан бері аймағымыздағы 7 081 жас ақпараттық-түсіндіру жұмыстарымен қамтылды, — дейді Алуа Өкешқызы.
«Сенің болашағың сенің қолыңда» атты жастар жиыны 27 сәуір күні Шығыс Қазақстан облысы Дін мәселелерін зерттеу орталығының қолдауымен, Семей қаласының Шәкәрім атындағы университетінің «Парасат» интеллектуалдық дебат клубының ұйымдастыруымен өткен «Терроризм және ақпараттық соғыс: бұқаралық ақпарат құралдарының рөлі» атты облыстық пікірсайыс турниріне ұласты. Турнирге Бесқарағай, Аягөз, Абай, Курчатов аудандарынан және Семей, Өскемен қалаларынан – жиыны 72 жас қатысты. Пікірсайыстың мақсаты – жастар арасындағы діни экстремизм мен терроризмнің таралуына тосқауыл қою. Сөз сайыскерлері БАҚ–тың қақтығыс тудыруда алар орнын талқыға салды.
— Бүгінгі облыстық пікірсайыс турнирі өзекті тақырыпты қамтып отыр. ХХІ ғасыр — ақпарат ғасыры. Жастардың әлеуметтік желіде көп отыратыны және ақпаратты желі арқылы оқып-білетіні жасырын емес. Өкініштісі, ғаламторда жалған ақпараттар өте көп тарайды. Сондықтан біліммен қарулануы қажет. Олар дұрыс ақпаратты қайдан алуға болатынын білулері керек. Пікірсайыста осы тақырыптар қамтылатын болады,- дейді пікірсайысқа қатысушы Ғанибек Түсіпбек.
Турнир қорытындысы бойынша, І орынды «Өмек Ұлағат» фракциясы — Нұрсипат Жолдасова мен Ұлағат Өмек, ІІ орынды «Құнанбай Өскенбайұлы» фракциясы — Қуаныш Молдақашев пен Арман Іскежанов, ІІІ орынды «Біз романтик емеспіз» фракциясы — Елдар Қыдырмолдин мен Еркежан Жұмашева иеленді. «Әмір» фракциясы — Мейрам Тұрысбеков пен Нұргелді Серікбосынов финалист атанды. «Ең үздік төреші» аталымын Бақыт Аманова жеңіп алды. Дода соңында жеңімпаздар бағалы сыйлықтармен марапатталды.
Жадыра ТӨЛЕГЕНҚЫЗЫ, «Семей таңы»{jcomments off}
