Қалалық Достық үйінде Семей қаласының қоғамдық келісім кеңесінің отырысы болып өтті. Аталмыш шараға этномәдени орталықтар жетекшілері мен қоғамдық бірлестіктер мен ұйымдар өкілдері жиналды.
Алқалы жиынды Достық үйінің директоры Надежда Шарова алғы сөзбен ашып, жүргізіп отырды. Надежда Шарова бірінші кезекте қоғамдық жұмыстардағы белсенділігі үшін Гүлжиһан Әмірғалықызына ҚР Парламенті Сенатының төрайымы Дариға Назарбаеваның елордадан жеткен алғыс хатын көпшілік алдында салтанатты түрде табыс етті.
Күн тақырыбында екі мәселе қаралды. Атап айтсақ, ағымдағы жылдың 29 сәуірі күні өткен Қазақстан халқы Ассамблеясының отырысында қозғалған қоғамның рухани бірлігі мен тұрақтылығы және осынау құндылықтарды жас ұрпақ арасында белсенді насихаттау турасындағы мәселелер талқыланды. Бұл орайда алдағы жылы ҚХА-ның 25 жылдық мерейлі мерекесі аталып өтетінін жеткізген Н.Шарова қоғамдық келісім кеңесінің аталмыш бағытта жүргізетін жұмыстары айтарлықтай ауқымды екенін жеткізді. Қазіргі күні атқарылуы тиіс шаралардың тұжырымдамасы мемлекеттік деңгейде әзірленуде. Ал Достық үйі Ассамблеяның кіші моделі болғандықтан да халық бірлігі мен рухани тұтастығы жолында күш салатын мәселелер жеткілікті.
Жиын барысында сөз алған Орал Шәріпбаев қиын-қыстау заманда Қазақстан халқы Ассамблеясының Қазақстанның Тәуелсіздігін нығайту жолындағы қызметіне тоқталып өтіп, сессияда қозғалған мәселелерге қатысты ойын білдірді.
— Ертеңгі күні сайлау басталады. Ассамблеяның өзін көрсетер шағы да келді. Біз мемлекеттік саясатты жалғастыру жолында қандай қадамдар жасау қажет деген сұрақ төңірегінде ойлануымыз керек. Басты мақсат — Қазақстанның болашағын баянды, ел азаматтарының өмірін тұрақты да шуақты ету,- дей келе Ассамблея мүшелерінің алдында тұрған міндеттерге тоқталды.
Орал Тоқтарұлы сонымен қатар тәуелсіздік жылдары Қазақстан халқының еліміздегі этносаралық қарым-қатынастардың келешегіне қатысты деструктивті болжамдардың бәрін жоққа шығарғанына да назар аударды. Сондай-ақ сессия барысында Елбасының Қазақстан қоғамындағы тұрақтылықты сақтау үшін барлық тетіктердің қалыпты әрі тиімді жұмысын қамтамасыз етуді тапсырғанын, мемлекеттік органдар жанындағы медиация институты мен қоғамдық кеңестердің жұмысын жандандыру қажеттігін айтқанын, сонымен қатар Ассамблея кәсіпкерлерінің қауымдастығы арқылы шетелдік инвесторлармен экономикалық ынтымақтастықты нығайтуға және Қазақстан халқы Ассамблеясының депутаттық корпусының әлеуетін белсенді пайдалануға шақырғанын да жеткізе кетті.
Жиын соңында басқосуға қатысқан қалалық қоғамдық келісім кеңесінің мүшелері мен Ассамблея мүшелері аталмыш сессияда қаралған мәселелер қатарын толығымен қолдайтындықтарын айтып, өз пікірлері мен көзқарастарын білдірді.{jcomments off}
