Ең шығармашыл оқушы, ең дарынды жеткіншек, білім мен спортта озат атанған үздіктер аптаның жұмасы күні қаламыздағы экономикалық лицейдің кең дәлізінде өткен салтанатты шеруге қатысты. Осы күні қызыл кілем төселген жолмен облыстық, республикалық және халықаралық олимпиадалар мен түрлі деңгейдегі білім бәсекелерінде Семейдің атын асқақтатып жүрген шәкірттер сап түзеп, сән-салтанатпен жүріп өтті. Қала және қала маңы мектептерінен жиналған жалпы саны 190 оқушының барлығы да өздерінің ұстаздары мен ата-аналарын қуанышқа бөлеген дарынды балалар. Үздіктердің бәрі де бұл күні қала басшылығы тарапынан алғысқа кенеліп, мақтау қағаздары мен медальдар түріндегі марапаттарға ие болды.
Д.МҰХАМЕДИЯР,
«Семей таңы».
Семейлік оқушылар тек республика көлемінде ғана емес, шет мемлекеттерде де өз дарындылықтарымен танылып, әлемдік деңгейдегі білім бәсекелерінде топ жарып жүр. Оған мысал ретінде халықаралық додаларда үздік атанып, медальдарға ие болып, аталған салтанатты шеруге қатысқан оқушыларды айтсақ та жеткілікті. Қала маңы мектебінің 11 сынып оқушысы Денис Овчаров биылғы жылы Ресейдің Мәскеу облысына қарасты Королев қаласында өткен халықаралық деңгейдегі ғылыми-зерттеу және оқу-ізденімпаздық жобалар олимпиадасында абыройы асқақтап, айқын басымдықпен бас жүлдені жеңіп алыпты.
— Үзіліссіз төрт жыл бойы «Дәстүрлі емес тәсілдер бойынша өсімдіктер өсіру» тақырыбында ғылыми жоба әзірлеумен, зерттеу жұмыстарымен айналыстым. Соның аясында бірқатар байқаулар мен олимпиадаларға қатыстым. Ал биылғы жыл мен үшін үлкен жетістікке толы болды. Королев қаласында өткен «Жұлдызды жауын-2019» атты халықаралық олимпиадада бағым жанып, бас жүлдені қанжығаға байладым. Бұл тек менің емес, менің ғылыми жетекшімнің, барша ұстаздарымның да жеңісі,- дейді пікір білдірген Денис Овчаров.
Шеруге қатысушыларды және ұстаздар қауымын қала әкімінің орынбасары Айдар Садырбаев құттықтап, жылы лебізін білдіріп, марапаттаулар табыс етті.
— Бүгінгі өткізіліп отырған шеру, сөз жоқ, біздің жеңімпаз оқушыларымыз үшін ерекше мәнге ие болып отыр. Шәкірттеріміздің осыған дейінгі жеңістерін есепке алсақ, білім, зияткерлік, жалпы бәсекеге қабілеттіліктері сыналған сайыстарда жүлде алған жастарымыздың қатары артып отыр. Мен біздің семейлік оқушылардың әлі де өздерінің зияткерлік, шығармашылық және спорттық тұрғыдағы мүмкіндіктерін жарқыратып көрсете алатындарына сенімдімін,- деді өзінің құттықтау сөзінде Айдар Серікқазыұлы.
Осыдан соң қызыл түсті қалы кілем төселген жолақпен ғылыми сайыстар мен түрлі деңгейдегі шығармашылық байқауларда, олимпиадаларда және спорттық сайыстарда топ жарған оқушылар салтанатпен жүріп өтті. Оларға мақтау грамоталары мен медальдар табыс етілді.
Айта кетсек, Семей қаласы бойынша 8 мектеп оқушысы халықаралық деңгейдегі ғылыми жобалар сайысына қатысып, барлығы да жеңіспен оралған. Жоғары деңгейдегі эрудицияны, ағылшын тілін меңгеру сапасын және ғылыми, шығармашылық ізденіске деген құштарлықты айқындайтын мұндай айтулы байқаулар Оңтүстік Кореяның Тэджен, Мәскеу облысының Королев, Мәскеу қаласының өзінде және Астана қаласында үстіміздегі оқу жылында болып өткен. Әсіресе «Математика және жобалау», «Зерттеуші химик» атты білім бәсекелерінде топ жарғандардың қатары көп.
Тағы бір айта кетер жайт, 2018-2019 оқу жылында қаламыздағы Биологиялық орталықтың тәрбиеленушілері мен №1 мектеп және Татар өнер мектебі, Балет мектебі, Балалар мен жастардың шығармашылық сарайының шәкірттері талай биіктерді бағындырыпты. Оның 85-і халықаралық, 70-і республикалық және 20-сы облыстық деңгейдегі білім бәсекелері екен.
Спорттық сайыстарда жеңіске жетіп, Семейдің атын шығарып жүрген оқушылардың басым көпшілігі республикалық додаларда қоржынға жүлде салып жүрген білекті де жүректі өрендер.
Талаптың тұлпарын мініп тас қияға өрлеген жас буынның алдағы байрақты бәсекелерден де үнемі дәл осылай жүлделі оралуларына біз де тілектестік білдірдік.
