Семейдегі Жастар шығармашылық сарайында қала әкімі жанындағы Жастар ісі жөніндегі кеңестің кезекті отырысы болып өтті. Жиын барысында, негізінен, екі мәселе: Жастар жылы аясында атқарылып жатқан жұмыстар және колледж студенттерін әскери-патриоттық тұрғыда тәрбиелеу бағытында жүргізіліп жатқан жұмыстар қарастырылды. Сонымен қатар жастар бойында өмірлік маңызы бар дағдыларды қалыптастыру және «Start up» жастар жобалары туралы мәселелер талқыланды.
Қаламыздағы жастар қауымы, соның ішінде колледждер мен жоғары оқу орындарының студенттері жиналған басқосуға қала әкімінің орынбасары Айдар Садырбаев қатысып, Жастар жылы аясында атқарылған шараларға баға беріп өтті. Сонымен қатар өскелең буынға патриоттық тәрбие беру, отаншылдық рухты оятуға байланысты қолға алынған жұмыстар жөнінде келелі сөз қозғады.
Қала әкімі орынбасарының айтуынша, облыс басшысы Даниал Ахметовтің тапсырмасымен, қала әкімі Ермак Сәлімовтің қолдауымен қалалық Жастар ресурстық орталығының штаты алдағы уақыттарда арта түспек.
Жиын барысында сөз алған қалалық Жастар ресурстық орталығының жетекшісі Олжас Соғымбай ағымдағы Жастар жылының жаңа толқынға ерекше міндеттемелер жүктейтінін айтып өтті. Сонымен қатар жастардың белсенділігі айқын байқалған қала көлеміндегі мәдени-көпшілік шараларға, соның ішінде «Мерейлі отбасы» байқауы, «Жайдарман» ойындарына тоқталды.
Ал қаламыздағы колледж директорлары кеңесінің төрағасы Оралхан Сартаев арнаулы орта білім беретін мекемелерде әскери-патриоттық тәрбие беру мәселелері жөнінде тұшымды ойларымен бөлісті.
Басқосуда сондай-ақ «Бизнес-инкубатор» орталығының жетекшісі Диас Смағұлов жастар кәсіпкерлігі туралы қызықты мәліметтерді ортаға салды. Оның айтуынша, бүгінгі таңда қаламызда 40-тан аса студент өз кәсіптерін ашып, өркендетіп отыр.
— Жыл сайын біздің бастамамызбен жастар арасындағы кәсіпкерлікті қолдауға бағытталған «Startup Battle» байқауы ұйымдастырылады. Бұл мақсатта 2017-2019 жылдары 2 млн. теңге қаражат бөлінген болатын. Бұл сомаға 10 жоба іске асырылды,- деп ақпарат берді Диас Смағұлов.
Бүгінгі таңда аталмыш орталықтың мемлекеттік жастар саясатын жүзеге асыруда атқарып отырған жұмысы ұшан-теңіз.
Мән-мағынасы ерекше жиын барысында жастар өміріне қатысты бірқатар мәселелер қозғалды.
Әлібек КЕМЕЛХАН, «Семей таңы»{jcomments off}
