ҚР Президенті Қасым-Жомарт Тоқаев Ақорда төрінде өткен салтанатты ант беру рәсімі кезінде жасаған баяндамасында жақын аралықта елімізде Ұлттық қоғамдық сенім кеңесі құрылатынын хабарлаған болатын. Аталмыш бастама қоғамда үлкен серпіліс тудырып, сан алуын пікір-пайым қалыптастыруда.
Қасым-Жомарт Кемелұлы өз сөзінде аталмыш бастаманың қоғамның прогрессивті жолмен дамуындағы қосар үлесі және демократиялық құндылықтарды нығайтудағы берер тиімділігі жайында кеңінен сөз өрбіте келіп: «Біздің адамдарды билік пен қоғам диалогінің дамуы қатты алаңдатады. Мұндай диалог пікір плюрализмін, түрлі пікірлерді мойындаудан құрылады, бірақ бірыңғай ұлт — басты бағдар. Сондықтан мен Ұлттық қоғамдық сенім кеңесін құруды шештім. Кеңеске, жастарды қоса алғанда, бүкіл қоғамның өкілдері кіреді. Ұлттық қоғамдық сенім кеңесінің бірінші кеңесі осы жылдың тамыз айында өтеді», — деп атап өткен болатын.
Сонымен қатар мемлекет басшысы биліктің халық алдындағы өз уәделерін орындауға міндетті екенін атап өтті. Бұл оның басты миссиясы.
«Тек осылай ғана ұлт бірлігін, елдегі тұрақтылықты нығайтуға болады. Сондықтан менің сайлауалды тұғырнамамды іске асырудың пәндік жоспары әзірленетін болады. Үздік идеялар мен ұсыныстар осы құжатта көрініс табады», — деді ҚР Президенті.
Ұлттық кеңестің құрамына еліміздегі барлық қоғамдық бірлестік өкілдері мен жастар енеді. Сонымен қатар Ұлттық қоғамдық сенім кеңесінің алғашқы отырысы осы жылдың тамыз айында өтеді деп жоспарлануда. Ал әзірге қоғам талқысына салынып жатыр.
Жалпы, Ұлттық кеңестің жұмысын үйлестіру мәселесі бойынша азаматтық қоғам өкілдерімен кеңесу қаулыға қол қойылғаннан-ақ басталып кетті. Қазіргі күндері қоғамның әртүрлі сегменттеріндегі қайраткерлермен, азаматтық белсенділермен кездесулер өтіп жатыр. Түрлі мәселелер көтеріліп, Ұлттық кеңестің жұмыс форматы мен құрамына қатысты көптеген ұсыныстар айтылуда. Қазірдің өзінде құрылып жатқан Ұлттық кеңестің жұмысына қоғам қайраткерлері мен белсенділері үлкен қызығушылық танытып отырғанын байқауға болады. Олар белсенді түрде пікір білдіріп, диалог алаңының күн тәртібіне қатысты ойларын ортаға салып жатыр. Ал өз кезегінде осынау жаңашыл бастама туралы толғамды пікірлер, барлық ұсыныстар сараланып, талданатын болады.
Белгілі саясаттанушы Айдос Сарым Президент Қасым-Жомарт Тоқаевтың бастамасымен құрылатын Ұлттық қоғамдық сенім кеңесіне қатысты «ҚазАқпарат» тілшісіне пікір білдірді.
«Жалпы, бұл кеңеске жүктелетін міндеттердің іске асуы бірқатар қадамдарға байланысты. Ең алдымен, Кеңес ережесін дұрыс бекітіп, содан кейін, оның құрамының ауқымды болуы, яғни қоғамның әрбір саласында жүрген әр күштердің атынан шыққан азаматтардың басын қоса білу маңызды. Сол Кеңеске қоғамға сөзі өтетін азаматтардың көптеп еніп, олар бір-біріне құрметпен қарай отырып, тиісті шешімдерді шығаруға қауқарлы болуы керек. Жұмыстың табысты болуы көбіне осыған байланысты», — деді саясаттанушы.
Оның айтуынша, кеңес құрамына енген мүшелер қоғамдағы ең өзекті мәселелерге назар аударып, дер кезінде талқылай білуі шарт.
«Екіншіден, Кеңес өзекті әрі негізгі мәселелерді ортаға салып, сол бойынша тиісті құжаттардың нұсқасын, жобасын шығара алатын ұйым болуы қажет деп есептей аламын. Сайлау, БАҚ, митингтер туралы, сондай-ақ саяси партиялар мен қоғамдық бірлестіктер жөніндегі заңнаманың қайта қаралуын көптен бері айтып жүргендер бар. Егер осылардың негізгі тұжырымдамасын, негізгі идеясын бекітіп, соны заңгерлерге табыстап, дұрыс нұсқаларын жасап, оны Парламентке енгізсе, онда Ұлттық қоғамдық сенім кеңесі өзіне жүктелген міндетті орындай алады деген пікірдемін»,- деді Айдос Сарым.
Саясаттанушының пайымынша, сайлау науқанының аяқталуына байланысты негізгі эмоциялар тарағаннан кейін, қоғаммен сөйлесу, қоғамдық-саяси күштермен ақылдасу, кеңесу жұмыстары жүргізілуі керек. Сосын Президент бастамасымен құрылғалы отырған кеңеске көптеген білікті әрі елге танымал азаматтардың келуін қамтамасыз еткен жөн.
Әзірлеген Қуаныш ЖОЛЫМБЕТ, «Семей таңы»{jcomments off}
