Тарбағатай
«Құрметті достар, Шығыс Қазақстан көпбалалы және аз қамтылған отбасыларын қолдау бағдарламасын жүзеге асырудамыз. Күні кеше Тарбағатай ауданының 8 көпбалалы анасына баспана кілтін табыс ету құрметіне ие болдым. Жалпы бұл ауданда 27 жанұяға үй берілді. Бағдарламаның бірінші кезеңіне сәйкес, біз аймақтағы 230 отбасын қамтыдық. Олардың барлығы бұған дейін ауылды жерлерде баспана кезегінде тұрған. Шын жүректен барша аналарға қоныстарыңыз құтты болсын деймін. Сіздерге зор денсаулық, мол бақыт, жанұяларыңызға игілік тілеймін!» делінген аймақ басшысының жазбасында.
Аталмыш бағдарламаның бірінші кезеңі бойынша, облыс аудандарында бюджеттен тыс қаражат есебінен жағдайы ең төмен деген 230 көпбалалы отбасыға тегін пәтер беру көзделген болатын. Бұл мақсатта облыстық «Парыз» қорынан тиісті қаржы бөлінген-ді. Ал, осынау акция өткізілетін күнге дейін барлық аудандарда облыс әкімінің тапсырмасы бойынша қоғамдық комиссия құрылып, оған көпбалалы аналар, қоғамдық бірлестік өкілдері тартылған еді. Көп ұзамай алғашқы нәтижелер де айқындалды.
Үржар
Айтулы акция барысында бұл күні Үржар ауданы бойынша 20 отбасы баспаналы болды. Ауданның 8 ауылдық округтерінде, атап айтсақ, Мақаншы, Таскескен, Ақжар, Егінсу, Барқытбел, Науалы, Қарабұлақ, Үржар ауылдарындағы көп балалы аналарға көптен күткен үйлердің кілттері табысталды.
Облыстық «Парыз» қорынан бөлінген 38 млн. 100 мың. теңгеге жанұялардың тікелей қатысуымен үйлер сатып алынған болатын. Аудан әкімі Серік Зайнулдин Мақаншы ауылында 8 отбасына үйдің кілтін табыс етіп, «Жаңа үйлеріңіз бақытқа, қуаныш пен балалардың сылдырлаған күлкісіне толы болсын» деген ізгі-ниетін білдірді. Өз кезектерінде аналар да мемлекет басшысына, облыс, аудан әкімдері мен ел азаматтарына ризашылықтарын жеткізді.
Үржар ауданының тұрғыны, 7 баланың анасы Дәметкен Досмұханова жаңа үйдің қонысын шашу шашумен бастаса, Науалы ауылында үш отбасына үйдің кілті табысталып, қана қоймай, Гаухар Заманбаеваға «күміс алқа» берілді.
Бұл күні барлық аналардың құжаттары рәсімделді. Айта кетейік, осыдан біраз уақыт бұрын Үржар ауданы бойынша «Жан жылуы – жанұяға» атты акция өткізіліп, көпбалалы отбасыларға 27 баспана әперілген болатын. Ал, осымен Үржар ауданы бойынша 47 отбасы жаңа қонысқа ие болды. Бұл облыстағы ең жоғары көрсеткіш.
Аягөз
Сонымен қатар, кеше, Аягөз аудандық әкімдігінің мәжіліс залында өткен салтанатты жиын барысында аудан әкімі Ділдабек Оразбаев алты ауылдан жиналған 7 көпбалалы анаға, аз қамтылған отбасыларға баспаналарының кілттерін табыс етті.
Осы рәсімге ауданға арнайы жұмыс сапарымен келген ҚР Парламент Мәжілісінің депутаты Нұртан Сабильянов та қатысып, жергілікті жұртшылыққа, қуанышқа кенеліп отырған аналар қауымына ізгі тілек білдіріп өтті.
Абай
Мұндай қуанышты сәттер дәл осы күні Абай ауданында да орын алды. Өңір басшысы Жарқынбек Байсабыров Қарауыл ауылының үш, Би ата ауылының бір көпбалалы отбасына ендігі аралықтағы өз шаңырақтарының ауласында баспана кілттерін табыс етті.
Баспаналардың барлығы да тұрмысқа қолайлы. Ағымдық жөндеуден өткізілген.
Үйлі болған аналар қауымы облыс әкіміне, аудан басшылығына алғыстарын білдіріп, ақжарма тілектерін жолдап жатты.
Көкпекті
Бұл күні Көкпекті ауданында 34 көпбалалы отбасыға пәтер кілттері табыс етілді. Оның 10-ы Самар, 6-уы Көкпекті, өзгелері Үлкенбөкен, Аққала, Құлынжон, Тассай, Преображенка, Сарыбел, Қара-өткел ауылдарында тұратын отбасылар-ға берілді.
Аудан орталығы Көкпекті ауылындағы Мәдениет үйінде өткен шарада аналар қауымына үй кілттерін аудан әкімі Асхат Сайдахметұлы табыс етті.
– Бүгін Көкпекті ауылында қуанышты күн. Аудандағы 34 көпбалалы отбасы жаңа үйге ие болды. Бұл облыс аудандары арасындағы ең үлкен көрсеткіш. Қоныстарыңыз құтты болсын. Тек жақсылықта жүздесейік, – деді аудан әкімі.
Салтанатты кештен соң Асхат Сайдахметұлы жаңа үйге ие болған екі отбасының қуанышына ортақтасып, шаңырақтарына кіріп шықты.
Жарма
Акция аясында Жарма ауданында тұратын көпбалалы аналар да баспаналы болды. Нақтырақ айтсақ, аудан әкімі Ахметқали Нұрғожин жергілікті көпбалалы 17 отбасына баспана кілттерін салтанатты түрде тапсырды. Бұл тұрғын үйлер негізінен өңірге қарасты Шалабай, Бақыршық, Жаңғызтөбе, Жаңаөзен, Сұлусары ауылдарынан берілді. Жаңа қоныс иелерінің көпшілігі «Күміс алқа» иегерлері.
Айта кетсек, баспаналарды сатып алуға облыстық «Парыз» қорынан қомақты қаржы бөлінді. Яғни, бюджеттен тыс қаражат көзі қарастырылып, жергілікті кәсіпкерлер мен жаны жомарт демеуші азаматтар қол ұшын созған болатын. Осылайша, облысымыздың барлық аудандары бойынша 230 көпбалалы отбасы баспаналы болды.
«СТ»-ақпарат
{jcomments off}
