Жуырда Семейде ерекше шара өтті. Достық үйінің директоры Надежда Шарова бастаған этно-мәдени орталықтар өкілдері шаһардағы перинатальдық орталықта Домбыра күні құрметіне арнап осы күні өмірге келген нәрестеге қазақы қара домбыраны сыйға тартты.
Достық үйі бойынша мұндай шаралар қатары жиі ұйымдастырылады. Барлық атаулы күндер мен мерекелер атаусыз қалмайды. Осы ретте домбыра күніне орай ерекше акция ұйымдастырыпты. Нәтижесінде аналарға сый-сыяпат жасалған.
-Төртінші баласын дүниеге әкелген сәбидің анасын шын жүректен құттықтап, Домбыра күні құрметіне ұлттық аспапты сыйлаймыз. Ұлттық салт-дәстүрлерді құрмет тұтатын азамат болғай, – деді өз сөзінде қалалық Достық үйінің басшысы Надежда Шарова.
Осынау күнгі зор қуаныш иесі Жарма ауданы Шар қаласының тұрғыны Альмира Рахметжанова сәбиінің есімін Заңғар деп қойыпты. Ол баласының дәл мереке күні дүниеге келетінін күтпегенін айтты.
-Домбыра мейрамы күні дүниеге келген баламның музыкант болады деген көптің ыстық лебіздерін естіп қатты қуанып жатырмын. Алайда, оны болашақта әділдіктің нышаны болсын, сот төрағасы болсын деп есімін ырымдап Заңғар деп қойдық,- деді өз сөзінде пікір білдірген А. Рахметжанова.
Перинатальдық орталықтың ұжымы да шет қалмай, сәбиге бала төсегін сыйлады.
Көпбалалы ана Достық үйі қызметкерлерінің ыстық ықыластары мен пейіліне зор ризашылық білдірді. Сондай-ақ, перинатальды орталық қызметкерлері мен Достық үйінің өкілдері де өз кезектерінде Заңғардың аман-есен үлкен азамат болып өсуін, ұлттық салт-дәстүрді құрметтеуін тіледі.
Ал, мерекелік шаралар легі «Бейбітшілік» аралында жалғасын тапты. 200-жуық домбырашылар 7 танымал күйді орындап, халықты өнерлерімен тәнтті етті. Қала тұрғындары Абай мен Құрманғазының шығармаларын тыңдап қана қоймай, домбыра аспабына арналған мастер-кластарға қатысып, музыкалық аспаптардың көрмесін тамашалады.
Көңілді өткен кеш соңы Ертістің оң жағалауында өтетін «ЯРКОкросс», «Асық» және «Домбыра party» сынды жастар марафонымен тәмамдалды.
Өз тілшіміз
{jcomments off}
