1986 жылғы желтоқсан оқиғасы – қазақ жастарының КСРО үкіметінің отаршылдық, әміршіл-әкімшіл жүйесіне қарсы наразылық қимылдары, ел жастарының ұлттық намысты қорғап, қазақтың бостандық сүйгіш халық екенін, азаттық үшін күресе білетінін көрсеткен тарихымыздағы маңызы зор оқиға болып табылады. Бостандыққа, тәуелсіздікке ұмтылған Желтоқсан оқиғасына КОКП ОК-нің қаулысымен кезінде “қазақ ұлтшылдығының көрінісі” деген баға берілді. КСРО-ның тоталитарлық, отаршыл саясатына қарсы «Ақырып теңдік сұраған» сол жастардың алға қойған мақсаты – еліміздің Тәуелсіздігі еді.
Тарихы тереңде жатқан қазақ елінің жаңа заманда өз алдына қайта егеменді ел болған күні- біздер үшін үлкен мереке. Жыл сайын бұл күнді барша қазақстандықтар ғана емес, шет елдердегі қандастарымыз да ерекше мақтаныш сезіммен атап өтеді. Көптеген ғасырлар бойы бабаларымыз аңсаған тәуелсіздік туы қолымызға тигелі ел өмірінде түбегейлі өзгерістер болып жатыр. Қазақстан бұл күндері әлем мойындаған дамушы елдердің қатарына қосылды. Халқымыздың әл-ауқаты артып, жұмыс және тұрмыс жағдайлары жыл өткен сайын жақсара түсуде.
Тарих өлшемімен қарағанда аз ғана мерзім ішінде еліміз аяғынан тік тұрып, қарқынды даму жолына түсіп, әлем мемлекеттерінің арасынан өзіне лайықты орын алды. Қазақстан жұрты ел Тәуелсіздігінің 22 жылдығын әлем алдында абыроймен, толағай табыспен және береке-бірлік, ынтымақпен қарсы алып отыр. Небәрі жиырма екі жылда орасан зор істер атқарылды. Әлемде ең бірінші болып ядролық сынақтардан бас тарттық, халықаралық ұйымдарда төрағалық еттік, орталық Азияда экономикасы дамыған бірінші елміз. Спорттық жетістіктерімізде аз емес. Ендігі мақсатымыз – әлемдегі дамыған 30 елдің қатарына қосылу. Елбасы өзінің Қазақстан халқына арнаған Жолдауларында, сөйлеген сөздерінде қазіргі жастардың келешегінен зор үміт күтетіндігін, оқуда, еңбекте бәсекеге қабілетті болуы керектігін айтады. Елбасы атап көрсеткендей, Қазақстанның болашағы қазіргі жастардың қолында. Міне, бұл сөздер әрбір жас азаматтың рухын көтеріп, азаматтық қоғамда белсенді, жан-жақты қабілетті болуға, еліміздің дамуына лайықты үлес қоса алатындай іскер болуға жігерлендіреді. «Жұмыла көтерген жүк жеңіл» демекші, бәріміз бірігіп еліміздің өркендеуіне ат салысайық. Біз, жастар болашағымыздың жар-қын да, айқын болатынына сенеміз!
Бауыржан ЗЕЙНУЛЛИН,
Семей қалалық
«Жас Отан» жастар қанаты,
жастар мәслихатының төрағасы.
