Өткен жұма, 2 тамыз күні Семейдегі жұқпалы аурулар ауруханасының бас дәрігері Сәуле Қаржаубаеваның қатысуымен баспасөз мәслихаты өтті. Жиында маусымдық менингит ауруы және оның алдын алу туралы сөз қозғалды.
Сәуле Қаржаубаеваның айтуынша, энтеровирусты менингит маусымдық ауру түріне жатады. Әсіресе жаз және күз мезгілдерінде көбеюі мүмкін. Бұл ауруға, көбінесе, балалар шалдығады екен. Ауру ангина, бөртпе, дене қызуының көтерілуі, құсу, жүрек айну, бастың ауруы, кейде іш ауырсынуы және жиі іш өту сынды белгілерімен байқалады. Мұндай белгілер байқалған жағдайда, ауруды бөлектеп, жедел жәрдем көлігін шақырған жөн. Себебі науқас ауру ошағы болып табылуы мүмкін.
— Энтеровирусты менингит ауа тамшылары, су, тамақ және тұрмыстық қарым-қатынас арқылы жұғады. Аурудың негізгі тасымалдаушысы вирусты жұқтырған адам болып табылады. Учаскелік дәрігер диагноз қойғаннан кейін, лабораториялық диагностика жүргізіліп, бакте-риалық немесе вирустық менингит екені анықталады. Негізінен, бұл дертке ерте жастағы балалар көп шалдығады. Стационардан кейін балалар диспансерлік есепке алынып, 7-10 күн учаскелік дәрігер мен лор дәрігердің бақылауында болады. Егер мектеп оқушысы немесе балабақшаға баратын бала болса, аталған мекемелерге де тексеріс жүргізіледі,- дейді С. Қаржаубаева.
Өткен жылдың осы кезеңінде Семей қаласы бойынша 11 менингит анықталса, биыл бұл көрсеткіш 25-ке жеткен. Оның ішінде мектепке дейінгі мекемелерде осындай он екі жағдай тіркелген. Дәрігерлердің айтуынша, бұған биылғы ауа райының ылғалдылығы мен күннің ыстығы әсер еткен.
— Жеке бас гигиенасын қатаң сақтап, тамақтанар алдында және дәретханадан соң қолды жақсылап сабынмен жуу керек. Қайнатылмаған су ішпеңіздер, әсіресе балаларды өзен-көлдердегі суларды жұтып қоюдан сақтандырыңыздар. Адам көп шоғырланған жерлерде суға түспеуге кеңес береміз. Оның ішінде су қоймаларында, бассейндерде шомылмаған абзал. Ауру су арқылы да жұғатындықтан, біз апта сайын қаладағы ауыз суды, аквапарк суына тексеріс жүргізіп отырамыз. Сондай-ақ үй-ішін, жұмыс орнын таза ұстап, жиі желдетіп тұрған жөн және жеміс-жидектерді міндетті түрде жуып жеу қажет,- дейді С.Қаржаубаева.
Жаз мезгілінде өршитін бұл инфекцияның халық арасында, әсіресе балалар арасында таралуына жол бермеу мақсатында аурухана қызметкерлері қала базарларында акция ұйымдастырып, халыққа ақпараттық парақтар таратқан.
Аурудың алдын алу үшін дәрігердің кеңесіне құлақ түріңіз, қарапайым санитарлық ережелерді сақтап, көпшілік жиналған жерлерде суға түспеуге тырысыңыз. Су айдындарында және бассейндерде шомылғанда ауыз қуысына су жібермеуді қадағалау қажет.
Жадыра ТӨЛЕГЕНҚЫЗЫ, «Семей таңы» {jcomments off}
