Еліміздің оңтүстігіндегі Арыс қаласында орын алған қайғылы оқиғадан кейін барша қазақстандықтар көмек қолын созғаны мәлім. Байтақ республикамыздың түкпір-түкпірінен материалдық және қаржылай көмектер ұсынылып, құрылыс жұмыстарын жүргізу үшін арнайы құрылған топтар Арысқа ағылған болатын. Семейден де үш еріктілер бригадасы жіберілген еді. Жуырда қалалық әкімдіктің мәжіліс залында өткен салтанатты жиында шаһар басшысы Ермак Сәлімов жұмыстарын аяқтап, Семейге оралған азаматтарға алғыс білдіріп, арнайы әзірленген сый-сияпаттарды табыс етті.
Еліміздің өзге өңірлерінен барған құрылысшылар қатарында семейліктер де Арыс қаласындағы бүлінген үйлерді қайта қалпына келтіруге барынша белсенділікпен атсалысуда. Алғашқы топ бүгінде Семейге қайтып оралды. Тоқтала кетсек, 15 күннің ішінде семейліктер Арыс қаласында құрылыс, қайта қалпына келтіру және әрлеу жұмыстарын толық жүргізіп шығыпты.
Жиынды қала әкімі Ермак Бидахметұлы алғы сөзбен ашып, аталмыш шара жайында кеңінен түсінік беріп өтті.
— Бүгін біз 24 маусым күні Арыс қаласында орын алған жағдайға байланысты көмек көрсеткен жандарға алғыс айтуға жиналып отырмыз. Қаламыздың 39 тұрғыны Арысқа аттанған болатын. Семейліктер Арыс қаласын қайта қалпына келтіру жұмыстарына асқан белсенділікпен қатысты. Бүгін сондай-ақ осы жандарға қаржылай сыйлық ұсынып отырған «Полимер бұйымдары зауыты» ЖШС мен «Қазына» ойын-сауық кешенінің кәсіпкерлеріне ризашылығымды білдіремін,- деп атап өтті қала басшысы. — Бұдан былай елімізде мұндай жағдай болмасын. Мемлекетіміз өркендеп, жеріміз гүлденсін. Баршаңызға мол бақыт, мықты денсаулық тілеймін.
Ермак Бидахметұлы сөзінің соңында Арыс қаласын қалпына келтіруге қатысқан жергілікті азаматтарды алғыс хаттармен марапаттады. Ал кәсіпкерлер қаржылай сыйлықтарын табыс етті.
Бұл күні мерейі үстем болған жерлестеріміздің барлығы дерлік құрылыс және ішкі әрлеу жұмыстарын жүргізудің әуесқой шеберлері екен. Олардың арасында Слямхан Әлімханов, Мейрамбек Апашев, Мұратқали Асқаров, Рүстем Байдәулетов, Медет Серікқанұлы, Еркін Байжұмановтарды атап төтуге болады.
— Арыста 15 күн болдық. Әртүрлі жұмыстарды атқардық. 19 адам барған едік. Жұмыла жұмыс жүргізіп, бүлінген үйлерді қайта қалпына келтіруге атсалыстық. Көбінесе үйлердің шатырлары мен сыртқы келбеті бүлінген екен. Көмек көрсетуде аянып қалған жоқпыз. Арыстықтардың семейліктерге алғысы зор екенін де айтқымыз келеді,- дейді пікір білдірген азаматтар.
Сөз соңында айта кетсек, Арыс қаласында жұмыс істеп жатқан семейліктер қатары әлі де бар. Алғашқы топ қайтып оралғанымен, өзге азаматтар бүлінген шаһарды толық қалпына келтіріп оралмақ.
Азамат ЕРСАЙЫН, «Семей таңы»{jcomments off}
