Жастар жылы аясында «Қазақстан жастарының Конгресі» заңды тұлғалардың қауымдастық нысанындағы бірлестігі жастардың ішкі туризмін дамыту, жастарды Қазақстанның киелі жерлерімен, еліміздің әр аймағындағы мәдени және тарихи мұралармен таныстыру, талантты, шығармашыл және зияткер жастарды анықтау мақсатында «Жастар керуені» республикалық жобасын іске асыруда. Осы жоба шеңберінде 16 мен 29 жас аралығындағы 700 белсенді жас республиканың әр түкпіріне жолға шықты.
Апта сәрсенбісі, 14 тамыз күні 100-ге жуық белсенді жастардың керуені Семей қаласына табан тіреді. Еліміздің әр түкпірінен арнайы келген меймандардың мақсаты — кешегі өткен дала данышпандарының рухани-мәдени мұрасымен жақын танысып, олардың табанының ізі қалған «Жидебай-Бөрілі» мемориалдық кешеніне барып, ұлылар кесенесіне зиярат ету.
Осы күні кешкісін керуенмен келген жастарды ҚазИГЗУ ашық аспан астында ұйымдастырылған жазғы фестивальға қонаққа шақырды. Қаламыздағы бұл іргелі оқу орнында әр апта сайын арнайы фестиваль өткізіледі екен. Бұл жолғы шара шаһар меймандарына арналыпты. Қала әкімінің орынбасары қатысқан айтулы шара барысында Жастар ресурстық орталығының белсенді жастары ән мен заманауи биден шашу шашты. Сонымен қатар түрлі тақырыптар бойынша викторина өткізіліп, қызықты сұрақтарға жауап берген тапқыр жастарға арнайы әзірленген сыйлықтар тарту етілді.
– Бүгінгі күн біз үшін ерекше мағынаға ие. Республикалық Жастар керуенімен келген замандастарымызды қарсы алып отырмыз. Олардың уақыттарын көңілді өткізу үшін бүгінгі кешіміздің бағдарламасына түрлі ойындар мен мерекелік номерлер енгіздік. Сонымен қатар, ымырт үйірілісімен, Абайдың 175 жылдығына орай, «Құнанбай» көркем фильмін ашық аспан астында меймандар назарына ұсынамыз,- дейді белсенділік танытып жүрген бастамашыл семейлік жастар.
Жастар фестивалі барысында сондай-ақ заманауи би түрлерінен баттл өткізіліп, үздіктер анықталды. Қонақтар құрметіне әндер шырқалды.
– Біз Шығыс Қазақстан облысында 4 күн боламыз. Осынау аралықта аймақтағы тарихи-мәдени орындарды аралап үлгеруіміз керек. Біздің жобамыздың басты мақсаты жастар туризмін дамыту болып отыр. Қазіргі күні осы мақсатта 16 мен 29 жас аралығындағы 700 белсенді жас республиканың әр түкпіріне жолға шықты. Біз – шығысты таңдадық. Осынау сапарымыздан керемет әсер алып қайтатынымызға сенімдімін, бү-гінгі шарадан алған әсеріміздің өзі сөзбен айтып жеткізгісіз,- дейді Жастар конгресінің менеджері Жанбота Пашен.
Оның айтуынша, еліміздің шығысы жастардың үлкен қызығушылығын туғызыпты.
— Біз Шығыс Қазақстан облы-сындағы ішкі туризмді дамытуға үлес қосуға келдік. Біздің арамызда студенттер де, еңбек ететін жастар да бар. Сондай-ақ азаматтық белсенділер мен блогерлер, өнер мен ғылым саласында жүрген жас буын өкілдері де бар. Сонымен қатар «Жас Отан» мен «Жас Ұлан» қатарындағы мектеп оқушылары да бізбен бірге келді. Осынау саяхатымыз аяқталған соң біз міндетті түрде әлеуметтік желілерде алған әсеріміз жайлы кеңінен баяндап жазатын боламыз,- дейді Дана Пашен.
Жастардың айтуынша, саяхат-шылардың басым көпшілігі ел астанасы — Нұр-Сұлтан қаласы мен солтүстік өңірлерден келіпті.
Азамат ЕРСАЙЫН, «Семей таңы» {jcomments off}
