21 тамыз, сәрсенбі күні қалалық әкімдікте Қоғамдық кеңес отырысы өтті. Отырысқа қала әкімі Ермак Сәлімов, қала әкімінің орынбасары Айдар Садырбаев, қалалық мәслихат хатшысы Бейсенбек Ақжалов, кеңес төрағасы Зүлфия Жамалтдинова, кеңес мүшелері, бөлім басшылары және медициналық мекемелердің өкілдері қатысты.
Бұл жолғы жиында Семей өңірі бойынша денсаулық сақтау саласындағы ахуал және қаладағы ішкі туризмді дамыту мәселелері сөз болды. Жиынды ашқан Зүлфия Фазылжанқызы осымен бірнеше мәрте кеңес отырысына келмеген ШҚО Денсаулық сақтау басқармасының Семей қаласы бойынша басшысының орынбасары Гүлнар Шарипованы сынға алып, қала әкіміне ескерту беруін өтінді. Кеңес мүшелерінің ұсынысымен құрамына Перинаталдық орталық, №12 емхана, инфекциялық аурухана, жедел медициналық жәрдем ауруханасы, Знаменка ауылдық емханасы, диагностикалық орталық басшылары кіретін жұмыс тобы құрылды. Бұл жұмыс тобы қаладағы медициналық қызмет көрсету сапасын бақылап, денсаулық сақтау мекемелерінде орын алған мәселелерді шешуге атсалысатын болады.
Жиын барысында Зүлфия Фазылжанқызы Семейдегі медициналық қызмет көрсету сапасы көңіл көншітпейтінін, тұрғындардан арыз-шағым көп түсетінін еске салды. Кеңес төрағасының айтуынша, Қоғамдық кеңес мүшелері шаһардағы барлық медициналық мекемелерді аралап, жағдайды бақылаған. Кеңес басшысы инстаграмда арнайы ашылған аккаунтта тек №10 емхана жайлы жағымды пікірлер айтылатынын жеткізді.
Жақын орналасқан медициналық мекемелерді оңтайландыру туралы Денсаулық сақтау министрлігінің тапсырмасына сәйкес, қаладағы Перинаталдық орталық пен жедел медициналық жәрдем ауруханасы біріктірілуі мүмкін. Бірақ екі мекеменің арасы тым шалғай екенін ескерсек, бұл тұрғындар үшін қолайсыздық тудыруы бек мүмкін.
— Медициналық мекемелер жақын орналасса, біріктіруге болатын еді. Бірақ екі аурухананың арасы 10 км. Екі мекеменің қосылуын сарапшылар да құптап отырған жоқ. Олар мұның Семей үшін тиімсіз екенін айтды. Біз, Қоғамдық кеңес мүшелері, қаланың даму жоспарын талқылағанда, жаңадан салынатын балалар ауруханасы перинаталдық орталықпен бірігеді деп нақты айтқанбыз, — деген Зүлфия Фазылжанқызы Қоғамдық кеңес облыстық денсаулық сақтау басқармасына және денсаулық сақтау министрлігіне хат жолдап, перинаталдық орталық пен жедел медициналық жәрдем ауруханасын біріктірудің тиімсіз екенін жеткізетінін айтты.
Семейдегі инфекциялық арухана директорының міндетін атқарушы Сәуле Қаржаубаева 1939 жылы салынған аурухана ғимаратының тым ескі екенін, санитарлық талаптарға сай келмейтінін, ҚДС басқармасы тарапынан үнемі айыппұлдар салынатынын айтып шағымданды. Тіпті жақында экономикалық сот ауруханадағы онға жуық бөлімшені жабу туралы шешім шығарғанын жеткізген Сәуле Қаржаубаева Қоғамдық кеңес мүшелерінен сот шешімін кейінге қалдыруға немесе жаңа аурухана салуға көмек көрсетулерін өтінді.
— Аурухана ғимараты тым ескі, санитарлық талаптарға сай емес. Сондықтан ҚДС басқармасы тарапынан үнемі айыппұлдар салынады. Бізді екі рет әкімшілік сотқа берді. 6 тамызда экономикалық сотқа арыз берілді. Сот шешімімен, бактериологиялық лаборатория, үлкендер инфекциясы бөлімі, балалар жансақтау бөлімі, үшінші бөлімше, ас үй, кір жуатын орын жұмысы тоқтатылды. Мен сотқа шешімді кейінге қалдыру туралы хат жаздым, бірақ әлі жауап жоқ. Бұдан бұрын қалалық әкімдік пен облыстық Денсаулық сақтау басқармасынан бұл мәселерді шешуге көмек сұрағанмын. Бізді басқа ауруханамен біріктірсе немесе жаңа ғимарат салып берсе, — деп өтініш білдірді Сәуле Қаржаубаева.
Семейге әсіресе жаз уақытында инфекциялық аурухананың қажеттілігін алға тартқан Қоғамдық кеңес мүшелері сотқа, сот орындаушыларына хабарласып, шешімді кейінге қалдыруды сұрайтын болып келісті.
Айта кетейік, инфекциялық аурухана 140 орынға есептелген. Оның ішінде 100 орын балаларға, 40 орын үлкендерге арналған.
Семей қаласының дене шынықтыру, спорт және ішкі туризмді дамыту бөлімінің басшысы Мұрат Құржықаев Семейдегі ішкі туризмді дамыту бағытында атқарылған шаралар жайлы баяндады. Оның айтуынша, қалада «Демалыс күнгі маршрут» жобасы қолға алынып, қаланың туристік логотипі, карта мен жолнұсқа әзірленген. Алдағы уақытта оларды әуежайға, вокзалдар мен қонақ үйлерге, қала әкімінің сайтына орналастыру жоспарланған. Сонымен қатар бөлім басшысы туристерді тарту мақсатында ауқымды шараларды өткізу үшін арнайы жоба дайындалғанын, алдыда тарихи орындар мен ескерткіштерді сақтап, саяхаттар ұйымдастыру міндеті тұрғанын және Семейге туристерді тартатын «магнит» керектігін баса айтты. Кеңес мүшелері болса бөлім басшысына жұмысты жандандыруды тапсырды.
— Баяндамаңызда туристік сайт қажет екенін айтып кеттіңіз. Бірақ қарапайым ВКонтакте, инстаграмм әлеуметтік желілерінде жұмыс істемейсіздер. Халықты қызықтыратын тартымды парақшаларыңыз жоқ,- деді кеңес мүшесі Жасұлан Құрманғалиев.
Жиын соңында кеңес мүшелері қаралған мәселелерді бақылауда ұстайтындарын айтты.
Айтолқын Саматова, «Семей таңы»{jcomments off}
