Бейсенбі, 22 тамыз күні Ақпараттық орталықта Семей қаласында «Нұрлы жер» бағдарламасының жүзеге асырылуы туралы «Тұрғын үй құрылыс жинақ банкі» АҚ Семей қалалық филиалы қызметкерлерінің қатысуымен баспасөз мәслихаты өтті.
Банктің бизнесті дамыту бөлімінің басшысы Айбек Жарлығаповтың айтуынша, енді ТҚЖБ салымшыларына «Нұрлы жер» мемлекеттік бағдарламасына қатысу үшін өтінім берудің және байқауға қатысудың қажеті жоқ. Банктің hcsbk.kz сайтына немесе baspana.kz сайтына кіріп, ұнатқан пәтерді таңдау және сатып алу үшін брондау жеткілікті. Бағдарлама аясында Қарағайлы ықшам ауданынан «Абай Арена» спорт кешені мен Назарбаев Зияткерлік мектебінің жанынан барлығы 286 пәтер ұсынылып отыр. Еске сала кететін жайт — жақында енгізілген өзгерістерге байланысты «Нұрлы жер» бағдарламасы арқылы пәтер алушылардың атында соңғы бес жылда тұрғын үй болмауы керек деген шарт алынып тасталған. Тек пәтер сатып алу кезінде клиенттің жекеменшігінде үй болмаса жеткілікті.
— Қарағайлыда «Нұрлы жер» бағдарламасы бойынша пәтерлердің бір шаршы метрі 140000 теңгеден сатылады. Пәтерді сатып алу үшін ТҚЖБ клиенттерінің шотында 1,5 млн. теңге немесе тұрғын үй құнының 20%-ы болса жеткілікті. Әрі қарай банк 5%-дық жылдық мөлшерлемемен жеңілдетілген заем ұсынып, қолжетімді тұрғын үйді сатып алуға көмектеседі. Бұл жағдайда ай сайынғы төлем сомасы 53 мың теңге шамасын құрайды. Құны 7,5 млн. теңгелік екі бөлмелі пәтердің бастапқы есебі осындай,- дейді Айбек Жарлығапов.
Ал «Өз үйім» бағдарламасы арқылы сатылатын тұрғын үйлердің шаршы метрінің құны 165 000 теңгеден басталады. 20 % бастапқы жарна болған кезде заем бойынша жылдық мөлшерлеме 7%-ды құрайды. Бұл бағдарламаның артықшылығы — қатысушыларға пәтер алу сәтінде өзге тұрғын үйлерінің болуы кедергі болмайды. Бүгінде Семей қаласында аталмыш бағдарлама арқылы 3 үй сатылымға қойылып отыр.
— Қазіргі таңда «Тұрғын үй құрылыс жинақ банкі» АҚ тұрғын үйлері мен халыққа ұсынып отырған бағдарламалары қолжетімді. Тиісінше, тұрғындар арасында сұраныс та жоғары. Күн сайын қаламызда банктің 50 жаңа салымшысы пайда болады, шамамен банктің 3 клиенті қолжетімді несие рәсімдеп, қоныс тойын тойлайды. Биылғы жылдың басынан біз 1 101 несие бердік. Бұл – жақсы көрсеткіш, — дейді А.Жарылғапов.
Елімізде биылғы жылдың 17 шілдесінен бастап көпбалалы, мүмкіндігі шектеулі бала тәриелеп отырған және толық емес отбасыларға арналған «Бақытты отбасы» бағдарламасы жүзеге асуда. Бағдарлама бойынша бастапқы жарна тұрғын үй құнының 10%-ын құраса, заем бойынша жылдық мөлшерлеме 2 %-ға тең.
— Жергілікті атқарушы орган тарапынан жоғарыда аталған 3 категория бойынша 311 ұсыныс келіп түсті. Банк оның ішінде 155 клиентпен жұмыс істеді, 26 клиент 200 млн. теңгеден астам сомаға несие алып, тұрғын үйлерді таңдау үстінде. Бүгінгі күні 71 өтініш қаралуда. Ал 55 тұрғын әртүрлі себептерге байланысты банктен рұқсат ала алмады. Біз өтініш берушілердің несие тарихын, төлем қабілеттілігін және отбасы мүшелерінің әрқайсының орташа табысының 42 мыңнан аспауын да басшылыққа аламыз. Әзірге «Бақытты отбасы» бағдарламасы аясында Лаура Турдина атты тұрғын ғана қоныс тойын тойлап үлгерді,- дейді А.Жарылғапов.
Жоғарыда аталған бағдарлама аясында тұрғын үйлерді салумен «Восток Строй» мекемесі айналысуда. Мекеме өкілінің айтуынша, салынған үйлердің кепілдік мерзімі – 2 жыл.
Жадыра ТӨЛЕГЕНҚЫЗЫ, {jcomments off}«Семей таңы»
